I janto i ka miiriyaw la

1. Tile fila lajɛnba nata ka barokun ye juman ye? A ka kalanw labɛnna kuun juman lo kama?

¹ Yesu ye cii di a ka kalandenw ma k’u ka Jehova kanu n’u dusukun bɛɛ ye ani u niin n’u hakili bɛɛ ye (Mat. 22:37, 38). Ɲina ka lajɛnbaw labɛnna walisa k’an dɛmɛ an ka kɛ ni miiriyaw ni dusukun ɲuman ye. An kana ɲinɛ ko an ka tile saba lajɛnba barokun ko “I dusukun kɔlɔsi!” Waajuli baara saan 2013 ka tile kelen lajɛnba barokun ko “I janto i dusukun na.” K’a daminɛ kalo nata la, tile fila lajɛnba minw bena kɛ, u barokun ko “I janto i ka miiriyaw la.” O basiginin lo Matiyu 22:37 kan. O lajɛnba ka kalanw labɛnna walisa k’an dɛmɛ k’an ka miiriyaw sɛgɛsɛgɛ k’a filɛ cogo min na u be se ka diya Jehova ye kosɔbɛ.

2. Kalanw lamɛntɔ, an ka kan ka ɲiningali jumanw jaabiliw ɲini?

² Kalan jumanw lo bena di? Kalanw lamɛntɔ, an ka kan ka ɲiningali nunu jaabiliw ɲini. Olu lo ye hakilinata kunbabaw ye.

• An be se k’an yɛrɛ tanga cogo di ‘adamaden ka miiriyaw’ ma?

• Fɛɛn min be dannabaliw hakili dibi, an be se k’u dɛmɛ k’o bɔ cogo di?

• An b’a fɛ ka kɛ ni miiriya juman lo ye?

• N’an miiricogo ka ɲi, nafa juman be sɔrɔ o la?

• Cogo juman na an be se k’a to Jehova ka an ka miiriyaw yɛlɛma a sago la?

• Furucɛw, furumusow, bangebagaw ni deenw be se ka mun lo kɛ walisa hɛɛrɛ ka sɔrɔ denbaya kɔnɔ?

• An labɛnnin be se ka to cogo di Jehova ka loon kama?

• Ka an hakili sigi baara kama, o kɔrɔ ko di?

• Minw be kalanw sira tagama, olu be nafa jumanw lo sɔrɔ o la?

3. Mun na a ka ɲi an ka na tile fila lajɛnba loon kelen kelen bɛɛ la, ka lamɛnni kɛ bɛrɛbɛrɛ ani ka kalanw sira tagama?

³ Sutana be koo bɛɛ lajɛnnin kɛra walisa k’an ka miiriyaw tiɲɛ (2 Kɔr. 11:3). O kama, an ka kan k’an hakili tanga ani k’an miiricogo kɔrɔsi. Miiriya min be Krista la, o ɲɔgɔn ka kɛ an na. An k’an jija fana duniɲa tilenbali nin kana nɔɔ to an kan (1 Kɔr. 2:16). O kama, i ka labɛn kɛ walisa k’o lajɛnba ka kalanw bɛɛ lamɛn. Lamɛnni kɛ bɛrɛbɛrɛ. Kalan nafamanba min bena di, n’an b’o sira tagama o bena an dɛmɛ an k’an hakili sigi ka Masaya baara kɛ ni kisɛya ye.—1 Piɛrɛ 1:13.