Gafe Adorez Dieu ka kalan

Gafe Adorez le seul vrai Dieu labɛnna walisa ka kalan kɛ ni mɔgɔ kuraw ye, n’u tilara gafe Dɔnniya kalan na. An kɛtɔ k’o gafe kalan Kitabukalan na, an bena see sɔrɔ ka baara kɛ n’a ye waajuli la. O fana bena an dɛmɛ k’an ka kanuya n’an ka waleɲumanlɔn dunya Jehova ta fan fɛ, ani a ka ɔriganisasiyɔn fan fɛ. Cogo juman na an be se ka nafa dafalen sɔrɔ gafe Adorez Dieu kalan na?

Kalan ɲɛminɛcogo: Komi an bena to ka sapitiri kuturu kelen kalan lɔgɔkun o lɔgɔkun, kalan ɲɛminɛbagaw ka kan ka hakili sɔrɔ ka wagati tilan ka ɲɛ. Kalan datigɛtɔ, u ka ɲi ka taga kelen n’a ye, sanni u ka kuma caya dakun fɔlɔw kan. O la, wagati caaman bena sɔrɔ ka hakilinata nafamanw lajɛ, minw be sɔrɔ kɔfɛ sapitiri kɔnɔ. Kalan laban na, segikanni ka ɲiningaliw be sɔrɔ koorilen kɔnɔ. N’o ɲiningaliw lajɛra ka surunya, o bena kafodenw dɛmɛ u k’u hakili to hakilinata jɔnjɔnw na.

Gafe Adorez Dieu tilan kelen ɲɔgɔn kɔnɔ, ɲiningaliw dɔw bilara u dan na, dakunw kɔnɔ, walisa k’an dɛmɛ an ka miirili kɛ ani an ka baro kɛ. U ɲɔgɔnw be sɔrɔ gafe ɲɛɛ 48nan na. Kitabukalan na, waajibi tɛ dakun kalanbaga k’u kalan. A be se ka pan u kan. O ɲiningaliw lajɛtɔ ni jɛkulu ye, kalan ɲɛminɛbaga ka kan k’a to vɛrisew be kalan, ani baro be kɛ u kan wagati labilanen kɔnɔ.

An ka kɔn k’an yɛrɛw labɛn: Ka kalan labɛn koɲuman, a daan tɛ ka jaabiliw kɔrɔci dɔrɔn. Vɛrise minw be dakunw kɔnɔ, n’an be miiri u kan sɔbɛ la, ani delili kɔnɔ, o miirili tɛna an dɛmɛ k’an ka lakalitaw dɔrɔn labɛn. An dusukunw fana bena labɛn, ani o lo kɔrɔtalen be ka tɛmɛ (Esd. 7:10). An bɛɛ be se ka kɛ sababu ye ka ɲɔgɔnw jagwɛlɛya: n’an be sɔn ka jaabiliw di, ani n’an b’a kɛ ni majigilenya ye.—Rom. 1:11, 12.

Gafe Adorez Dieu ka kalan bena an dɛmɛ ka magwɛrɛ Jehova la. A fana bena cogoya di an ma ka mɔgɔ kɔnɔgwɛw dɛmɛ u ka jɛn n’an ye k’a bato (Zab. 95:6; Yaku. 4:8). An bɛɛ ka nafa dafalen sɔrɔ o hakilimaya labɛn na.