I jaa sigi ka waajuli kɛ jagokɛyɔrɔw la
1. Mun na an man kan k’an fari faga n’an be siran ka waajuli kɛ jagokɛyɔrɔw la?
1 Yala i be siran ka waajuli kɛ jagokɛyɔrɔw la wa? N’o lo, kana i fari faga sabu hali Pol mako tun b’a la k’a “ja gɛlɛya” ka waajuli kɛ. An do b’a lɔn ko Pol tun tɛ siran ani a tun be waajuli kɛ ni kisɛya ye (1 Tes. 2:2). An ka teli ka gwɛlɛya minw sɔrɔ waajuli kɛtɔ jagokɛyɔrɔw la, an ka ladili nafaman dɔw lajɛ o koo la.
2. Mun na an man kan ka siran ko an bena jagokɛlaw dusu gwan?
2 Jagokɛlaw bena dimi n’i y’u ka baara lalɔ wa? Jagokɛla caaman b’a lɔn k’u be yen mɔgɔw lo kama. O la, mɔgɔ o mɔgɔ mana na, u b’u ka baara lalɔ k’a tigi mako ɲɛ. Tuma caaman na, u bena i minɛ ka ɲɛ sabu u b’a jati ko i ye sannikɛla ye. N’i sawura ka ɲi ani i be mɔgɔw fo ni dusu diya ye, o bena a to u k’i minɛ ka ɲɛ.
3. An be se ka mun lo kɛ walisa an kana sannikɛlaw dusu gwan?
3 Nka, ni sannikɛlaw ka ca do? N’a be se ka kɛ, i ka taga wagati min na mɔgɔw man ca kojugu magazɛnw kɔnɔ, i n’a fɔ u dayɛlɛtuma na. N’i b’a fɛ ka gwɛrɛ patɔrɔn wala sekeretɛri la, i k’a to n’a b’a kelen tuma min na. I k’i ka baro surunya kosɔbɛ.
4. Waajuli kɛtɔ jagokɛyɔrɔw la, an be se ka mun lo fɔ?
4 I ka kan ka mun lo fɔ do? Ni baarakɛlaw ka ca, i ka kuma u ɲɛmɔgɔ fɛ. I be se k’a fɔ ko: “Jagokɛlaw sɔrɔ man di u ka soo kɔnɔ. O lo kama an nana bɔ aw ye aw ka baarakɛyɔrɔ la. Ne b’a lɔn ko aw bolo degunnin lo, o la n’ tɛna kuma caya.” Walisa a kana an jati feerelikɛlaw ye, tuma caaman na a ka fisa an kana bolomafara kofɔ a ye fɔɔ n’ale yɛrɛ b’a fɛ k’a lɔn an ka baara musakaw be sara cogo min na. N’a be se ka kɛ, i ka sira ɲini patɔrɔn fɛ walisa ka kuma dɔɔni baarakɛlaw fɛ fana. I ye min fɔ patɔrɔn ye, o kelen fɔ u ye. N’u dɔ bolo degunnin lo, i ka baro surunya ani i ka sɛbɛnin dɔ di a ma. N’i ma se ka kuma baarakɛlaw fɛ, n’a sɔrɔ i bena sira sɔrɔ ka sɛbɛ dɔw bila u ye u ka lafiɲɛyɔrɔ la wala u ka yɔrɔ wɛrɛ la.
5. Mun na an ka kan k’an jaa sigi ka waajuli kɛ jagokɛyɔrɔw la?
5 Yesu ni Pol y’u jaa sigi ka mɔgɔw waaju u ka baarakɛyɔrɔw la. E fana be se k’o ɲɔgɔn kɛ (Mat. 4:18-21; 9:9; Kɛw. 17:17). A ɲini Jehova fɛ a k’i dɛmɛ i k’i dusu suman ani k’i jaa gwɛlɛya ka kuma mɔgɔw fɛ (Kɛw. 4:29). Mɔgɔw tɛ fɔn jagokɛyɔrɔw la. O la, a ɲini ka waajuli kɛ yen sabu nafa b’a la.