An ka to ka waajuli kɛ kudayi

¹ Tuma dɔ la an be se k’a miiri ko an ye waajuli kɛ ka dafa siɲɛ caaman an ka kiinw kɔnɔ ani tɔnɔ bɛrɛ ma sɔrɔ a la. O bɛɛ n’a ta, kuun bɛrɛbɛrɛ b’a la an ka to ka waajuli kɛ.—Mat. 28:19, 20.

² Walisa k’o kɛ seereya ye: Koo caaman be “diɲɛ laban taamashyɛn” yira. Yesu tun kɔnna k’a fɔ ko Masaya waajuli tun bena kɛ o tagamasiɲɛ yɔrɔba dɔ ye, ani ko a fana tun bena kɛ seereya ye siyaw bɛɛ fɛ (Mat. 24:3, 14). Mɔgɔw mana an ye Masaya kibaro duman waajuli la, o ye seereya barikaman ye. An bɔlen kɔ kiin kɔnɔ, hali ni mɔgɔw ma sɔn k’an lamɛn, an ka waajuli baara be se ka kɛ u dɔw ka barokun ye lɛri wala loon caaman kɔnɔ. N’an b’an ka cidenya baara kuun faamu, o bena an dɛmɛ an k’an timinandiya. N’an b’an seen don Bibulu ka ciraya kumaw dafali la, n’an be seereya kɛ ani ka lasɔmini kumaw lase mɔgɔw ma, an koo be diya Jehova ye.—2 Tes. 1:6-9.

³ An ka kan k’an timinandiya: Mɔgɔw ka ɲɛnagwɛkow ka ca kojugu ani koo caaman b’u ka wagati ta. O kama, an ka kan k’an timinandiya n’an b’a ɲini ka to ka makodon mɔgɔw dɛmɛ. Weleweledala dɔw tora ka taga bɔ muso dɔ fɛ lɔgɔkun o lɔgɔkun fɔɔ saan kelen, muso sɔrɔla k’u bisimila a ka soo kɔnɔ ani ka baro kɛ n’u ye Bibulu kɔnɔkow kan. A ye min mɛn o diyara a ye kosɔbɛ fɔɔ a sɔnna bibulukalan na. A y’a daminɛ ka na lajɛnw na, ani dɔɔni o kɔ a y’a ɲini ka batise.

⁴ Duniɲa ka koow be yɛlɛma joona-joona cogo min na, mɔgɔw fana be ten. Mɔgɔ minw tun be ban Masaya kibaro la fɔlɔ la, n’a sɔrɔ u caaman labilanen lo sisan k’an ka jigitugu kuma lamɛn. Hali ni mɔgɔ kelen dɔrɔn sɔnna Masaya kibaro la, kuun sɔrɔla an ka timinandiya la.

⁵ Duniɲa kuru bɛɛ kɔnɔ, mɔgɔ minw be “ŋunan ka kasi ko haramulen kɛlenw bɛɛ kosɔn” dɔ be farala ka taga olu hakɛ kan (Ezek. 9:4). Tɔnɔ minw be sɔrɔla an ka waajuli la, o b’a yira ko tilennenya kanubagaw be sɔnna Masaya kibaro duman na (Es. 2:2, 3). O kama, an ka to ka waajuli kɛ kudayi, an kɛtɔ k’an timinandiya ni kanuya ye “ka fɛn ɲuman kibaru duman fɔ.”—Es. 52:7; Kɛw. 5:42.