Kana je ka tugu i waajulikɛɲɔgɔn kɔ
1. N’an be waajuli kɛra n’an balima dɔ ye, an be se ka ciden Pol ladegi cogo di?
1 Ciden Pol tun be wagati min kɛ n’a balima kerecɛnw ye, a tun b’o jati sababu ye ka “ɲɔgɔn jaa gwɛlɛya.” (Ɔrɔm. 1:12). I be wagati min kɛ waajuli la n’i balima dɔ ye, yala o ye sababu ye i fɛ k’a tigi jaa gwɛlɛya ani k’a dɛmɛ wa? Sanni i ka je ka to ka tugu i waajulikɛɲɔgɔn kɔ, mun na i t’a fɔ a ye fɛɛn min y’i dɛmɛ ka kɛ waajulikɛla ɲuman ye?
2. An be se k’an ka waajulikɛɲɔgɔn jigi sigi cogo di ani mun na a kɔrɔtanin lo an k’o kɛ?
2 A jigi sigi: Weleweledala dɔw lanin tɛ u yɛrɛ la ani o be se ka ye u ɲɛda wala u kumakan cogoya fɛ. An be se k’u jigi sigi an kɛtɔ k’u tando ni kɔnɔgwɛ ye. An be se k’u jigi sigi cogoya wɛrɛ jumanw na tugun? Kɔrɔsibaga tagamakɛla dɔ b’a kɔnɔ gwɛ k’a fɔ a ka waajulikɛɲɔgɔn ye ko siranya ka teli k’ale yɛrɛ minɛ. Nka, a ka teli ka delili kɛ walisa ka see sɔrɔ o gwɛlɛya kan. Balimacɛ wɛrɛ y’a fɔ ko fɛɛn min b’ale jigi sigi, o ye nin ye: “Ne b’a daminɛ ka yɛlɛmisɛn kɛ. Tuma dɔ la, ka se k’o yɛlɛmisɛn dama yɛrɛ kɛ, fɔɔ n’ ka Ala deli fɔlɔ.” Yala fɛɛn dɔ be ele dɛmɛ k’i jigi sigi koɲuman waajuli la wa? O fɔ i ka waajulikɛɲɔgɔn ye.
3. An be se ka mun lo fɔ min be se k’an tɔɲɔgɔn dɛmɛ a ka kɛ waajulikɛla ɲuman ye?
3 Waajulikɛcogo fɛɛrɛ dɔw lakali i tɔɲɔgɔn ye: Mun lo ye i dɛmɛ ka baro daminɛ koɲuman? Yala kuma wala ɲiningali nɔgɔman dɔ lo, wala koo dɔ lo min kɛra kiin kɔnɔ wa? Yiracogo modɛli min dira, yala i y’a yɛlɛma k’a fɔ i yɛrɛ kumacogo la ani a ye mɔgɔw lasun ka i lamɛn wa? N’o lo, o fɔ i ka waajulikɛɲɔgɔn ye (Talenw 27:17). N’aw be tagara viziti kura kɛyɔrɔ, i be se k’a fɔ i tɔɲɔgɔn ye i ka laɲinita ye min ye o viziti kura koo la ani i b’a fɛ k’o dafa cogo min na. Bibulukalan dɔ bannin kɔ, i be se k’a ɲɛfɔ fɛɛn min kama i ye hakilinata, vɛrise wala kalankɛcogo fɛɛrɛ dɔ sugandi walisa ka kalanden dɛmɛ.
4. Mun na an ka ɲi k’a ɲini k’an balimaw dɛmɛ waajuli la?
4 Saan kɛmɛkulu fɔlɔ waajulikɛlaw tun t’a ɲini ka dannabaliw dɔrɔn dɛmɛ. U tun y’a faamu ko nafa b’a la u ka ɲɔgɔn jija ani ka barika don ɲɔgɔn na (Kɛw. 11:23; 15:32). Ciden Pol ye fɔrɔmasɔn di kanbele Timote ma ani a y’a jija ko a ye fɛɛn min degi ale fɛ, a ka tɔɔw kalan o la fana (2 Tim. 2:2). An kana ɲinɛ ka koo ɲuman kɛ an kerecɛnɲɔgɔnw ye waajuli la. O la, dɔ bena fara u ka ninsɔndiya kan ani u bena kɛ waajulikɛla ɲumanw ye. O fana bena a to an koo be diya an sankolola Faa ye.—Eburuw 13:15, 16.