Hakilijigi lajɛn kanpaɲi bena daminɛ marisi tile fɔlɔ la — Watchtower ka BIBLOTƐKI ƐNTƐRƐNƐTI KAN

Hakilijigi lajɛn kanpaɲi bena daminɛ marisi tile fɔlɔ la

1. Tuma juman na an bena kanpaɲi daminɛ ka mɔgɔw weele ka na Hakilijigi lajɛn na? Mun na ɲinan ta bena mɛɛn?

¹ An be kanpaɲi min kɛ saan o saan ka mɔgɔw weele ka na Hakilijigi lajɛn kɛ n’an ye, o bena daminɛ jumalon marisikalo tile fɔlɔ la. Hakilijigi lajɛn bena kɛ marisi tile 26nan loon na. O kɔrɔ ko kanpaɲi bena mɛɛn dɔɔni ka tɛmɛ saan tɛmɛninw ta kan. O bena sababu di mɔgɔ caaman ma u ka welelisɛbɛ dɔ sɔrɔ, sanko yɔrɔ minw na kafo ka kiinw ka ca.

2. Labɛn juman lo kɛra walisa an ka welelisɛbɛw sɔrɔ k’u jɛnsɛn kiinw kɔnɔ?

² I yɛrɛ labɛn: Diinan mɔgɔkɔrɔw bena a yira cogo min na o welelisɛbɛ bena jɛnsɛn kafo ka kiinw bɛɛ kɔnɔ. U bena a fɔ fana ni welelisɛbɛ ka kan ka to mɔgɔw ye minw tɛ yen u ka soo. Ni welelisɛbɛw dira mɔgɔw ma soo ni soo kafo ka kiinw bɛɛ kɔnɔ ani u tɔɔ tora, an be se k’u tilan tilan ka di forobayɔrɔw la. Lajɛn kɛyɔrɔ n’a lɛri sɛbɛra welelisɛbɛ minw kan, waajulibaara kɔrɔsibaga ka kan k’a janto k’o hakɛ dɔ bila zurunaliw wala gafew ta yɔrɔ la. Nka, welelisɛbɛw bɛɛ tɛna cɛ ka bila siɲɛ kelen. An mako be welelisɛbɛ hakɛ min na lɔgɔkun kelen kɔnɔ, an ka kan k’o dɔrɔn lo ta.

3. An ka kan ka mun lo to an hakili la n’an be welelisɛbɛw dira mɔgɔw ma?

³ Welelisɛbɛ yiracogo: A ka ɲi an kana kuma caya. O la, an bena se ka welelisɛbɛ di mɔgɔ caamanba ma. Yiracogo modɛli dɔ be sɔrɔ ɲɛɛ 4nan kan. An be se k’a fɔcogo yɛlɛma ka kɛɲɛ an ka kiinw cogoya ma. Nka, ni lamɛnnikɛla y’a mako don wala ni ɲiningaliw b’a fɛ, waajibi tɛ an ka kuma wasa wasa ani ka taga k’a to yen. Wikɛniw na, n’a bɛnnin lo, an ka zurunaliw fara welelisɛbɛ kan k’u di mɔgɔw ma. Marisi tile 2nan loon na, sanni an k’a ɲini ka bibulukalanw daminɛ ni mɔgɔw ye, welelisɛbɛw jɛnsɛnnin lo bena kɛ an ɲɛnako fɔlɔ ye.

4. Mun na an ka kan k’an seen don bɛrɛbɛrɛ kanpaɲi na?

⁴ An jigi b’a la ko mɔgɔ caaman bena na fara an kan Hakilijigi lajɛn na. Kalan bena a ɲɛfɔ Yesu ye mɔgɔ tigitigi min ye (1 Kɔr. 11:26). A bena a fɔ an ye cogo min na Yesu ka saya b’an nafa (Rom. 6:23). Kalan bena a yira fana fɛɛn min kama a kɔrɔtanin lo an k’an hakili jigi Yesu koo la (Yuh. 17:3). An bɛɛ k’an seen don bɛrɛbɛrɛ o kanpaɲi na!