Fɛɛn min kama an be segi ka taga bɔ mɔgɔw fɛ tuma o tuma
1 Yɔrɔ caaman na, an b’an ka kiinw bɛɛ boli-boli k’u ban siɲɛ caaman. An be to ka segi ka taga o soow kelen-kelen kɔnɔ tuma o tuma hali n’o soo kɔnɔ mɔgɔ y’a fɔ an ye ko ale mako t’a la k’an lamɛn. Mun na an be to ka segi ka taga kuma mɔgɔw fɛ minw ma mɛnni kɛ an fɛ kɔsa la?
2 An be Jehova ni mɔgɔw kanu: Sababu fɔlɔ min kosɔn an be timinandiya cidenya baara la, o ye ko an be Jehova kanu. An dusukun b’an lasun an ka to k’an ka Ala kɔrɔtalenba kofɔ mɔgɔ wɛrɛw ye (Luka 6:45). An be Jehova kanu, o lo b’an lasun k’a ka sariyaw bato ani ka mɔgɔw dɛmɛ k’o ɲɔgɔn kɛ (Ntal. 27:11; 1 Yuh. 5:3). Mɔgɔw b’an lamɛn wo, u t’an lamɛn wo, an be muɲuli kɛ o baara la. Hali ka kɔrɔbɔli to kerecɛn fɔlɔw kan, u tora ka waajuli kɛ, u m’a “dabila” (Kɛw. 5:42). Ni mɔgɔw be ban k’an lamɛn, sanni an k’a to o k’an fari faga, an sabatilen be to. O la, an b’a yira ko an be Jehova kanu ani ko an masirilen be a la kosɔbɛ.
3 An be timinandiya fana sabu an b’an mɔgɔ ɲɔgɔnw kanu (Luka 10:27). Jehova t’a fɛ mɔgɔ si ka halaki (2 Piɛrɛ 3:9). Hali kiin minw kɔnɔ waajuli kɛra siɲɛ caaman na, an be mɔgɔ dɔw sɔrɔ tugun minw b’a fɛ ka baara kɛ Jehova ye. Ɲɛyirali fɛ, Gwadelupe mara la, mɔgɔ 56 kan, mɔgɔ kelen ye Jehova Seere ye. Nka o yɔrɔ la, mɔgɔ 214 batisera salon. Mɔgɔ hakɛ min nana hakilijigi lajɛn na, bɛrɛ m’u jɛn mɔgɔ 20000 na. O kɔrɔ, mɔgɔ 22 kan, mɔgɔ kelen nana Hakilijigi lajɛn na.
4 Koow be yɛlɛma kiinw kɔnɔ: Mɔgɔ kuraw be yɛlɛma tuma o tuma an ka kiinw kɔnɔ. Soo dɔw kɔnɔ mɔgɔw tɛ mɛnni kɛ an fɛ. Nka an mana segi ka na, mɔgɔ wɛrɛ be se ka daa yɛlɛ an ye ani k’an lamɛn. I be t’a sɔrɔ o tigi m’an ka kuma mɛn ka ye. Wala an be se ka luwanse kuraw sɔrɔ minw kɔni be u mako don an ka kuma la. Deen dɔw ka bangebagaw tɛ sɔn kibaru duman ma. U mana kɔrɔbaya, u be bɔ o luu kɔnɔ. O ɲɔgɔnna mɔgɔw be se ka sɔn ka Masaya kibaru lamɛn.
5 Mɔgɔw cogoya fana be yɛlɛma. Fɔlɔ la, ciden Pol ‘tun ye Ala tɔgɔ jugu fɔbaga ye, mɔgɔw tɔɔrɔbaa ani mɔgɔ farinma tun lo’ (1 Tim. 1:13). O cogo kelen na, mɔgɔ minw be baara kɛra Jehova ye bi, fɔlɔ la, u caaman tun t’u mako don tiɲɛn koo la. Wagati dɔ la, u dɔw yɛrɛ tun be Kibaru Duman kɛlɛ. Komi duniɲa cogoya be yɛlɛma, minw tun tɛ u mako don an na, wala an kɛlɛbaga dɔw be se ka sɔn k’an lamɛn. Dɔ wɛrɛw be se ka sɔn ka lamɛnni kɛ sisan ni balawo dɔ ye u sɔrɔ i n’a fɔ: sayako u ka denbaya kɔnɔ, wariko, kɛnɛyako wala n’u ka baara tiɲɛna u bolo.
6 Nin duniɲa be tagara a laban yɔrɔ la. Nka an be baara min kɛra ka waajuli kɛ ani ka mɔgɔw kalan, o be teliyara ka taga ɲɛ (Es. 60:22). O kama, an be to ka waajuli kɛ ni dusudiya ye, ani an b’an jija ka koow filɛ ni miiriya ɲuman ye. A be se ka kɛ ko an bena kuma mɔgɔ wɛrɛ min fɛ, a be sɔn k’an lamɛn. An ka kan ka to ka kuma. ‘O cogo la an bena an yɛrɛ kisi ka an lamɛnbagaw fana kisi’ (1 Tim. 4:16).
[Study Questions]
1. An ka waajulibaara be na ni ɲiningali jumanw ye?
2. Sababu fɔlɔ juman kosɔn an be timinandiya cidenya baara la?
3. Mɔgɔw kanu bena an dɛmɛ cogo di an ka to ka waajuli kɛ?
4. Cogo juman na kiin cogoya be yɛlɛma?
5. Mun lo be se ka mɔgɔw lasun u ka sɔn ka lamɛnni kɛ?
6. Mun na an ka kan ka to ka waajuli kɛ ni dusudiya ye?