“An ye baara kɛ an ka kiin kɔnɔ tuma caaman yɛrɛ!”
1 Kɔni i ma deli k’a miiri ko waajuli baara kɛra i ka kiin kɔnɔ tuma caaman na ani ko mɔgɔ minw bɔra ‘sagaw’ ma, olu tɛ yen tugun a kɔnɔ? N’a sɔrɔ i y’a miiri ko: ‘Mɔgɔw bena an jaabi cogo min na ne b’o lɔn. Kuun juman b’a la ka taga bɔ mɔgɔw ye ni u tɛ u mako don an ka cira la?’ Tiɲɛn lo, waajuli delila ka kɛ kiin dɔw kɔnɔ tuma caaman na. O bɛɛ n’a ta, an man kan k’o koo filɛ o cogo la. An k’a filɛ cogo ɲuman na. Mun na do? Dalilu naani filɛ jukɔrɔ.
2 Ala ye an ka deliliw jaabi: Yesu y’a fɔ ko: “Suman tigɛta ka ca, nka baarakɛlaw ka dɔgɔ. O de kosɔn aw ka Sumantigi deli ko a ka baarakɛlaw ci ka taga a ka suman tigɛ.” (Luka 10:2). Saan tankulu caaman kɔnɔ, an ye Jehova deli a ka weleweledala wɛrɛw fara an kan. Yɔrɔ caaman na, weleweledala kuraw nana fara an kan, ani baara be kɛ kiinw kɔnɔ tuma caaman na. Komi Jehova ye an ka delili jaabi, yala o tɛ an ɲagali wa?
3 Tɔnɔ be yen timinandiya la: Hali kiin minw kɔnɔ waajuli delila ka kɛ, mɔgɔ dɔw be Masaya ka cira kunbɛn koɲuman, ani u be lɔnniya sɔrɔ tiɲɛn koo la. O kama, an ka kan ka timinandiya ka taga bɔ mɔgɔw ye. An jigi b’a la ka mɔgɔ kɔnɔgwɛ wɛrɛw sɔrɔ (Esayi 6:8-11). Kiin minw kalifara an ma, an ka “to ka taga” o mɔgɔw yɔrɔ, i komi Yesu ka kalanden fɔlɔw. An k’an jija k’u ɲɛnatigɛ ni Ala ka Masaya cira ye. —Mat. 10:6, 7, NW.
4 Pɔrutugali jamana na, kɔngeregasiyɔn caaman b’u ka kiinw tagama lɔgɔkun o lɔgɔkun. Nka u be ‘sagaw’ ɲɔgɔnnaw sɔrɔ hali bi. An balimamuso dɔ be koow filɛ cogo ɲuman na kosɔbɛ. A y’a fɔ ko: “Sɔgɔma o sɔgɔma, sanni ne ka bɔ ka taga waajuli la, ne be Jehova deli a ka ne dɛmɛ ka mɔgɔ sɔrɔ min b’a fɛ ka Bibulu kalan.” Loon dɔ la, a ye Bibulukalan daminɛ ni baarakɛla dɔw ye kuun masiri yɔrɔ dɔ la. O kɔ, muso kelen dɔrɔn y’a yɛrɛ yira o kalan kama. A ko: “Muso tɔɔw mako t’a la, nka ne kɔni b’a fɛ.” Kalo kelen cɛ, o muso yɛrɛ tun be Bibulukalan fila kɛra ni mɔgɔ wɛrɛw ye. A ma mɛɛn, a batisera, ani a ye piyɔniye baara daminɛ!
5 Baara be dafara: Kibaro duman waajuli be kɛra komi Yesu tun y’a fɔ cogo min na (Mat. 24:14). Hali yɔrɔ minw na mɔgɔw ‘t’a fɛ k’an lamɛn’ an ka waajuli baara kɛra lasɔmini ye u fɛ. An y’a lɔn ko dɔw tɛna lamɛnni kɛ, u yɛrɛ bena a ɲini ka tiɲɛn kɛlɛ. Nka an ka kan k’olu fana lasɔmi bɛrɛbɛrɛ Jehova ka kiti nata koo la. —Ezek. 2:4, 5; 3:7, 8, 19.
6 An ka ci ma se a daan na fɔlɔ: An lo man kan k’a latigɛ tuma min na waajuli baara ka kan ka lalɔ. A ka kan ka lalɔ wagati min na, Jehova lo b’a lɔn tigitigi. A b’a lɔn ni an ka kiin na mɔgɔ dɔw bena sɔn ka kibaro duman lamɛn. Bi, mɔgɔ dɔw b’a fɔ k’u mako t’a la. Nka gwɛlɛyaba dɔ be se k’u lasu ka lamɛnni kɛ loon wɛrɛ. A be se ka kɛ: N’u ka baara tiɲɛna u bolo, bana jugu dɔ, wala n’u diyanye mɔgɔ dɔ sara. Mɔgɔ caaman ma an ka waajuli lamɛn ka ye tiɲɛn na, sabu u be sigasiga an na, wala u bolo degunnen lo kojugu. N’an be to ka viziti terimanw kɛ u ye, o be se k’u bila ka lamɛnni kɛ.
7 Minw kɛra balikuw ni dentigiw ye saan damanin tɛmɛnenw na u be ɲɛnamaya koow ta sɔbɛ la. U be ɲiningali dɔw bila u yɛrɛ ye minw jaabiliw be sɔrɔ Ala ka Kuma dɔrɔn kɔnɔ. Denbatigi dɔ ye an balimamuso fila dɔw weele ka don a ka boon kɔnɔ, ani a y’a fɔ u ye ko: “Tuma min na ne tun ye denmisɛn ye, n’ tun t’a faamuya mun kama n’ bamuso be Seerew gwɛn, ani a b’a fɔ u ye ko ale mako tɛ u ka cira la k’a masɔrɔ u tun b’a fɛ ka kuma Bibulu koo la dɔrɔn. Ne y’a ŋaniya ta ko ne mana kɔrɔbaya, ka furu, ani ka n’ tɔgɔla soo sɔrɔ, ne bena Jehova Seerew weele ka don walisa u ka Bibulu ɲɛfɔ ne ye.” A y’o lo kɛ. Balimamuso minw nana bɔ a ye, u ɲagalila kosɔbɛ.
8 Yala i be se ka koow kɛ ni barika fisaman ye wa? Mɔgɔw be an kunbɛn cogo min na, o dɔrɔn tɛ an ka baara gwɛlɛya n’an be waajuli kɛ kiin na tuma o tuma. Tuma dɔw la, koow be bɔ an yɛrɛw lo la. Yala an bɔtɔ ka taga waajuli la an be sigasiga wa? O be se ka nɔɔ to an ka miiriya ni an ka kumakan n’an ɲɛda cogo kan. An ka kɛ ni miiriya ni ɲɛda ɲuman ye. An ka waajuli kɛcogo kura dɔ daminɛ k’a filɛ. An k’a ɲini k’an ka kumaw yiracogow yɛlɛma ani k’u fisaya. An delila ka ɲiningali min bila walisa ka baro ladon, n’a sɔrɔ an be se k’o yɛlɛma, ani ka baara kɛ ni Bibulusen wɛrɛ ye. Balima minw ka waajuli baara be ɲɛ kiin kɔnɔ, an ka ladiliw ɲini olu fɛ. An k’a ɲini ka waajuli kɛ ni weleweledala ni piyɔniye wɛrɛw ye, ani an k’a kɔrɔsi k’a filɛ mun lo be barika di u ka waajuli baara ma.
9 Jehova ka diyanye n’a ka duga be Masaya waajuli baara kan. An kɛtɔ k’an sendon o baara la, an b’a yira ko an be Jehova n’an mɔgɔɲɔgɔn kanu (Mat. 22:37-39). O kama, an k’an ka baara lataga ɲɛ fɔɔ ka taga a dafa. An kana sɛgɛ ka waajuli kɛ kiin na tuma o tuma.