Yala see be ne ye ka waajuli kɛ wa?

1. Mun na an man kan k’a miiri ko see t’an ye ka waajuli kɛ?

¹ N’i delila k’i yɛrɛ ɲininga ten, i kana i fari faga! Fɛɛn min b’a to an be se waajuli la, o tɛ kalanbabaw wala an yɛrɛ ka hakilidiya ye. A fɔra Yesu ka kalanden fɔlɔ dɔw koo la ko u tun ye “mɔgɔ gansan kalanbaliw” ye. O bɛɛ n’a ta, u tun ye kibaro duman waajulikɛla setigiw ye sabu u tun jijalen lo ka tugu Yesu ka ɲɛyirali kɔ.—Kɛw. 4:13; 1 Piɛrɛ 2:21.

2. A’ ye Yesu ka kalan kɛcogo dɔw lakali.

² Yesu ka kalan kɛcogo: A ka kalan tun ka nɔgɔ, nafa tun b’a la ani a faamuyali tun man gwɛlɛ. A ka ɲiningaliw, a ka ɲɛyiraliw ani a ka kuma daminɛcogo nɔgɔman tun b’a lamɛnbagaw hakili sama (Mat. 6:26). A tun b’a mako don mɔgɔw la sɔbɛ la (Mat. 14:14). Ka fara o kan, Yesu tun be kuma ni jigisigi ani sebagaya ye sabu a tun b’a lɔn ko Jehova lo ye a ci ani ale lo ye fanga di a ma walisa a ka se k’a ka cidenya baara dafa.—Luka 4:18.

3. Jehova b’an dɛmɛ cogo di an k’an ka cidenya baara dafa?

³ Jehova b’an dɛmɛ: An mako be fɔrɔmasɔn min na walisa ka se ka kibaro duman waaju koɲuman, an ka Karamɔgɔba Jehova b’o di an ma ka tɛmɛ a ka Kuma n’a ka ɔriganisasiyɔn fɛ (Es. 54:13). An be se ka Yesu ka kalan kɛcogo sɛgɛsɛgɛ ani k’a ladegi sabu Jehova y’a to u y’a sɛbɛ k’a mara. Jehova be hakili senu di an ma ani a b’an degi waajuli kɛcogo la kafo ka lajɛnw sababu fɛ ( Yuh. 14:26). Ka fara o kan, a be weleweledala kolɔnbagaw di an ma. Olu be se k’an dɛmɛ an ka se waajuli kɛcogo la koɲuman.

4. Mun na joo b’an fɛ k’a miiri ko see b’an ye ka waajuli kɛ ni tɔɔw ye?

⁴ Joo b’an fɛ k’a miiri ko see b’an ye ka waajuli kɛ, sabu “an ka se bɛ bɔ Ala de la.” (2 Kɔr. 3:5). N’an b’an jigi la Jehova kan ani n’an b’an jija ka baara kɛ bɛrɛbɛrɛ n’a ka labɛn ɲumanw ye, an ka koow bena ‘dafa, an selen kɛwale ɲumanw bɛɛ la.’—2 Tim. 3:17.