Jɔn lo be Jehova sago kɛra bi?
1. An bena a daminɛ ka ka kitabunin nin lajɛ tuma juman: Jɔn lo be Jehova sago kɛra bi? O kalan bena an nafa cogo di?
1 K’a ta ɔkutɔburu tile 28nan lɔgɔkun ma, an bena kitabunin nin kalan Kafo ka Bibulu kalan na: Jɔn lo be Jehova sago kɛra bi? An y’o kitabunin kura sɔrɔ tile saba lajɛnba tɛmɛnin na. A dilanna walisa ka Bibulu kalandenw ɲɛsin Jehova ka ɔriganisasiyɔn ma. Nɛɛma min dira an ma ka kɛ o ɔriganisasiyɔn kɔnɔ, kitabunin kalan bena dɔ fara an ka waleɲumanlɔn kan o koo la. O kalan bena an dɛmɛ fana an k’o waajulikɛfɛn nafaman lɔn ka ɲɛ.—Zab. 48:14.
2. An bena kitabunin lajɛ cogo di kafo kɔnɔ?
2 An bena a kalan cogo min na: Kalan ɲɛminɛbaga ka kan k’a janto ka wagati hakɛ kelen kɛ kalansen kelen kelen bɛɛ kan. A bena kalansen 28 kelen kelen bɛɛ dadon a kɛtɔ k’u barokun kalan. O barokun kelen kelen bɛɛ ye ɲiningali dɔ ye. O kɔ, a bena a ɲini kalankɛla fɛ a ka dakun fɔlɔ kalan. O dakun kalannin kɔ, a bena ɲiningali dɔ kɛ ale yɛrɛ ye min labɛn. Tilanyɔrɔ minw ka kumasen fɔlɔ sɛbɛra ka fin tititi, a’ y’u kalan ani ka baro kɛ u kan dan na dan na. N’o tilanyɔrɔ kalanna ka ban, ɲiningali min labɛnna ka kɛ kalansen ka barokun ye, a’ y’a ɲini lamɛnnikɛlaw fɛ u k’a ɲɛfɔ cogo min na tilanyɔrɔ b’o ɲiningali jaabi. Foto caaman minw be sɔrɔ kitabunin kɔnɔ, aw be se k’u lakali fana. Ni wagati be yen, a’ ye vɛrise jɔnjɔnw kalan. Ɲiningali dɔw be kalansen jukɔrɔ. A’ y’u lajɛ walisa ka segikanni kɛ ka sɔrɔ ka kalansen nɔfɛta daminɛ. Koorilen nin be sɔrɔ kalansen dɔw jukɔrɔ: “A ɲini ka dɔ lɔn tugun.” A’ y’a ɲini kalankɛla fɛ a k’o kalan. O kɔ, lamɛnnikɛlaw k’a ɲɛfɔ Bibulu kalanden bena nafa min sɔrɔ n’a be tugu o ladiliw kɔ. Kalan laban na, ni wagati be yen, a’ ye kalansenw ka barokunw kalan walisa ka segikanni kɛ. A’ ye aw hakili to a la ko ladili minw dira yan, waajibi tɛ ka tugu u kɔ n’an be kitabunin lajɛra ni Bibulu kalanden dɔ ye.
3. Cogo juman na kitabunin kalan be se k’an nafa bɛrɛbɛrɛ?
3 N’an b’a fɛ kalan k’an nafa bɛrɛbɛrɛ, an k’an yɛrɛ labɛn koɲuman ka sɔrɔ ka na lajɛn na. I jija k’i daa don kalan na. Kalan tuma na, miiri k’a filɛ kitabunin bena kalandenw nafa cogo min na. An b’a fɛ o kitabunin kura kalan k’an jija ka mɔgɔ wɛrɛw dɛmɛ u ka jɛn n’an ye ka Ala sago kɛ. O la, olu fana bena jigiya sɔrɔ ka to badaa-badaa.—1 Zan 2:17.