‘Ala sago ka kɛ’

1. Cidenya baara saan 2012 ka tile kelen lajɛnba barokun ko di? Ani, mun na o barokun bɛnnin lo?

¹ Jehova y’an dan a sagokɛli kosɔn (Jir. 4:11). O kama, kuun tɛ se ka sɔrɔ an ka ɲɛnamaya la n’an t’a ɲini k’o sago lɔn ani k’a kɛ. An be se k’a miiri k’o ka nɔgɔ. Nka a man nɔgɔ sabu an ka kan k’an jogo dɔw kɛlɛ minw b’a to an ka teli ka “farisogo ni miirili sagow kɛ” wala ka “Ala dɔnbaliw sagona kow” kɛ (Efes. 2:3; 1 Piɛrɛ 4:3; 2 Piɛrɛ 2:10). Ni Ala ka dɛmɛ sababu tɛ, farati b’an seen kɔrɔ sabu Sitanɛ bele b’a fɛ ‘k’an minɛ k’an bila a sago kɛli la.’ (2 Tim. 2:26). Cidenya baara saan 2012 kɔnɔ, tile kelen lajɛnba ka kalan bena an kelen kelen bɛɛ dɛmɛ an ka koow kɛ ka kɛɲɛ ni Yesu ka delili modɛli kɔnɔko sabanan ye (Mat. 6:9, 10). O lajɛnba barokun ko: “Ala sago ka kɛ.”

2. U bena ɲiningali jumanw lo jaabi lajɛnba la?

² U bena ɲiningali minw jaabi: Kalan lamɛntɔ i ka ɲiningali nunu jaabiliw ɲini: Ka fara Ala ka kuma lamɛnni kan, mun lo kɔrɔtanin lo fana? Ala sago ye min ye, an be se ka to k’o faamu cogo di? Mun na an ka kan k’a ɲini ka kibaro diiman lase mɔgɔ sifaw bɛɛ ma? Ɲɛnamaya min be mɔgɔ wasa ani kuun b’a la, aw be se k’o sɔrɔ cogo di? Kanbelew ni sunguruw, aw ka kan ka mun lo yira Jehova la? Baraji juman be Ala sago kɛli la? Mun na kɔrɔtɔ b’a la an ka mɔgɔw sabati ani k’u jija?

3. An be se ka nafa sɔrɔ bɛrɛbɛrɛ tile kelen lajɛnba ka kalan na cogo di?

³ I jija ka na o lajɛnba la ani i k’i tulo malɔ kosɔbɛ kalan na. Kalankɛla lonan bena kɛ Betɛli ka lasigiden dɔ ye wala kɔrɔsibaga tagamakɛla dɔ. Sanni kalan ka daminɛ ani a banni kɔ, i kana sigasiga ka kuma n’a ye ani a muso fana ye n’a furunin lo. I ye min mɛn, kana ɲinɛ o kɔ n’i kɔsegira ka taga soo. E n’i ka denbayamɔgɔw ka baro kɛ kalan kan k’a filɛ cogo min na aw be se ka baara kɛ bɛrɛbɛrɛ ka kɛɲɛ ni Ala sago ye.—Yak. 1:25.

4. Mun na a kɔrɔtanin lo an ka Ala sagokɛli kɛ an ɲɛnako fɔlɔ ye?

⁴ Mɔgɔ minw be boliboli u yɛrɛ negelakow nɔfɛ ani u t’a fɛ ka Jehova sago kɛ, yanni dɔɔni dɔrɔn olu bena halaki (1 Yuh. 2:17). O la do, an be Jehova fo kosɔbɛ, ale min ye kalan nin labɛn wagati bɛnnin na walisa k’an dɛmɛ an k’a sagokɛli kɛ an ɲɛnako fɔlɔ ye.