Waajuli kɛtɔ soo ni soo, an ka kɛ dɛmɛbaga ɲuman ye
1. Ka waajuli kɛ ɲɔgɔn fɛ ni weleweledala dɔ ye, nafa jumanw be o la?
1 Loon dɔ la, Yesu ye kalanden 70 ci waajuli la ani a ye u bila ka taga “fila-fila” (Luka 10:1). Siga t’a la, o labɛn y’a to a ka kalandenw sera ka ɲɔgɔn dɛmɛ ani ka ɲɔgɔn jija waajuli kɛtɔ. N’an ye weleweledala dɔ bila sira waajuli la, an be se ka kɛ dɛmɛbaga ye a fɛ cogo di?
2. N’an waajulikɛɲɔgɔn be kumana, cogo juman na ani mun na an ka kan ka lamɛnni kɛ?
2 An ka lamɛnni kɛ: N’an waajulikɛɲɔgɔn be kumana, an k’an tulo malɔ ka lamɛnni kɛ ( Yak. 1:19). Ni bibulusen dɔ be kalanna, an ka tugu o kalan kɔ an yɛrɛ ka Bibulu kɔnɔ. Mɔgɔ min be kumana, an k’a tigi filɛ, a ka kɛ an waajulikɛɲɔgɔn ye wo wala lamɛnnikɛla ye. N’i be i tulo malɔ ka baro lamɛn, o be se ka lamɛnnikɛla jija a ka lamɛnni kɛ fana.
3. Tuma juman lo a bɛnnen be an k’an daa don baro la?
3 An k’a lɔn tuma min bɛnnen lo ka kuma: N’an waajulikɛɲɔgɔn be kumana ni mɔgɔ dɔ ye, an be bonya la a kan n’an b’a to a ka baro ɲɛminɛ (Rom. 12:10). An man kan ka kuma tigɛ a daa. A b’a fɛ ka min fɔ, n’a ɲinɛna o kɔ, wala n’a lamɛnbaga ye sɔsɔli dɔ lawuli wala a ye ɲiningali dɔ kɛ ani an waajulikɛɲɔgɔn ye dɛmɛ ɲini an fɛ, an ka ɲi k’a ɲini k’a ka kumaw dafa sanni ka baro wɛrɛ dadon (Ntal. 16:23; Waaj. 3:1, 7). N’an be kuma, an ka kuma ka kan ka dɔ fara an waajulikɛɲɔgɔn ka seereya kan.—1 Kɔr. 14:8.
4. Mun lo bena kɛ sababu ye an be ninsɔndiya ani an be sanga sɔrɔ waajuli la?
4 Tuma min na kalandenw fila-fila sigiyɔrɔma 35 tilara waajuli la, u “ɲagalilen kɔseginna.” (Luka 10:17). N’an be lamɛnni kɛ, n’an b’a lɔn tuma min bɛnnen lo ka kuma walisa k’an waajulikɛɲɔgɔn dɛmɛ, an fana bena ninsɔndiya ani an bena sanga sɔrɔ waajuli la.