I jija waajuli la!

1. Bi, an ka kan k’an janto Pol ka ladili juman na?

¹ “I ka Ala ka kuma fɔ ka i jija a la.” (2 Tim. 4:2). Mun na Pol ka ladili nin kɔrɔtalen lo kosɔbɛ bi tile la? O kumaw be se ka nɔɔ juman to an ni mɔgɔ wɛrɛw ka ɲɛnamaya kan?

2. Mɔgɔ minw ma kibaro duman mɛn fɔlɔ, mun na an b’an jija sɔbɛ la k’u ɲini?

² Mɔgɔw niinw be farati la: Duniɲa kuru bɛɛ kɔnɔ, mɔgɔ miliyɔn caaman mako b’a la hali bi ka kibaro duman mɛn walisa ka kisili sɔrɔ (Rom. 10:13-15; 1 Tim. 4:16). Waajuli ka teli ka kɛ kiin minw kɔnɔ, mɔgɔ sɔbɛ caaman bele be sɔrɔla yen. N’an be segi ka na loon wɛrɛ la wala wagati wɛrɛ la tile kɔnɔ, an be se ka mɔgɔ wɛrɛ sɔrɔ yen. N’an b’an jija o cogo la, an dusukun tɛna an jalaki foyi la ani mɔgɔ si joli hakɛ tɛna kɛ an kan.—Kɛw. 20:26.

3. Waajuli kɛtɔ, an be se ka hakili sɔrɔ ka baara kɛ n’an ka wagati ye cogo di?

³ Kɔrɔbɔli gwanniman bɛɛ n’a ta, kerecɛn fɔlɔw ye ‘Jerusalɛm bɛɛ fa u ka kalan na.’ (Kɛw. 5:28). Yala an fana cɛɛ sirilen lo ka “mɔgɔw waaju” bɛrɛbɛrɛ o cogo la wa? (Kɛw. 10:42). Waajuli kɛtɔ, yala an be hakili sɔrɔ ka baara kɛ n’an ka wagati ye wa? N’an be balima dɔw kɔnɔna u ka tila u ka viziti kuraw la, yala an b’a bɔ an yɛrɛ la ka kuma tɛmɛbagaw fɛ wa?

4. N’an b’an jija waajuli la, cogo di o b’an dɛmɛ ka to ɲɛɛ na?

⁴ O b’an dɛmɛ an ka to ɲɛɛ na koɲuman: Duniɲa nin laban surunyana kosɔbɛ minkɛ, an ka kan k’an janto ani ka to ɲɛɛ na (1 Tes. 5:1-6). N’an be to k’an ka jigiya kofɔ mɔgɔw ye Masaya koo la, duniɲa ka koow tɛna an degun (Luka 21:34-36). An kɛtɔ ka Jehova ka loon “ɲɛnafilɛ kosɛbɛ,” o b’an lasun an k’an jija tugun waajuli baara la, o min be mɔgɔw niinw kisi.—2 Piɛrɛ 3:11, 12.

5. N’an be bonya la mɔgɔw niinw kan, o b’an jija cogo di waajuli la?

⁵ N’an b’an jija waajuli la, an b’a yira ko an be ni Jehova ka miiriya ye niin koo la: “A t’a fɛ mɔgɔ si ka halaki, a b’a fɛ bɛɛ ka nimisa u ka jurumuw la.” (2 Piɛrɛ 3:9; Ezek. 33:11). O kama, an k’an seko bɛɛ kɛ k’an ka kiin mɔgɔ caaman waaju. An k’o kɛ Jehova tandoli kama!—Zab. 109:30.