Yala i bena bibulukalan daminɛ ni mɔgɔ dɔ ye ɔkutɔburukalo la wa?
1. An bena gafe jumanw lo yira mɔgɔw la ɔkutɔburukalo la?
1 An bena La Tour de Garde ni Réveillez-vous ! lo yira mɔgɔw la ɔkutɔburukalo la. Walisa ka makodon mɔgɔw dɛmɛ, u b’an jija ko an ka sɛbɛnin Yala i b’a fɛ ka tiɲɛn lɔn wa? yira u la ani k’an jija ka bibulukalan daminɛ n’u ye. An be se k’o kɛ cogo di viziti kura kɛtɔ?
2. Ni mɔgɔ dɔ sɔnna zurunaliw la, viziti kura kɛtɔ, an be se ka baara kɛ ni sɛbɛnin Tiɲɛn lɔn ye cogo di walisa ka bibulukalan daminɛ n’a tigi ye.
2 Baara kɛcogo n’o sɛbɛnin ye: I be se k’a fɔ ko: “Ne tun ye zurunali minw di i ma, u be mɔgɔ sifaw bɛɛ jija u ka Bibulu kalan. [Sɛbɛnin Tiɲɛn lɔn di a tigi ma. Ɲiningali minw be sɛbɛ ɲɛɛ fɔlɔ kan, olu yira a la.] Ɲiningali dɔw filɛ minw be mɔgɔ dabali ban. Bibulu b’o ɲiningaliw jaabi. A ka jaabiliw be mɔgɔ wasa. Yala i ma deli k’i yɛrɛ ɲininga u dɔ la wa?” N’a tigi ye ɲiningali dɔw yira, a’ ye u la kelen ka jaabili lajɛ ɲɔgɔn fɛ sɛbɛnin kɔnɔ. Ani, vɛrise minw kofɔra, a’ ye u la kelen kalan. O kɔ, a’ y’a ɲɛfɔ a ye ko aw ye min lajɛ ɲɔgɔn fɛ, o ye Bibulu ka kalanw la kelen lo ye. A’ ye gafe Bibulu ka kalan di a ma. N’a ye gafe kɔnɔnakow lajɛ ani ka sapitiri dɔ sugandi, aw be se k’o sapitiri ka dakun fɔlɔ lajɛ ɲɔgɔn fɛ. Aw be se fana ka gafe dayɛlɛ yɔrɔ min na kunnafoni wɛrɛw be sɔrɔ ka ɲɛsin a tigi ka ɲiningali ma aw ye min lajɛ sɛbɛnin kɔnɔ. Kunnafoniw be sɔrɔ gafe yɔrɔ minw na, o filɛ:
● Yala Ala b’i janto an na tiɲɛn na wa? ( ɲɛɛ 9-11 § 6-10)
● Yala marifakɛlɛw ni tɔɔrɔw bena ban loon dɔ wa? ( ɲɛɛ 12 § 12-13)
● Mun lo be saya kɔ? ( ɲɛɛ 59-60 § 7-8)
● Yala suuw be ni jigiya ye wa? ( ɲɛɛ 71 § 13-15)
● Ne be se ka Ala deli cogo di walisa a ka ne jaabi? ( ɲɛɛ 166-167 § 5-8)
● Ne be se ka hɛɛrɛ sɔrɔ cogo di? ( ɲɛɛ 9 § 4-5)
3. Cogo di an be se bibulukalan daminɛcogo yɛlɛma ka kɛɲɛ ni koow cogoya ye?
3 Nka ni koow cogoya tɛ sira di an ma ka bibulukalan daminɛ ani k’a kɛcogo ɲɛyira ni gafe Bibulu ka kalan ye viziti kura fɔlɔ kɛtɔ, an bele be se ka labɛn kɛ walisa ka segi ka na baro lataga ɲɛ. Ka kɛɲɛ n’a tigi ka mako ye, waajibi tɛ an ka dan ɲiningali kelen ma. An yɛrɛ be se ka segi ka na baro kɛ n’a ye siɲɛ damanin sɛbɛnin kɔnɔkow kan ka sɔrɔ ka gafe kofɔ a ye. An ka baara ɲuman kɛ ni sɛbɛnin ɲuman nin ye ɔkutɔburukalo la walisa ka bibulukalan daminɛ ani ka mɔgɔ kɔnɔgwɛw dɛmɛ u ka “tiɲɛ don.”—Yuh. 8:31, 32.