Hakilijigiko minw ɲɛsinna tile saba lajɛnba ma
Kalan kɛlɛriw: Boon daaw bena yɛlɛ 8H00 wagati la. Loon saba bɛɛ la, miziki bena daminɛ 9H20. O wagati la, an bɛɛ ka kan ka sigi walisa kalan ka daminɛ cogo bɛnnin na. Juman ani samedi loonw, porogramu bena ban 17H00 fan fɛ. Dimansi ta bena ban 16H00 fan fɛ.
Jehova “tanu ni dɔnkili ye”: Galen, Ala sagokɛlaw tun b’a tando ni dɔnkiliw ye. Bi fana, dɔnkiliw kɔrɔtanin lo tiɲɛn batoli la (Zab. 28:7). An ka tile saba lajɛnbaw la, an be kɔn ka miziki dɔ lamɛn sanni kalan ka daminɛ sɔgɔma ni wulafɛ. O tɛ miziki diiman gwansan ye, nka a labɛnna walisa an ka kalan sɔrɔ Jehova koo la ani k’a bato. O kama ni kalankɛla ɲɛbila y’a fɔ ko miziki bena daminɛ, an ka kan ka sigi ani ka miziki lamɛn koɲuman sanni ka to baro la. N’an y’o kɛ, o b’a yira ko an be Watchtower ka ɔrkɛsi mɔgɔw waleɲuman lɔn u ka baara kosɔn. Siɲɛ fila saan o saan, o balimaw yɛrɛ lo be u ka taransipɔri sara ka na Patɛrsɔn (Niyɔriki mara la) walisa ka miziki diimanw labɛn an ka ninsɔndiya kama. Miziki lamɛnni kɔ, an bɛɛ ka ɲi k’an kaan fara ɲɔgɔn kan ka Jehova tando ni Masaya dɔnkiliw ye.
Bolifɛnw bilayɔrɔ: Lajɛnba minw bɛɛ la balimaw lo be mɔgɔw ka bolifɛnw kɔrɔsi, wari tɛ minɛ mɔgɔw fɛ. Bolifɛn bilayɔrɔ bena di mɔgɔw ma ka kɛɲɛ n’u na wagati ye. Komi bolifɛnw bilayɔrɔ man bon kojugu, a ka fisa aw ka jɛn ni dɔw ye ka bolifɛn kelen ta. Mɔgɔ minw ka bolifɛn plaki nimɔrɔ wala sɛbɛ dɔ b’a yira k’u ye namaraw ye, olu dɔrɔn lo be se k’u ka bolifɛnw bila namaraw ka bolifɛnw bilayɔrɔ la.
Sigiyɔrɔ marali: Loon o loon, ni lajɛnba kɛyɔrɔ daa yɛlɛla, aw ye sabari aw kana a ɲini ka girin ka don tɔɔw ɲɛ walisa ka sigiyɔrɔ ɲini aw diyanye yɔrɔ la. An k’an janto tɔɔw la. An k’an yɛrɛ saraka an balimaw nafa kosɔn. O lo b’a yira ko an ye kerecɛn sɔbɛw ye ani o be mɔgɔw lasun ka Ala tando (Zan 13:34, 35; 1 Kor. 13:5; 1 Piyɛri 2:12). Aw ni minw be soo kelen kɔnɔ wala bolifɛn kelen kan ani aw be bibulukalan kɛra ni minw ye, aw be se ka sigiyɔrɔw mara olu dɔrɔn lo ye. Aw ma sigiyɔrɔ minw mara, aw kana minanw bila u kan. Ni aw b’aw janto o la, o bena a to mɔgɔ wɛrɛw k’a ye k’o sigiyɔrɔw labilanin lo. Sigiyɔrɔ dɔw marala mɔgɔkɔrɔbaw ni namaraw ye dan na. Minw be o ɲɔgɔnna mɔgɔw ladon yɛrɛ yɛrɛ la, olu la mɔgɔ kelen wala fila dɔrɔn lo be se ka sigi u gɛrɛfɛ sabu sigiyɔrɔw man ca o yɔrɔ la.
Fani doncogo bɛnnin: An ka lajɛnba tuma na, an ka ɲi ka fani don cogo bɛnnin na min b’a yira ko an majiginin lo. An man kan ka tugu duniɲamɔgɔw ka fani doncogow kɔ minw man ɲi (1 Tim. 2:9). An kana an yɛrɛ labila kojugu wala ka fani don cogo ferekenin na wagati nunu na: n’an be donna ani n’an be bɔra lotɛli la, lafiɲɛ tuma na lajɛnba yɔrɔ la. O la, a bena kɛ kunkɔrɔta ye an fɛ ka lajɛnba tagamasiɲɛ sɛbɛ to an ka faniw kan. An fana tɛna maloya ka seereya kɛ n’an ye sababu sɔrɔ. N’an sawura n’an tagamacogo ka ɲi lajɛnba tuma na, o bena a to Bibulu ka kibaro ka diya mɔgɔ kɔnɔgwɛw ye. O kibaro do be mɔgɔ kisi. Nka, o dɔrɔn tɛ dɛ! O fana bena Jehova dusu diya.—Sof. 3:17.
An ka ɲi ka min kɛ ni telefɔni selilɛri n’a ɲɔgɔnnaw b’an fɛ: Lajɛn tuma na, an b’a yira ko an be ni kɛcogo ɲuman ye n’an b’an ka telefɔni selilɛri n’a ɲɔgɔnnaw labɛn walisa u kana tɔɔw hakili ɲagami. N’an be baara kɛra ni fototalan, kamera, tablɛti wala u ɲɔgɔnnaw ye, an ka ɲi k’an janto tɔɔw la. An kana u hakili ɲagami wala k’u bali ka filɛri kɛ tintin kan. An b’a yira ko an be ni kɛcogo ɲuman ye kalan tuma na, n’an tɛ SMS wala E-mail ci k’a sɔrɔ kuun bɛrɛ t’o la.
Tilera dumuni: A’ ye na ni tilera dumuni ye aw bolo sanni aw ka bɔ ka taga a yaala kɛnɛma kalan banni kɔ midi. Aw be se ka aw ka dumuni mara minan fitinin dɔ kɔnɔ sigilan jukɔrɔ. Minanbabaw ni butelifɛnw daganin tɛ lajɛnba yɔrɔ la.
Niliw: Lajɛnba yɔrɔ la, an be se k’an ka waleɲumanlɔn yira an kɛtɔ ka nili kɛ duniɲa kuru bɛɛ baara kama. Minw be tɛmɛ sɛkiw fɛ ka nili kɛ lajɛnba la, u ka kan k’o sɛkiw kɛ “Association les Témoins de Jéhovah du Burkina Faso” tɔgɔ la.
Banakow: N’i be to ka fura dɔw ta, kana ɲinɛ ka na n’u ye lajɛnba yɔrɔ la sabu dɔ tɛna sɔrɔ o yɔrɔ la. Sukaro bana be minw na, olu b’u yɛrɛ sɔgɔ ni biɲɛ minw ye, u ka ɲi k’u fili faratifɛnw filiyɔrɔ la. U man ɲi k’u fili ɲamaɲama tɔɔw filiyɔrɔ la lajɛnba yɔrɔ la wala lotɛli la.
An yɛrɛ tangacogo faratiw ma: A’ ye aw yɛrɛ kɔrɔsi aw kana talon wala ka tɛrɛndɛ ka ben ani k’aw yɛrɛ mandimi. Saan o saan, dɔw ka sanbaraw, sanko u ka sanbara seen janjanw b’a to u b’u yɛrɛ mandimi. Sanbara minw bɛnnin be i seenw ma ani u b’a to i be se ka tagama ɛsikaliyew n’a ɲɔgɔnna yɔrɔw la, a ka fisa i ka olu don.
Minw tɛ mɛnni kɛ ka ɲɛ: Mɔgɔ bena se ka lajɛnba kalanw lamɛn arajo FM na. O kama, i ka na n’i ka arajo dennin ani ekutɛriw ye i bolo.
Siyɔrɔw: N’i ye sibon sɔrɔ yɔrɔ o yɔrɔ, i ka koow kɛ ni ɲumanya, muɲuli ani sabari ye. N’i somɔgɔ wala i lɔnbaga dɔ lo ye jatigiya di i ma a ka soo, i k’i seko kɛ k’a tigi dɛmɛ ka soo kɔnɔ baaraw kɛ ani ka musakaw sara. I tagalon na, i janto k’i sibon saniya ani k’a ladon.
Parifɛnw: Lajɛnbaw fanba be kɛ boonw kɔnɔ yɔrɔ minw na vantilatɛriw be mɔgɔw fifa. Nɛnɛkiri bana n’a ɲɔgɔnna bana be mɔgɔ minw na, an k’an janto u la. An kana latikɔlɔ ni parifɛn farimanw kɛ an yɛrɛ la k’a dama tɛmɛ. N’o tɛ an bena gwɛlɛya lase u ma.—1 Kor. 10:24.
Makodon mɔgɔw dɛmɛcogo: Lajɛnba tuma na, n’an ye seereya kɛ sababu dɔ sen fɛ ani mɔgɔ dɔ y’a mako don, an ka sɛbɛ Veuillez suivre l’intérêt (S-43) dafa ka kunnafoniw di o tigi koo la. N’aw ye o sɛbɛ dɔ dafa, a’ y’a di gafew tilanyɔrɔ la wala a’ y’a di kafo ka sekeretɛri ma ni aw segira ka na aw ka kafo kɔnɔ.
Ɛrɛsitoranw: I ka bonya la Jehova tɔgɔ kan i tagamacogo ɲuman fɛ ɛrɛsitoranw kɔnɔ. Fani min bɛnnin be kerecɛn cidenw ma, i k’o don. I ka wari dɔɔni di kado ye ɛrɛsitoran baaradenw ma ni mɔgɔw delinanko lo k’o kɛ.
Lotɛliw:
Aw mako bena kɛ sibon hakɛ min na, a’ y’a ɲini u k’o dɔrɔn lo mara aw ye. Mɔgɔ daa min ka kan ka la boon kelen kɔnɔ, aw kana tɛmɛ o kan.
Boon min marala i ye, i kana o lasa fɔɔ n’i bolomako tɛ. N’i ka ɲi k’o kɛ, o fɔ joona joona lotɛli tigi ye walisa a k’o boon di mɔgɔ wɛrɛw ma n’u mako b’a la (Mat. 5:37). O kɔ, i k’a to u be nimɔrɔ dɔ di i ma k’o kɛ seere ye. N’i ma kɔn k’i nali lasa tile fila ɲɔgɔn, u tɛna i ka wari segi i ma.
I k’a lɔn ko n’i be tɛmɛ i ka banki karti fɛ ka lotɛli sara, lotɛli bena wari hakɛ dɔ bɔ i ka kɔnti la k’a mara. O wari bena kɛ i ka sibon sɔngɔ ye ani ka musaka wɛrɛw sara, i n’a fɔ n’i ye fɛɛn dɔw tiɲɛ a n’a ɲɔgɔnnaw. I ka wari tɔɔ tɛna segi i ma fɔɔ ni koow bɛɛ ɲɛnabɔra ka ban tile damanin i taganin kɔ.
Aw kana doni-ta-wotoro ta fɔɔ ni aw makoya sera a ma. Ani, a’ y’a segi a nɔɔ na joona walisa mɔgɔ wɛrɛ k’a mako ɲɛ n’a ye.
Lotɛli baarakɛla minw b’i dɛmɛ k’i ka minanw ta ani minw b’i ka sibon ladon, i ka wari dɔɔni di u ma kado ye ni mɔgɔw delinanko lo k’o kɛ.
N’i b’a fɛ ka tobili kɛ, i k’o kɛ yɔrɔ min na a daganin lo.
Lotɛli be dumunifɛn dɔw di a ka lonanw ma u k’u dumu lotɛli la, i n’a fɔ daraka, kafe ani galasi. An kana koow kɛ k’a dama tɛmɛ an kɛtɔ k’o fɛɛnw ta ka taga n’u ye lajɛnba la.
Aw ka lotɛli baarakɛlaw minɛ ka kɛɲɛ ni hakili senu deen cogoya ye tuma bɛɛ. A ka di u ye aw ka koow kɛ ni ɲumanya, muɲuli ni sabari ye sabu u be baara la mɔgɔ caaman kosɔn.
Bangebagaw ka kan k’u deenw kɔrɔsi tuma bɛɛ lotɛli lamini yɔrɔw la i n’a fɔ asansɛriw, pisini, mɔgɔw kunbɛn yɔrɔ, farikoloɲanagwɛ yɔrɔ ani a ɲɔgɔnnaw.
Sibon sɔngɔ minw kofɔra aw ye, o ye suu kelen ta ye, lanpo ma fara a kan. Ni u be wari wɛrɛ ɲini aw fɛ koo dɔ la aw ma min ɲini, aw kana o sara. A’ ye lajɛnba ka sibon koo ɲɛnabɔlaw jɛnkulu lalɔnniya o koo la joona.
Ni aw ye gwɛlɛya dɔ sɔrɔ aw ka sibon koo la lotɛli kɔnɔ, aw k’o ɲɛfɔ sibon koo ɲɛnabɔlaw jɛnkulu ye lajɛnba yɔrɔ la walisa u ka aw dɛmɛ.
An k’an yɛrɛ di ka baara kɛ gwansan: Biro dɔ be lajɛnba yɔrɔ la o kama. Minw bɛɛ b’a fɛ k’u yɛrɛ di ka baara kɛ, olu be se k’u tɔgɔ di o biro mɔgɔw ma. Denmisɛn minw sii ma se saan 16 ma, olu fana be se ka baara ɲuman kɛ, nka fɔɔ u bangebaga wala u kɔrɔsibaga ka kɛ n’u ye. U bangebaga wala u kɔrɔsibaga be se ka sira di baliku wɛrɛ ma k’u ɲɛminɛ.