U bena a koo mɛn cogo di?

1. Mun na waajuli baara be se ka gwɛlɛya an fɛ, nka mun na an b’an timinandiya a la?

¹ Komi Jehova ka loon ka surun kosɔbɛ, kɔrɔtɔ b’a la ka mɔgɔ caamanba dɛmɛ u ka lɔnniya sɔrɔ Ala koo la ani a sagonata koo la hadamadenw ta fan fɛ ( Yuh. 17:⁠3; 2 Piɛrɛ 3:​9, 10). Nka tuma dɔw la, a man nɔgɔ k’o kɛ sabu mɔgɔ caaman t’u mako don an ka waajuli la wala u b’an lɔgɔbɔ o kosɔn (2 Piɛrɛ 3:​3, 4). O bɛɛ n’a ta, an lanen b’a la tigitigi ko, an ka kiinw kɔnɔ, mɔgɔ dɔw be yen hali bi minw bena sɔn kibaro duman ma n’u y’a mɛn. O ɲɔgɔnna mɔgɔw bena kibaro duman mɛn cogo di ni mɔgɔ m’u waaju?​​—⁠Rom. 10:⁠14, 15.

2. Pol ka ɲɛyirali b’an jija cogo di?

² N’an juguw b’an kɛlɛ: An man kan k’an fari faga sabu mɔgɔ caaman be yen minw b’a fɛ ka Masaya kibaro lamɛn hali bi. Dugu fɔlɔ min ye kibaro duman mɛn ciden Pol daa la tubabu jamanaw na, o tun ye Filipe dugu ye. Tuma min na a juguw ye ngalon tigɛ k’ale ni Silasi jalaki, u ye u fila bɛɛ bugɔ ni berew ye ani k’u bila kaso la (Kɛw. 16:⁠16-⁠24). Nka o tɔɔrɔ ma Pol lasun ka waajuli dabila siranya kosɔn. Dugu filanan min tun b’a ka sira kan, o tun ye Tesalonike ye. O dugu kɔnɔ, a ye jagwɛlɛya sɔrɔ Ala barika la (1 Tes. 2:⁠2). Yala Pol ka ɲɛyirali t’a yira fɛɛn min kama an tɛ waajuli dabila wa?​—⁠Gal. 6:⁠9.

3. Mɔgɔ minw tun t’u mako don fɔlɔ la, mun lo be se k’a to u dusukun cogoya be yɛlɛma?

³ Mɔgɔ minw tun tɛ sɔn k’an lamɛn kabi wagati jan, u caaman dusukun cogoya yɛlɛmana gwɛlɛya dɔw kosɔn i n’a fɔ wariko, bana, u somɔgɔ dɔ ka saya wala duniɲa ka kibaruya minw be mɔgɔ kɔnɔ gwan (1 Kɔr. 7:⁠31). Dɔw ka bangebagaw tun b’an kɛlɛ. Nka komi u kɛra balikuw ye, u be sɔn k’an lamɛn sisan. N’an be to ka waajuli kɛ, o bena sababu di o ɲɔgɔnna mɔgɔw ma u ka Jehova “tɔgɔ wele” sanni a wagati ka tɛmɛ.​​—⁠Rom. 10:⁠13.

4. Mun lo b’an lasun ka to ka cidenya baara kɛ n’an t’a “dabila”?

⁴ An kana a “dabila”: I ko cidenw y’a kɛ cogo min na saan kɛmɛkulu fɔlɔ la, Ala n’an mɔgɔɲɔgɔn kanuya bena an lasun ka to ka waajuli kɛ ani ka mɔgɔw kɛ Krista ka kalandenw ye n’an t’o baara “dabila” (Kɛw. 5:⁠42). Bi, mɔgɔ caaman be “ŋunan ka kasi ko haramulen kɛlenw bɛɛ kosɔn” (Ezek. 9:⁠4). O ɲɔgɔnna mɔgɔw mana kibaro duman mɛn, a be u jigi tugu k’u dusu suman tiɲɛn na! Hali ni mɔgɔ caamanba be ban k’an lamɛn, Bibulu b’an jigi sigi ko an ka jijali kɛli ka di Jehova ye kosɔbɛ.​​—⁠Heb. 13:⁠15, 16.