An ka segi ka taga bɔ mɔgɔw ye, minw bɛɛ y’u mako don hali dɔɔni
1 N’an caaman be tiɲɛn sira kan bi, o y’a sɔrɔ mɔgɔ dɔ lo y’a kɔrɔsi ko an y’an mako don Masaya kibaro la, ani a tigi segira ka na an dɛmɛ ni muɲuli ye (n’a sɔrɔ siɲɛ caaman na). O cogo kelen na, an ka kan k’an sɔbɛ don ka segi ka taga bɔ mɔgɔw ye, minw bɛɛ y’u mako don hali dɔɔni. Cii dira an ma ka mɔgɔw kɛ Krista ka Kalandenw ye. Tiɲɛn na, viziti kuraw ye o cii faan dɔ ye.—Mat. 28:19, 20.
2 Makodon lɔn cogo: Hali ni mɔgɔ dɔ ma sɔn ka gafe dɔ ta, a tigi ɲɛda cogo, n’a kumakan cogo, wala a ka kumadenw be se k’a yira ko a y’a mako don Masaya kibaro la, hali ni dɔɔni lo. O be se ka kɛ sababu ye an fɛ ka taga bɔ a ye. Balimacɛ dɔ segira ka taga bɔ cɛɛ dɔ ye lɔgɔkun looru ka tugu ɲɔgɔn kɔ, n’a ma se ka gafe si to o cɛɛ ye. Viziti wɔɔrɔnan na, o tigi sɔnna ka gafe dɔ ta, ani a laban na, bibulukalan daminɛna.
3 N’i y’a ye ko mɔgɔ dɔ y’a mako don, i kana a bila ka suma. I ka segi ka taga bɔ a ye, n’a sɔrɔ tile damanin tɛmɛnen kɔ. I kana sira di “Sitanɛ” ma a ka na o kuma mɛnnen wɔgɔbi ka bɔ a tigi kɔnɔ (Mat. 13:19). N’i tun ye labɛn kɛ ko i bena segi ka na loon tigitigi dɔ la, i ka kantigiya kɛ ka segi ka taga.—Mat. 5:37.
4 Sirada la waajuli baara: Waajuli kɛtɔ sirada la wala sababu dɔ sen fɛ, ni mɔgɔ dɔ y’a mako don, yala i b’i jija k’o tigi dɛmɛ tugun wa? Baro laban na, i be se k’a fɔ ko: “An ka baro nin diyara ne ye. Ne be se k’i sɔrɔ min walisa an ka taga ɲɛ n’a ye?” N’a bɛnnen be, weleweledala dɔw be se k’u ka telefɔni nimɔrɔ di a tigi ma. U fana be se k’a ɲini k’a tigi ta sɔrɔ. Mɔgɔw tɛna sigasiga k’u ka telefɔni nimɔrɔ wala ladɛrɛsi di i ma n’u be to k’i ye waajuli la sirada la yɔrɔ kelen na. Hali n’u t’a fɛ k’u ka telefɔni nimɔrɔ wala ladɛrɛsi di i ma, i be se k’a ɲini ka kibaro duman nege don u la tugun n’i ye u kunbɛn siɲɛ wɛrɛ sirada la.
5 N’an ye flɛru turu k’u sɔn, u mana feeren bɔ, an be ɲagali. O cogo kelen na, an be se ka ɲagali kosɔbɛ n’an be viziti kuraw kɛ ka mɔgɔw dɛmɛ u ka ɲɛtaga sɔrɔ Alako ta fan fɛ (1 Kɔr. 3:6). O kama, I k’a laɲini ka segi ka taga bɔ mɔgɔw ye, minw bɛɛ y’u mako don hali dɔɔni.