A ɲini ka kalan sɔrɔ weleweledala kolɔnbagaw fɛ

Weleweledala kolɔnbaga minw b’an ka kafo kɔnɔ, u koo ka gwɛlɛ an ma kosɔbɛ. U la dɔw be baara kɛra Jehova ye kantigiya la kabi wagatijan. N’a sɔrɔ dɔ wɛrɛw sera waajuli kɛcogo la koɲuman a ma mɛɛn. O balimaw y’a ye cogo min na Yezu be kerecɛn kafo ɲɛminɛna nin laban loonw na. Yezu b’o kɛra cogo di? A y’a kɛ waajuli baara yiriwala (Mat. 28:19, 20). O balimaw kɛtɔ k’u seen don waajuli baara la, u ye sebagaya kabakoman sɔrɔ walisa ka kɔrɔbɔliw ni tɔɔrɔw muɲu (2 Kor. 4:7). An be se ka koo caaman degi u fɛ. Ni sababu dira u ma, a ka di u ye k’u ka lɔnniya tilan ni tɔɔw ye (Zab. 71:18). O kama, an ka ɲi k’a ɲini ka kalan sɔrɔ u fɛ. Cogo di do?

Waajuli la. Weleweledala kuraw wala minw tɛ se waajuli la bɛrɛbɛrɛ, olu mako be fɔrɔmasɔn na. An be se ka koo caaman lɔn n’an be weleweledala kolɔnbagaw ka waajuli kɛcogo kɔrɔsi. (Barokun nin be sɔrɔ saan 2015, feburu tile 15 ka La Tour de Garde kɔnɔ: “Garde ton zèle pour le ministère.” A dakun 3nan lajɛ cɛtigɛ nin jukɔrɔ: “Aide les moins expérimentés.”) I ye nafa juman lo sɔrɔ i kɛtɔ ka waajuli kɛ n’o ɲɔgɔnna mɔgɔw ye?

A ɲini ka waajuli kɛ ni weleweledala kolɔnbaga dɔ ye. N’a tigi ye namara ye, tuma kelen kelen, i be se k’i ka Bibulu kalanden weele ka na a ka soo aw be kalan kɛ. Kalan bannin kɔ, o balima ye min kɔrɔsi, a ɲini a fɛ a k’o fɔ i ye ani a ka ladiliw di i ma.

I k’a ɲini ka kɛ n’u ye wagati wɛrɛw la: Wagati kɛ ni weleweledala kolɔnbagaw ye walisa k’u lɔn ka ɲɛ. U la kelen weele ka na i ka gwa kɔnɔ batoli la ani a ɲininga a ka fɛtaw la. N’o balima ye namara ye, labɛnw kɛ walisa ka gwa kɔnɔ batoli kɛ a ka soo. A ɲininga ko: “I ye tiɲɛn diinan lɔn cogo di? I ye duga jumanw lo sɔrɔ? Ɲɛtaga jumanw lo kɛra kafo kɔnɔ ele ɲɛɛ na? I ye ninsɔndiya jumanw lo sɔrɔ Jehova ka baara la?”

Kana ɲinɛ ko u ye mɔgɔ dafabaliw ye fana. An sekow tɛ kelen ye waajuli la. O kelen lo fana n’o balimaw ye (Ɔrɔm. 12:6-8). U dɔw kɔrɔla ani n’a sɔrɔ u tɛ se ka wagati caaman kɛ n’an ye. O bɛɛ n’a ta, an be se ka kalan caaman sɔrɔ u fɛ sabu u be baara kɛra Jehova ye kantigiya la kabi wagatijan.