Kanpaɲi kɛrɛnkɛrɛnnin dɔ, walisa ka bibulukalan kofɔ mɔgɔw ye sɛtanburukalo la

Sɛtanburukalo la, an bena baaraba kɛ ni kitabunin nin ye walisa ka bibulukalan kofɔ bɛɛ ye: Ɲɛnamaya kɛ hɛɛrɛ la fɔɔ abada! Weleweledalaw be se ka kɛ piyɔniye kɔrɔsigiw ye ani k’a latigɛ ka lɛri 30 wala 50 kɛ waajuli la. O kanpaɲi bena kɛ cogo di?

• Ɲɔgɔnyeko fɔlɔ la: Baara kɛ n’o kitabunin kɔgolo ye walisa ka bibulukalan nege don a tigi la ani k’o kalan kɛcogo ɲɛyira a la. Kana ɲinɛ i ka viziti kuraw kɔ ani minw tun kɔnna k’u mako don. Hali n’u tun ma sɔn ka kalan kɛ fɔlɔ la, n’a sɔrɔ an ka kitabunin kura ani an ka kalankɛcogo kura bena diya u ye. An ma minw sɔrɔ u ka soo, an kana kitabunin to u ye. An kana a ci fana mɔgɔ ma lɛtɛrɛ kɔnɔ n’a tigi m’a mako don. Kafo ka waajuliko ɲɛnabɔbagaw jɛnkulu be se ka lajɛn wɛrɛw labɛn waajuli kama sɛtanburukalo la.

• Sababu wɛrɛw sen fɛ: N’aw ka kafo be waajuli kɛ ni wotoro ye jamayɔrɔ la, a’ ye baara kɛ ni kitabunin kura nin ye: Ɲɛnamaya kɛ hɛɛrɛ la fɔɔ abada! Mɔgɔ minw b’o kitabunin kura ta, a’ y’a ɲɛfɔ u ye ko a labɛnna bibulukalan lo kama ani ko aw be se k’o kalan kɛ n’u ye gwansan. O kalan kɛcogo ɲɛyira a tigi la kelen, wala a ɲini k’o kɛ kɔfɛ. Waajulibaara kɔrɔsibaga be se ka labɛnw kɛ walisa weleweledala setigi dɔw ka taga bibulukalan kofɔ mɔgɔw ye jagokɛyɔrɔw la. I be se fana ka bibulukalan kofɔ i baarakɛɲɔgɔnw ye, wala mɔgɔ wɛrɛw ye sababu dɔw sen fɛ.

Yezu ye cii di an ma ko an ka mɔgɔw ‘kɛ ale ka kalandenw ye’ ani “k’u kalan.” (Mat. 28:19, 20). An be Jehova deli a k’an dɛmɛ ka baara kɛ n’an ka kitabunin kura ye o kanpaɲi kɛrɛnkɛrɛnnin na walisa k’o laɲinita dafa.