Sababu caaman dira an ma ka Jehova tando
1. Labɛn kura juman bena an dɛmɛ ka “tanuli dɔnkili da” bɛrɛbɛrɛ Jehova ye?
1 Marisikalo tɛmɛnin na, labɛn kura dɔ sigira sen kan. Sababu dira weleweledalaw ma ka kɛ piyɔniye kɔrɔsigiw ye ani ka lɛri 30 kɛ marisi ni awirili kalow la saan o saan ani dan na lɔgɔkun ka kalo la. Ni dan na lɔgɔkun be kalo fila cɛ, minw y’a sugandi ka lɛri 30 kɛ piyɔniye kɔrɔsigi baara la, olu be se ka kalo kelen sugandi o fila cɛ. Kafokulu kɔrɔsibaga be lajɛn min kɛ ni kudayi piyɔniyew ani dan na piyɔniyew ye, piyɔniye kɔrɔsigiw bɛɛ be se k’o lajɛn kuru bɛɛ kɛ n’u ye. O kɔrɔ ko ni see t’an ye ka lɛri 50 kɛ, an bele be se ka “tanuli dɔnkili da” bɛrɛbɛrɛ Jehova ye. An be se ka kɛ piyɔniye kɔrɔsigiw ye siɲɛ naani bɛɛ saan kɔnɔ n’an y’a sugandi ka lɛri 30 kɛ!—Zab. 109:30; 119:171, ABM.
2. Minw ye piyɔniye kɔrɔsigiw ye dan na lɔgɔkun wagati la, olu bena nɛɛma juman sɔrɔ?
2 Dan na lɔgɔkun wagati la: Sisan, mɔgɔ caaman bena se ka kɛ piyɔniye kɔrɔsigiw ye dan na lɔgɔkun wagati la. Olu ni kafokulu kɔrɔsibaga bena se ka waajuli kɛ ɲɔgɔn fɛ ani ka ɲɔgɔn jaa gwɛlɛya (Ɔrɔm. 1:11, 12). Piyɔniye kɔrɔsigi caaman be se ka loon kelen kɔnze ta lɔgɔkun kɔnɔ walisa ka waajuli kɛ ni kafokulu kɔrɔsibaga ye. Piyɔniye kɔrɔsigi dɔw be baloɲini baara la ani u tɛ se ka waajuli kɛ lɔgɔkun kɔnɔ. Olu be se k’a ɲini kafokulu kɔrɔsibaga fɛ n’a be se ka waajuli kɛ n’u ye samedi wala dimansi. Ka fara o kan, piyɔniye kɔrɔsigiw bena se k’u niin don kudayi piyɔniyew ni dan na piyɔniyew ka lajɛn na. O bena kɛ jijali sɔbɛ ye u fɛ dɛ!
3. Mun na Krista saya Hakilijigi wagati ye sababu ɲuman ye an fɛ ka kɛ piyɔniye kɔrɔsigi ye?
3 Marisi ani awirili kalow la: Saan tɛmɛninw na, dɔw tun y’a sugandi ka lɛri 30 kɛ piyɔniye kɔrɔsigi baara la kalo kelen kɔnɔ Krista saya Hakilijigi wagati la. Sisan, u be se k’o kɛ kalo fila kɔnɔ ka “tanuli sarakaw” bɔ Ala ye (Eburuw 13:15, ABM ). Marisi ni awirili kalow bena sababu ɲuman di an ma ka kɛ piyɔniye kɔrɔsigiw ye ani ka dɔ fara an ka waajuli baara kan. Saan o saan, an be kanpaɲi diiman kɛ o kalow kɔnɔ ka mɔgɔw weele u ka na Hakilijigi lajɛn kɛ n’an ye. Ka fara o kan, komi mɔgɔ caaman be dɔ fara u ka waajuli baara kan Hakilijigi lajɛn wagati la, an be se ka baara kɛ ni waajulikɛla caaman ye. Makodon mɔgɔ minw tun nana Hakilijigi lajɛn na, an be kɔsegi ka taga u dɛmɛ tugun ani ka forobakalan kɛrɛnkɛrɛnnin nege don u la. O bɛɛ ye sababuw ye ka piyɔniye kɔrɔsigi baara kɛ. Yala i dusukun bena i lasun k’o kɛ wa?—Luka 6:45.