Hakilijigi lajɛn kanpaɲi bena daminɛ marisi tile 17nan na

1. Kanpaɲi juman lo bena daminɛ marisi tile 17nan na?

¹ Saan o saan, Hakilijigi lajɛn be sababu di an ma ka Yesu ka saya koo fɔ (1 Kɔr. 11:26). Jehova ye kunmabɔsara di ni kanuya ye. O kama, an b’a fɛ mɔgɔw ka na fara an kan ka mɛnni kɛ o koo la (Yuh. 3:16). Ɲinan, Hakilijigi lajɛn kanpaɲi bena daminɛ samedilon, marisi tile 17nan na. Yala i kɔrɔtɔnin lo k’i seen don o baara la bɛrɛbɛrɛ wa?

2. An be se ka mun lo fɔ ka welelisɛbɛ di mɔgɔw ma?

² An be se ka min fɔ: A ka ɲi an kana kuma caya. An be se k’a fɔ ko: “I ni sɔgɔma! An nana e n’i somɔgɔw weele ka na kooba dɔ la min be kɛ saan o saan. Ɲinan, a bena kɛ awirili tile 5nan na duniɲa kuru bɛɛ kɔnɔ. Kalan dɔ bena di ka bɔ Bibulu kɔnɔ k’a yira Yesu ka saya ye min dafa ani Yesu be min kɛra sisan. Wariko t’a la. O lajɛn bena kɛ yɔrɔ min na ani lɛri min na, o bɛɛ sɛbɛra sɛbɛ nin kan.” Wikɛniw na, n’a bɛnnin lo, an ka zurunaliw fara welelisɛbɛ kan k’u di mɔgɔw ma.

3. An be se ka mɔgɔ caamanba weele cogo di?

³ An ka mɔgɔ caamanba weele: An ka laɲinita ye ka mɔgɔ caamanba weele. O kama i janto ka welelisɛbɛ dɔ di i ka Bibulu kalandenw ma, vizitiw, somɔgɔw, baarakɛɲɔgɔnw, lakɔli filankuruw, i sigiɲɔgɔnw ani i lɔnbaga wɛrɛw ma. Diinan mɔgɔkɔrɔw bena a yira cogo min na o sɛbɛ bena jɛnsɛn kafo ka kiinw bɛɛ kɔnɔ. An be kanpaɲi min kɛ saan o saan ka mɔgɔw weele Hakilijigi lajɛn na, nafa be sɔrɔ o la. Salon, muso dɔ nana Hakilijigi lajɛn na. Mɔgɔ min y’a weele ka na, balima dɔ ko a b’a dɛmɛ k’o tigi sɔrɔ jama cɛma. Nka, muso ko ale tɛ mɔgɔ si lɔn yan ani ko ale ye welelisɛbɛ sɔrɔ Hakilijigi loon yɛrɛ la mɔgɔ dɔ fɛ min tun be tagara soo ni soo sɔgɔmada fɛ.

4. Mun na an ka ɲi k’an seen don ni kisɛya ye kanpaɲi na?

⁴ N’a sɔrɔ mɔgɔ dɔ bena na Hakilijigi lajɛn na sabu e ye welelisɛbɛ dɔ di a ma. Mɔgɔ sɔnna ka na wo, mɔgɔ ma sɔn wo, i bena jijali min kɛ, o yɛrɛ bena kɛ seereya ye. I bena welelisɛbɛ minw di mɔgɔw ma, u bena a yira u la ko Yesu ye Masacɛ barikaman ye sisan. I bena kisɛya min kɛ o baara la, o bena a yira kiinmɔgɔw ni balimaw la ko i be ni waleɲumanlɔnba ye kunmabɔsara koo la. Min yɛrɛ kɔrɔtanin lo ka tɛmɛ o kan o ye ko Jehova ɲɛɛ b’a la.—Kol. 3:15.