I bena mɔgɔw jaabi cogo di?

1. Mun na an ka kan ka Yesu ladegi ni mɔgɔw ye ɲiningali kɛ an ye?

¹ Yesu tun be mɔgɔw ka ɲiningaliw jaabi bɛrɛbɛrɛ cogo min na, o be mɔgɔw kabakoya hali bi. An ka cidenya baara kɛtɔ, mɔgɔw mana ɲiningali sifa caaman kɛ an ye, a ka ɲi an ka Yesu ladegi.​—⁠1 Piɛrɛ 2:⁠21.

2. Mun lo be se k’an dɛmɛ ka mɔgɔw jaabi bɛrɛbɛrɛ?

² An ka mɛnni kɛ fɔlɔ: Yesu tun b’a janto ɲiningalikɛla ka fɛta la. Tuma dɔw la, a tun be ɲiningali kɛ a tigi ye walisa k’a ka fɛta tigitigi lɔn. Ni mɔgɔ dɔ ko “Yala aw lara Yesu la wa?”, n’a sɔrɔ a tigi b’a fɛ k’a lɔn mun na an tɛ nowɛli seli kɛ. N’an sera k’a lɔn a tigi kɔnɔko ye min ye tigitigi, an be se ka hakili jagabɔ kɛ n’a ye bɛrɛbɛrɛ.​—⁠Luka 10:⁠25-⁠37.

3. Mun lo b’an fɛ min b’an dɛmɛ ka Bibulu ka jaabiliw sɔrɔ minw be mɔgɔ wasa?

³ An ka mɔgɔw jaabi ni Ala ka Kuma ye: Tuma caaman na, a ka fisa an ka baara kɛ ni Bibulu ye ka mɔgɔw jaabi (2 Tim. 3:⁠16, 17; Heb. 4:⁠12). Gafe Comment raisonner ani barokun “ Sujets de conversation bibliques ” min be Traduction du monde nouveau kɔnɔ, u ye fɛɛnw ye minw b’an dɛmɛ ka jaabili bɛnnen di mɔgɔw ma. Hali ni ɲiningalikɛla tɛ Bibulu jati, an be se ka Bibulu ka fɔta dɔw yira a la nɛmɛnɛmɛ. An k’a tigi jija a ka miiri koɲuman Bibulu ka hakilitigiya koo la min ye sanga sɔrɔ kabi galen. An kɛtɔ ka Yesu ladegi, an ka jaabiliw bena kɛ “i ko jiriden bisigi min dilara ni sanu ye k’a bila warijɛ minan kɔnɔ,” o kɔrɔ, kuma ɲuman, nafaman ani danbeman.​—⁠Ntal. 25:⁠11.

4. Tuma juman na a ka fisa an kana a ɲini ka ɲiningaliw bɛɛ jaabi?

⁴ An ka kan ka ɲiningaliw bɛɛ jaabi wa? N’an tɛ ɲiningali dɔ ka jaabili lɔn, an kana maloya k’a fɔ ko “Ne t’a lɔn, nka ne be se ka sɛgɛsɛgɛri kɛ ani ka segi ka na i jaabi.” N’an b’a yira ten ko an b’an seko daan lɔn ani ko an b’an mako don a tigi la, o be se k’a lasun a ka sɔn an ka segi ka na bɔ a ye. N’an y’a kɔrɔsi ko an kɛlɛbaga dɔw lo be ɲiningali kɛ walisa k’a ɲini ka sɔsɔli lawuli, an ka Yesu ladegi an kɛtɔ ka daan sigi o sɔsɔli la (Luka 20:​1-⁠8). O cogo kelen na, ni mɔgɔ dɔ b’a ɲini ka sɔsɔli kɛ k’a sɔrɔ a t’a mako don sɔbɛ la tiɲɛn koo la, an ka daan sigi o baro la ni bonya ye ani an k’an ka wagati kɛ ka mɔgɔ sɔbɛw ɲini.​—⁠Mat. 7:⁠6.

5. Yesu ye ɲɛyirali juman di an ma ɲiningaliw jaabicogo koo la?

⁵ Yesu tun b’a lɔn ko a kɔrɔtalen lo a k’a jigi la Jehova kan walisa ka ‘tiɲɛ seereya kɛ,’ o min fana ye ka mɔgɔ kɔnɔgwɛw ka ɲiningaliw jaabi ( Yuh. 18:⁠37). Nɛɛma lo an fɛ ka Yesu ladegi an kɛtɔ ka mɔgɔw jaabi minw ‘labɛnnen be ka sɔn ɲɛnamaya banbali ma’!​—⁠Kɛw. 13:⁠48, Kibaro Diman, 1994.