An ka Jehova tando seereya fɛ, an ma bɔ min kama
1 Jehova ka baarakɛla kantigimanw be cogoyaw ɲini walisa k’a tando loon o loon (Zab. 96:2, 3; Heb. 13:15). O kɛcogo dɔ ye ka waajuli kɛ n’an ma bɔ a kama. Bi, waleɲumanlɔnya be Jehova batobaga caaman na, sabu, mɔgɔ dɔ ye Masaya kibaro lase u ma o cogo le la.
2 Hali n’an ma bɔ a kama, n’an be seereya di mɔgɔ dɔ ma, o be se ka kɛ sababu ye ka Masaya kibaro lase mɔgɔ wɛrɛw ma fana. Ɲɛyirali fɛ, Yesu ye baro min kɛ ni samarika muso ye Yakuba ka kɔlɔnda la, o y’a to samarika caaman wɛrɛw y’u mako don kibaro duman na ( Yuh. 4:6-30, 39-42). Komi Pol ni Silasi tun be kaso la Filipe, u ye seereya di kasotigi ma. O sen fɛ, o cɛɛ ka somɔgɔw bɛɛ sɔnna tiɲɛn sira la.—Kɛw. 16:25-34.
3 Cogoyaw: Cogoya jumanw b’an fɛ ka seereya kɛ n’an ma bɔ a kama? Dɔw b’a kɛ n’u be sanni kɛra, n’u be foroba bolifɛnw kɔnɔ, wala n’u be dɔgɔtɔrɔw kɔnɔna. Dɔ wɛrɛw b’a kɛ lafiya wagati la baarakɛyɔrɔ la, wala lakɔliso. An mana an ka gafe dɔw bɔ kɛnɛ kan mɔgɔw ɲɛ na, o dɔrɔn yɛrɛ be se k’u dɔw lasun ka ɲiningaliw bila an ye an ka lannakow kan.—1 Piɛre 3:15.
4 A daminɛcogo: Lajɛn dɔ la, saan wolonfila sungurunin dɔ y’a mɛn ko a kɔrɔtalen be bɛɛ ka waajuli kɛ. K’a masɔrɔ sigasiga be ale la. O kama, a tagatɔ sanni kɛyɔrɔ la n’a bamuso ye, a ye kitabunin fila don a ka sakɔsi kɔnɔ. Tuma min na a bamuso tun be sannifɛnw wari sarala, sungurunnin ye kitabunin dɔ kofɔ muso dɔ ye. O muso sɔnna ka kitabunin ta ni dusu diya ye. A bamuso y’a ɲininga cogo juman na a ye jagwɛlɛya sɔrɔ ka kuma o muso fɛ. A ko: “Ne y’a fɔ n’ yɛrɛ ye ko: i labɛn ka taga, wili, taga! Ani n’ tagara!”
5 Walisa ka waajuli kɛ n’an ma bɔ a kama, an bɛɛ ka kan k’o sungurunin ka miiriya sɛnɛ. Mun lo be se k’an dɛmɛ? An ka delili kɛ walisa ka jagwɛlɛya sɔrɔ ka kuma (1 Tes. 2:2). An ka ɲiningali dɔ wala barokun duman dɔ labɛn an hakili la walisa ka baro daminɛ. O kɔ, an ka la a la ko Jehova bena an ka jijali kɛli duga.—Luka 12:11, 12.
6 An be mɔgɔ minw kunbɛn loon o loon, n’an be seereya di u ma, hali n’an ma bɔ o kama, an be Jehova tando. Ani, o be ɲagali lase an ma. N’a sɔrɔ, o bena mɔgɔ dɔ dɛmɛ ka ɲɛnamaya banbali sira ta.