I tun ye kudayi piyɔniye ye fɔlɔ la wa?

1. Mɔgɔ caaman ye nɛɛma sɔrɔ ka baara juman lo kɛ, nka u dɔw waajibiyara ka mun lo kɛ?

¹ Saan caaman kɔnɔ, mɔgɔ waa caaman ye nɛɛma sɔrɔ ka ‘mɔgɔw kalan ani ka Kibaru Duman fɔ’ i ko kudayi cidenya baarakɛlaw (Kɛw. 5:42). Nka, koo dɔw y’a to u dɔw y’o baara lalɔ. N’i tɛ kudayi piyɔniye ye tugun, yala i ye i ka koow cogoya sɛgɛsɛgɛ sisan k’a filɛ n’i be se ka kɛ a ye tugun wa?

2. Minw tɛ piyɔniyew ye tugun, mun na u ka kan k’u ka koow cogoya sɛgɛsɛgɛ ka filɛ sisan?

² Koow cogoya be yɛlɛma: Gwɛlɛya min tun y’a to i y’i ka piyɔniye baara lalɔ, n’a sɔrɔ o t’i kan tugun. A be se ka kɛ ko i ye piyɔniye baara lalɔ sabu i tun tɛ sera ka lɛri 90 sɔrɔ tugun kalo kɔnɔ. Nka komi dɔ bɔra lɛri hakɛ la ka kɛ lɛri 70 ye, mun na i t’a filɛ n’i be se ka kɛ piyɔniye ye tugun? Kabi i ye piyɔniye baara dabila, yala dɔ bɔra i ka baloɲini baara la wala i ka kunkanbaaraw la soo kɔnɔ wa? Kɛnɛyakow tun y’a to balimamuso dɔ y’a ka piyɔniye baara lalɔ nka a sera k’a daminɛ tugun a saan 89nan na. Komi a tun ye saan kelen ni kɔ kɛ a ma la dɔgɔtɔrɔso la, a y’a jati ko a ka kɛnɛyako bena a to a ka kɛ piyɔniye ye tugun!

3. Denbayamɔgɔw be se ka ɲɔgɔn dɛmɛ cogo di walisa u la kelen ka kɛ piyɔniye ye?

³ N’a sɔrɔ i ma kɛ piyɔniye ye ka ye, nka i ka denbayamɔgɔ dɔ y’a ka piyɔniye baara lalɔ walisa k’a janto a somɔgɔ dɔ la i n’a fɔ mɔgɔkɔrɔba dɔ (1 Tim. 5:4, 8). N’o lo, yala ele wala denbayamɔgɔ tɔɔw tɛ se ka dɔ kɛ walisa k’o piyɔniye kɔrɔ dɛmɛ wa? Mun na aw tɛ baro kɛ o kan ɲɔgɔn fɛ? (Ntal. 15:22). Ni denbayamɔgɔw be ɲɔgɔn dɛmɛ walisa u la kelen ka kɛ piyɔniye ye, joo be bɛɛ fɛ k’a jati ko olu fana niin b’o baara la.

4. I be se ka mun lo kɛ n’i tɛ se ka segi ka kɛ piyɔniye ye sisan?

⁴ N’i ka koow cogoya t’a to i ka segi ka kɛ piyɔniye ye sisan, kana i fari faga. Komi o baara ŋaniya b’i la, o ka di Jehova ye (2 Kɔr. 8:12). Tuma min na i tun ye piyɔniye ye, i ye setigiya min sɔrɔ, i ka to ka baara kɛ n’o ye i ka cidenya baara la. Ŋaniya min b’i la k’o baara kɛ, to ka delili kɛ o koo la ani i ka sababuw ɲini ka yɛlɛmani don i ka koow la (1 Yun. 5:14). Loon be loon na, n’a sɔrɔ Jehova bena ‘daba yɛlɛ i ɲɛ ka baara caman kɛ’ walisa i ka kudayi piyɔniye baara diya sɔrɔ tugun!—1 Kɔr. 16:9.