Yala i be se k’i ka porogramu makɛɲɛ wa?

¹ An minw ye kerecɛn lakikaw ye, an sɔnna weeleli ma ka kɛ “mɔgɔ ɲininaw ye” (Mat. 4:19). I n’a fɔ mɔgɔ minɛlaw yɛrɛ-yɛrɛ, an bena na sanga sɔrɔ mɔgɔ minɛli baara la n’an be wagati labɛn ka taga waajuli kɛ tuma min na mɔgɔw be sɔrɔ u ka soo. Tileben tuma na ani fitirida fɛ, mɔgɔ caaman be sɔrɔ u ka soo. Tuma caaman na, u degunnen tɛ, ani u ka teli ka mɔgɔw bisimila. Yala i be se k’i ka porogramu makɛɲɛ walisa ka waajuli kɛ o tumaw la wa?—1 Kɔr. 9:23.

² Suu fɛ waajuli: N’an be labɛn kɛ waajuli kama suu fɛ, o b’an dɛmɛ ka kibaro duman lase mɔgɔ caaman ma (Ntal. 21:5). Kamalenw ni sunguruw be se ka waajuli kɛ lakɔli banni kɔ. Mɔgɔ tɔɔw be se k’o kɛ baara jiginen kɔ. Kitabukalan jɛnkulu dɔw be se labɛn kɛ walisa ka waajuli kɛ lɛri kelen kɔnɔ ka kɔn kitabukalan lɛri ɲɛ.

³ N’an be waajuli kɛ soo ni soo tileben tuma na ani fitirida fɛ, o be se ka kɛ sababu ye an be kuma mɔgɔw fɛ minw tɛ deli ka sɔrɔ soo. Kiin caaman kɔnɔ, waajuli be se ka kɛ fana sirada la ani foroba yɔrɔ wɛrɛw la suu fɛ. Weleweledala caaman y’a ye ko suu fɛ ye wagati fisaman ye ka viziti kuraw kɛ ani ka bibulukalanw daminɛ.

⁴ An ka hakili sɔrɔ: An ka ɲi ka hakili sɔrɔ n’an be waajuli kɛra suu fɛ. Tuma caaman na, a ka fisa an ka waajuli dan fitirida ma, sanni an ka tɛmɛ mɔgɔw fɛ tuma min na n’a sɔrɔ u b’u yɛrɛw labɛnna ka taga la (Fil. 4:5). N’i ye daa dɔ kɔkɔ, i ka lɔ yɔrɔ min na mɔgɔw be se k’i ye, ani i k’a fɔ ka gwɛ i ye mɔgɔ min ye. I ka teliya k’i nakun fɔ. N’i ye daa kɔkɔ wagati dɔ la min ma bɛn, i n’a fɔ denbaya ka domuni kɛwagati, i k’a ɲini ka segi ka na wagati wɛrɛ la. I k’i janto mɔgɔw la tuma bɛɛ.—Mat. 7:12.

⁵ An fana ka ɲi k’an janto farati koow la. N’an be waajuli kɛra fitirida fɛ wala suu konen kɔ, an ka hakili sɔrɔ ka tagama fila-fila wala jɛnkulu fɛ. An ka siraw ta, yeelen be minw na koɲuman, ani an kelen tɛ u kan. Farati tɛ yɔrɔ minw na, an ka waajuli kɛ o yɔrɔw dɔrɔn na. Farati be se ka kɛ yɔrɔ minw na dibi donnen kɔ, an k’an yɛrɛ tanga u ma.—Ntal. 22:3.

⁶ N’an be waajuli kɛ tileben tuma na ani fitirida fɛ, o be se k’a to an be jɛn ka baara kɛ ni kɔrɔsigi ani kudayi piyɔniyew ye (Rom. 1:12). Yala i be se k’i ka porogramu makɛɲɛ walisa k’i sen don a la wa?

[Study Questions]

1. Mun na an ka ɲi k’an ka waajuli porogramu makɛɲɛ?

2. Fɛɛrɛ jumanw be se k’an dɛmɛ ka kibaro duman lase mɔgɔ caamanba ma?

3. Cogo juman na i be se ka waajuli kɛ tileben tuma na ani fitirida fɛ i ka kiinw kɔnɔ?

4. N’an be waajuli kɛra suu fɛ, mun na an ka ɲi ka hakili sɔrɔ, ani k’an janto mɔgɔw la?

5. Waajuli kɛtɔ, cogo juman na an be se k’an yɛrɛw tanga farati koow ma?

6. An be se ka nafa wɛrɛ juman sɔrɔ n’an be waajuli kɛ tileben tuma na ani fitirida fɛ?