Seereya kɛ ka dafa

1. Ciden Pol ye ɲɛyirali ɲuman juman di an ma waajuliko ta fan fɛ?

¹ “I ka baara bɛɛ kɛ ka dafa.” (2 Tim. 4:5) Joo tun be ciden Pol kɔni fɛ k’o ladili di Timote ma. Saan 47 ni 56 cɛ, ale yɛrɛ tun ye tagama kɛ siɲɛ saba a ka cidenya baara la. Kɛwalew ka kitabu b’a fɔ siɲɛ caaman na ko Pol ye “seereya kɛ ka dafa.” (Kɛw. 23:11; 28:23, NW). Bi, an be se ka Pol ladegi cogo di?

2. Waajuli kɛtɔ soo ni soo, an be se ka seereya kɛ ka dafa cogo di?

² Soo ni soo: Mɔgɔ minw ma kibaro diiman mɛn fɔlɔ, n’an b’a fɛ k’u sɔrɔ u ka soo fɔɔ an ta ka taga bɔ u ye wagati wɛrɛ la. N’a sɔrɔ gwatigiw be sɔrɔ u ka soo sufɛ wala wikɛni tuma na. An ka kan k’an jija ka kuma mɔgɔ dɔ fɛ soo kelen kelen bɛɛ kɔnɔ. Minw tɛ yen u ka soo, an ka segi ka na u yɔrɔ filɛ siɲɛ caaman na. Nka i ka jijali bɛɛ n’a ta, n’i ma mɔgɔ si sɔrɔ do? N’a sɔrɔ i bena se k’u sɔrɔ n’i ye lɛtɛrɛ dɔ ci u ma wala n’i y’u weele telefɔni na.

3. Sababu juman be e fɛ ka seereya kɛ forobayɔrɔw la ani sababu dɔw sen fɛ?

³ Forobayɔrɔw la ani sababu dɔw sen fɛ: Minw bɛɛ be sɔn ka lamɛnni kɛ u fɛ, Jehova Seerew b’u dɛmɛ ka “hakilitigiya” sɔbɛ sɔrɔ. Tuma dɔw la, u be kuma u fɛ “fɛrɛkɛnɛw [siradaw]” yɛrɛ la wala “jamaba lajɛ yɔrɔw la” (Ntal. 1:20, 21). K’an to an ka loon o loon baaraw la, yala an b’an jija ka seereya kɛ mɔgɔw ye wa? Yala a be se ka fɔ an ma ko an ɲɛɛ gwannin lo kuma na ni mɔgɔw ye wa? (Kɛw. 18:5). N’an b’o kɛ, o b’a yira ko cii min dira an ma ka seereya kɛ bɛrɛbɛrɛ, an b’o dafara.—Kɛw. 10:42; 17:17; 20:20, 21, 24.

4. Delili ni miirili be se k’an dɛmɛ cogo di ka seereya kɛ ka dafa?

⁴ Nka tuma dɔw la, an be se ka sigasiga ka seereya kɛ an ka fiyɛn dɔ kosɔn wala siranya kosɔn. Siga t’a la, Jehova b’an faamu (Zab. 103:14). Nka n’an y’o sababu ɲɔgɔn sɔrɔ, an ka Jehova deli a k’an jaa gwɛlɛya walisa an ka se ka kuma (Kɛw. 4:29, 31). Ka fara o kan, n’an be kelenna kalan kɛra ani n’an be miirila Ala ka Kuma kan, an k’a ɲini ka kibaro diiman nafa faamu ka ɲɛ (Fil. 3:8). O bena an lasun an ka kibaro diiman fɔ ni kisɛya ye.

5. An be se k’an seen don Joɛl ka kiraya kuma dafani koo la cogo di?

⁵ Joɛl ka kiraya kuma b’a yira ko sanni Jehova ka jatigɛlonba ka se, Ala sagokɛlaw bena “taa u ka siraw fɛ”, u tɛna a to foyi k’u bali ka waajuli kɛ (Joɛl 2:2, 7-9). Waajuli baara nin ɲɔgɔn tɛna kɛ ka ye tugun abada. O kama, an k’an seko bɛɛ kɛ a la!