‘Ala tɔgɔ ka saniya’
1. Tile fila lajɛnba nata barokun ye mun ye? O basiginin be mun lo kan?
1 Duniɲa kuru bɛɛ Masaba Jehova tɔgɔ lara an kan. O ye nɛɛmaba ye an fɛ dɛ! Ala yɛrɛ lo y’a tɔgɔ di an ma. Kabi saan 1931 kɔni, an minw ye Jehova Seerew ye, mɔgɔw b’an faranfasi ka lɔn Jehova tɔgɔ yɛrɛyɛrɛ fɛ (Es. 43:10). Yesu min ye Ala Dencɛ kelenpe bangelen ye, ale ye bonyaba la Ala tɔgɔ kan. A y’a ka kalandenw degi delili min na, a ye Ala tɔgɔ bila o delili yɔrɔ fɔlɔ la (Mat. 6:9). Waajuli baara saan 2012 kɔnɔ, tile fila lajɛnba barokun basiginin lo Yesu ka kumaw kan. O barokun ko: “Ala tɔgɔ ka saniya.”
2. An kɔrɔtɔnin lo ka kalan jumanw lo lamɛn?
2 An bena kalan minw lamɛn: Samedilon, kalan dɔ bena a ɲɛfɔ mun na kudayi cidenya baara ye ɲɛnamaya kɛcogo ye min be mɔgɔ wasa. A kuun ko: “An ka kɛ kudayi cidenya baarakɛlaw ye ka mɔgɔw dɛmɛ u ka Ala tɔgɔ lɔn.” An bena kalankulu nin lamɛn fana: “An k’an janto, an kana a to Jehova tɔgɔ ka tiɲɛ.” A bena an dɛmɛ an kana ben jaan naani dɔw kɔnɔ. Kalan nin fana bena kɛ: “Mun na Ala tɔgɔ ka kan ka saniya?” O kalan bena ɲiningali fila nunu jaabi: Mun lo bena an dɛmɛ an ka waajuli kɛ ni kisɛya ye hali n’a be komi mɔgɔw t’u mako don bɛrɛbɛrɛ? Mun lo bena an dɛmɛ an ka sanga sɔrɔ bɛrɛbɛrɛ an ka cidenya baara la? Dimansilon, kalankulu dɔ kɔnɔ, kalankɛla naani bena an dɛmɛ an k’a faamu cogo min na an be se ka Ala tɔgɔ saniya an ka miiriyaw fɛ, an ka kumaw, an ka koo latigɛninw ani an tagamacogo fɛ. Forobakalan bena diya kosɔbɛ mɔgɔ kuraw ye. A kuun ko: “Jehova bena a tɔgɔba saniya Arimagedɔn loon na.”
3. An be ni nɛɛma juman lo ye, ani lajɛnba kalan bena an dɛmɛ ka mun lo kɛ?
3 Yanni dɔɔni dɔrɔn, Jehova bena wuli k’a tɔgɔ saniya (Ezek. 36:23). Nka sanni o loon ka se, Jehova tɔgɔ senuman ɲɛsinna koo o koo ma, nɛɛmaba dira an ma k’o tɔgɔ lafasa o koow bɛɛ la. An lanin b’a la ko Ala tɔgɔ be an minw kan, tile fila lajɛnba nin bena an kelen kelen bɛɛ dɛmɛ an k’an ka kunkanbara dafa sɔbɛ la.