An ka seereya kɛ ka dafa ni kisɛya ye
1 I ko Yesu ani fɔlɔfɔlɔ ka baarakɛla kantigimanw, ciden Pol tun be kibaro duman waaju ni kisɛya ye. Koow cogoya bɛɛ n’a ta, a tun be seereya kɛ ka dafa. Hali tuma min na u tun y’a bali a ka bɔ a ka soo, “mɔgɔ o mɔgɔ taara bɔ a ye, a ye olu bɛɛ ladon. A tun bɛ waajuli kɛ Ala ka masaya ko la, ka mɔgɔw kalan Matigi Yesu koo la ni jagɛlɛya ye.”—Kew. 28:16-31.
2 An fana be se ka kisɛya, an kɛtɔ ka seereya kɛ ka dafa tuma bɛɛ. Tile saba lajɛnba “A’ ye nɔɔrɔ la Ala kan” be cogoya di an ma k’o kɛ: an tagatɔ yen, an segitɔ, wala o dugu kɔnɔ, an be mɔgɔ minw kunbɛn, an ka seereya di u ma.—Kew. 28:23; Zab. 145:10-13.
3 Sen fɛ seereya ye mun ye? Sen fɛ seereya tɛ bari ka na a yɛrɛma, komi n’a ŋaniya tun t’an na, n’an m’a labɛn a kama, wala n’a kɔrɔtalen tɛ bɛrɛbɛrɛ an ɲɛ na. O lakalita ma bɛn an ka cidenyabaara ma, sabu, i n’a fɔ Pol, a kɔrɔtalen be an ɲɛ kɔrɔ ka nɔɔrɔ la Ala kan an ka seereya sen fɛ. Koow cogoya mana bɛn, an ka kan k’a ɲini ka seereya di mɔgɔw ma n’an be tagama na ɲinan. Nka an be magwɛrɛ mɔgɔw la cogo min na, o be se ka jati i ko sen fɛ seereya, sabu an ma labɛn ka bɔ o le dɔrɔn kama tigitigi. O kɛcogo be se ka den koɲuman.
4 I labɛn ka seereya kɛ: Tuma min na a tun be ɔrɔmu ani u y’a bali a ka bɔ, Pol ye cogoyaw ɲini ka seereya kɛ. K’a to a ka luwanse la, a y’a bɔ a yɛrɛ la ka yahutuw ka kuntigiw weele ka na a ka boon kɔnɔ (Kew. 28:17). Hali ni kerecɛnya kafo dɔ tun be yen ɔrɔmu, Pol bɔra a kalama ko yahutuw ka jɛkulu tun tɛ bɛrɛ lɔn kerecɛnw ka lanaya koo la (Kew. 28:22; Rom. 1:7). A ma sigasiga ka “seereya kɛ ka dafa” Yesu koo la, ani Ala ka Masaya koo la.
5 I ka tagama kɛtɔ, i bena mɔgɔ minw bɛɛ kunbɛn, i ka miiri u koo la. U caaman tɛ bɛrɛ lɔn Jehova Seerew koo la. N’a sɔrɔ u yɛrɛ t’a lɔn k’an be bibulukalan di mɔgɔw ma gwansan. I be mɔgɔ minw kunbɛn tagama kɛtɔ, lafiya yɔrɔw la, esansi tayɔrɔ, magazɛnw na, lotɛli la, ɛrɛsitoran na, taransipɔriw kɔnɔ, ani yɔrɔ wɛrɛ, i ka kɔrɔsili kɛ walisa ka seereya di u ma. I bena baro ladon cogo min na ani ka seereya di ka surunya, kɔn k’o latigɛ. Loon nataw la, i be se k’i dege o kɛcogo la n’i be sen fɛ seereya di i sigiɲɔgɔnw ma, i somɔgɔw, i baarakɛɲɔgɔnw, ani i lɔnbaga wɛrɛw ma.
6 I mako bena kɛ gafe dɔw la walisa ka sen fɛ seereya kɛ. O jumanw? I be se ka baara kɛ ni sɛbɛnin Aimeriez-vous en savoir plus sur la Bible ? Dakun 1-5nan yira. U b’a ɲɛfɔ fɛɛn min kama an ka kan ka Bibulu kalan. Kupɔn yira sɛbɛnin kɔ kan. O be mɔgɔ lasun ka bibulukalan sarabali deli. Ni mɔgɔ dɔ y’a mako don baro la, i ka kitabunin Ɲini kofɔ a ye. N’a sɔrɔ i bena kaan wɛrɛ fɔbaga dɔw kunbɛn. O kama, i ka gafenin Une bonne nouvelle pour toutes les nations ta i bolo. A ɲɛɛ 2nan b’a ɲɛfɔ cogo min na baara be kɛ n’o gafenin ye walisa ka seereya di mɔgɔw ma. N’i be mobili kɔnɔ, i be se ka gafe wɛrɛw ta i kun walisa k’u di mɔgɔw ma, minw b’u mako sɔbɛ don Masaya cira la.
7 I janto i sawura n’i tagamacogo la: An ka kan k’an janto ko an tagamacogo ani an fani doncogo n’an kuun masiricogo fana tɛna nɔɔ jugu to mɔgɔw kan, wala o tɛna u lasun ka Jehova ka ɔriganisasiyɔn ‘tɔgɔ jugu fɔ’ (Kew. 28:22, NW ). O ma ɲɛsin lajɛnba wagati dɔrɔn ma. An ka jantoli kɛ fana tuma min na an be tagama na, wala an be lafiyara lajɛnba banni kɔ. Saan 2002, utikalo tile 1nan ka La Tour de Garde ɲɛɛ 18nan, dakun 14nan tun y’an lasɔmi ko: “An sawura man kan ka kɛ yɛrɛyira ye, faamuyabali, darabɔli, farikolo yirali wala sangawili koo ye. Ka fara o kan, an ka fani doncogo ka kan k’a yira ko an be “siran Ala ɲɛ.” O b’an lasun an ka miirili kɛ dɛ. Tiɲɛn tɛ wa? Kun t’a la an ka fani don ka ɲɛ ka taga kafo ka lajɛnw na [wala lajɛnbaw la], ani o kɔ, an k’an yɛrɛw labila ka cɛjuguya wagati tɔɔw la. An sawura ka kan k’a yira tuma bɛɛ ko an be bonya la Ala kan, sabu an ye kerecɛn cidenw ye sanga ni wagati bɛɛ.”—1 Tim. 2:9, 10.
8 An ka kan ka fani don ni yɛrɛmajigilenya ni danbe ye. N’an sawura n’an tagamacogo bɛnnen be an ka lannakow ma tuma bɛɛ, an tɛna sigasiga abada ka sen fɛ seereya di mɔgɔw ma sabu an ka fani doncogo dagalen tɛ.—1 Piɛre 3:15.
9 Sen fɛ seereya be den: Pol ye saan fila minw kɛ ɔrɔmu, a y’a ye ko a ye jijali minw kɛ ka seereya di mɔgɔw ma, tɔnɔ ɲuman sɔrɔla o la. Luka y’a lakali ko “dɔw sɔnna Paul ka kumaw ma.” (Kew. 28:24). Pol ye “seereya” min “kɛ ka dafa”, ale yɛrɛ y’a jati ko nafa bɛrɛbɛrɛ sɔrɔla o la. A y’a sɛbɛ ko: “Ko minnu kɛra ne la, olu kɛra Kibaru Duman ɲɛfɛ taali sababu ye, u ma a bali. Ayiwa, kube mɔgɔw bɛɛ ani mɔgɔ tɔw bɛɛ b’a dɔn ko ne bɛ kaso la Krisita kosɔn. Balima caman jigi dara Matigi kan ne ka kasola bilali kosɔn, u ja gɛlɛyara kosɛbɛ ka Ala ka kuma fɔ ni siran tɛ.”—Filip. 1:12-14.
10 Salon, tile saba lajɛnba ka kalan dɔ banni kɔ, balimacɛ dɔ n’a muso ye sen fɛ seereya di muso dɔ ma. O muso tun b’u ɲiningara lajɛnba tagamasiɲɛ sɛbɛw koo la. U ye lajɛnba kofɔ a ye. Bibulu be min fɔ siniɲasigi koo la, u y’o fana ɲɛfɔ a ye. U ye sɛbɛnin Aimeriez-vous en savoir plus sur la Bible ? di a ma, ani u ye bibulukalan sarabali kofɔ a ye. O muso y’a fɔ ko a b’a fɛ mɔgɔ dɔ ka na bɔ a ye. Kupɔn min be sɛbɛnin kɔ kan, a y’o dafa: a y’a tɔgɔ n’a ka ladɛrɛsi sɛbɛ. Ani, a y’a ɲini balimacɛ n’a muso fɛ u ka labɛn kɛ walisa ale ka dɛmɛ sɔrɔ. Ɲinan, ile bena tɔnɔ ɲuman juman sɔrɔ, i kɛtɔ ka “seereya kɛ ka dafa” ni kisɛya ye?
11 An k’an seko bɛɛ kɛ walisa kibaro duman ka yiriwa: I miiri cogo min na Pol ɲagalila k’a ye ko a balimaw b’ale ka kisɛya ladegera! An kɛtɔ ka ɲinan ka tile saba lajɛnba diya bɔ, an k’an seko bɛɛ kɛ ka kibaro duman yiriwa. An k’o kɛ sen fɛ seereya fɛ n’an b’an ka lannakow ɲɛfɔ mɔgɔw ye.
[Study Questions]
1, 2. Pol tun be kibaro duman waajuli jati cogo min na, mun lo b’i kabakoya o la? Ani, cogo di an be se k’a sennɔ ta ka “seereya kɛ ka dafa”?
3. An be se ka mun lo kɛ walisa an ka sen fɛ seereya kana yɛlɛma ka kɛ jijali gwansan dɔrɔn ye an fɛ?
4. Mun lo ye Pol dɛmɛ ka seereya di mɔgɔw ma a ka luwanse boon na?
5, 6. Cogoya jumanw b’an fɛ ka seereya kɛ sen fɛ? Ani, an be se k’an labɛn cogo di walisa k’o kɛ bɛrɛbɛrɛ?
7, 8. Ka taga an sawura ani fani doncogo fan fɛ, an ka kan k’an janto lasɔmini juman na n’an be tagama na, wala lafiya wagati la?
9. Pol ye seereya min di ɔrɔmu, mun lo sɔrɔla o la?
10. Salon, cɛɛ dɔ n’a muso ye tɔnɔ juman sɔrɔ u kɛtɔ ka seereya kɛ?
11. An ka kan ka jogo jumanw sɛnɛ walisa ka kibaro duman yiriwa ɲinan n’an be ‘seereya kɛra ka dafa’?
[Picture on page 3]
An mako be gafe minw na walisa ka sen fɛ seereya di
■ Aimeriez-vous en savoir plus sur la Bible ? (sɛbɛnin)
■ Ala be mun ɲini an fɛ? (kitabunin).
■ Une bonne nouvelle pour toutes les nations (gafenin).
■ Gafe wɛrɛw
[Picture on page 4]
Kana ɲinan u kɔ!
Jɔn kɔ? Mɔgɔ minw bɛɛ b’u mako don tiɲɛn koo la, ani u nana Kirista saya hakilijigi seli la, wala dan na foroba kalan na. Yala an y’u weele ka na tile saba lajɛnba nata la ɲinan wa? N’a sɔrɔ u caaman bena na n’an b’u jagwɛlɛya ni teriya ye. U bena jɛnɲɔgɔnya ɲuman ni hakilimaya kalan sɔrɔ, kalan min be mɔgɔ jagwɛlɛya. O la, u bena magwɛrɛ Jehova n’a ka ɔriganisasiyɔn la. Mun na i tɛ welekan lase u ma k’a filɛ? U mako be kunnafoni misɛn minw na, an k’u bɛɛ di u ma, i n’a fɔ lajɛnba loonw, sira min be taga yen, kalan be daminɛ lɛri min na, ani a ban tuma, ani kalan hakilinata kunbaba minw be sɔrɔ Réveillez-vous ! kɔ kan (saan 2003, zuwɛnkalo ta).