Waajuli kɛtɔ, an k’a yira ko an tɛ mɔgɔ bɔ mɔgɔ la
1 Ciden Piɛre y’a fɔ ko “Ala tɛ mɔgɔ bɔ mɔgɔ la, nka siya o siya la, mɔgɔ min bɛ siran a ɲɛ ka ko tilennen kɛ, o de ko ka di a ye.” (Kew. 10:34, 35). Bi, an b’an ka waajuli baara kɛ ka kɛɲɛ n’o tiɲɛn kumaw ye. O kama, a kɔrɔtalen be an k’an jija sɔbɛ la ka see sɔrɔ gwɛlɛyaw kan minw be se k’an bali ka kibaro duman lase mɔgɔw bɛɛ ma.
2 Waajuli kɛtɔ soo ni soo yɔrɔ dɔw la, a man gwɛlɛ ka mɔgɔ dɔw kunbɛn minw tɛ an ka kaan mɛn, an be min fɔ kafo kɔnɔ. An fana be se ka kuma mɔgɔ dɔw fɛ minw b’u mako don an ka baro la, nka u sigilen tɛ kafo ka kiin dɔ kɔnɔ. An be Masaya cira min fɔ, n’an lamɛnbagaw t’o mɛn, o be se k’u bali ka tɔnɔ bɛrɛbɛrɛ sɔrɔ an ka kuma la. O mɔgɔ dɔw ye tulogwɛlɛnw ye, minw be kuma tagamasiɲɛw fɛ. An be se ka mun lo kɛ walisa ka see sɔrɔ o gwɛlɛya kan ani ka kibaro duman lase bɛrɛbɛrɛ mɔgɔw ma minw t’an ka kaan mɛn? Ani, an ka kan ka mun lo kɛ walisa ka mɔgɔw dɛmɛ minw y’u mako don tiɲɛn koo la nka u sigilen tɛ an ka kafo kiin dɔ kɔnɔ?
3 Utikalo tɛmɛnen na Sosiyete ye kafolisɛbɛ S-43 nin ci kafow bɛɛ ma:“ Veuillez suivre l’intérêt” (A’ ye hakɛ to ka makodon nin ladon). O kafolisɛbɛ kuun ye k’an dɛmɛ an ka la a la ko mɔgɔ minw sigilen be an ka kafo kiinw kɔnɔ ani u t’an ka kaan mɛn, u ye cogoya sɔrɔ ka Masaya kibaro duman mɛn u yɛrɛw ka kaan na. Tulo gwɛlɛnw fana daa b’a la. O sɛbɛ b’an dɛmɛ fana an ka dɛmɛ ɲini ka lase mɔgɔw ma, an ye minw kunbɛn waajuli kɛtɔ nka u sigilen tɛ an ka kiin dɔ kɔnɔ.
4 Waajuli kɛtɔ, an mana tulo gwɛlɛn dɔ wala mɔgɔ dɔ kunbɛn min t’an ka kaan mɛn, an ka kan k’o kafolisɛbɛ S-43 dafa koɲuman walisa mɔgɔ wɛrɛ ka se k’a kalan. An ka kan k’o sɛbɛ dafa hali n’o tigi ma mako don tiɲɛn koo la. N’a sɔrɔ an tɛna se k’a tigi tɔgɔ sɔrɔ ka sɛbɛ tuma bɛɛ, nka an ka kan k’a ka ladɛrɛsi n’a ka kaan sɛbɛ. O kɔ, an ka kan k’o kafolisɛbɛ don rapɔɔriw buwati kɔnɔ Masaya Boon kɔnɔ. Sekeretɛri bena o sɛbɛw bɛɛ lajɛn k’u sɛgɛsɛgɛ k’a filɛ n’u dafara koɲuman ani mɔgɔ be se k’o sɛbɛri kalan. O kɔ, a bena u ci kafow wala jɛnkuluw ma, minw b’u janto o kaan fɔbagaw la ani u ka surun kafo la.
5 Tuma dɔw la, waajibi tɛ an ka koow kɛ o cogo la. Ɲɛyirali fɛ, angilikan fɔbagaw kafo caamanba minw be yen dugubaw kɔnɔ, u b’a lɔn yɔrɔ minw na angilikan fɔbagaw sigilen be yen kiinw kɔnɔ. Faan wɛrɛ fɛ, mɔgɔ minw be kaan dɔ fɔ n’a sɔrɔ u jɛnsɛnnen be dugu kɔnɔ. Kafo wala jɛnkulu minw b’o kaan fɔ, n’a sɔrɔ u be se k’a ɲini olu fɛ u k’o kiinbaw yaala. A bena diya u ye ka dɛmɛ sɔrɔ walisa k’o kaan fɔbagaw ɲini ka sɔrɔ ani ka kibaro duman lase u ma.
6 Ni sigida dɔ la, kafo wala jɛnkulu si tɛ yen min be se ka kibaro duman fɔ o kaan wɛrɛ la, n’a sɔrɔ weleweledala dɔ be yen aw ka kafo kɔnɔ min b’o kaan mɛn ani a be se k’o viziti kɛ. Ni mɔgɔ si ma sɔrɔ min b’o kaan fɔ, hali dugu kɔrɔsibaga sɛgɛrɛli kɔ, balimaw ka kan k’u seko kɛ walisa seereya ka di o tigi ma. O koo ɲɔgɔn na, kitabunin I ka sigi hɛrɛ la dugukolo kan fɔ abada! sɔrɔla ka kɛ baarakɛminan nafaman ye.
7 Weleweledala kelen kelen bɛɛ ka kan ka teliya ka baara kɛ ni kafolisɛbɛ S-43 ye n’a ye mɔgɔ dɔ kunbɛn min tɛ kafo ka kaan fɔ. N’o kafolisɛbɛ tɛ kafo fɛ, o la, an be se ka kunnafoniw sɛbɛ papiye dɔ kan ani k’a lase kafo ma i ko a fɔra sanfɛ cogo min na. An kɛtɔ k’an jija sɔbɛ la ka kibaro duman lase mɔgɔ sifa bɛɛ ma, u ka kaan mana kɛ min o min ye, an bena an ka Ala, Jehova, ka kanuya cogo yira. “Ale b’a fɛ mɔgɔw bɛɛ ka kisi ka se ka tiɲɛ dɔn.”—1 Tim. 2:4.