Furuɲɔgɔn sɔrɔcogo

1-2. a) Kerecɛn ka ɲi k’a janto kosɔbɛ mun lo la ka sɔrɔ k’a daminɛ ka teriya kɛ furu kama? b) Ka teriya kɛ furu kama, o kɔrɔ ko di? (“Kuma dɔ ɲɛfɔli” lajɛ).

YALA i b’a fɛ ka furu wa? Hali ni ninsɔndiya tɛ sɔrɔ furu dɔrɔn lo la, cɛgwanaw ni musogwana caaman be furuɲɔgɔn ɲinina. U dɔw ye kanbelew ni sunguruw ye ani dɔw ye mɔgɔkɔrɔbaw ye. Sanni i k’a daminɛ ka teriya kɛ furu kama, jɛnɲɔgɔnya ɲuman ka ɲi ka kɛ ele ni Jehova cɛ, i ka ɲi k’i yɛrɛ lɔn koɲuman ani i ka ɲi ka se ka lɔ ni gwaso musakaw yea (1 Kor. 7:36). O la, n’i nana furu, i ka teli ka hɛɛrɛ sɔrɔ i ka furu kɔnɔ.

² Nka, a man nɔgɔ tuma bɛɛ ka furuɲɔgɔn ɲuman sɔrɔ (Talenw 31:10). Hali n’i ɲɛbɔra mɔgɔ dɔ fɛ, a be se ka gwɛlɛya i ma k’a daminɛ ka teriya kɛ n’o tigi ye furu kama.b Barokun nin na, an bena a ye kerecɛn be se ka furuɲɔgɔn ɲuman sɔrɔ cogo min na ani k’a daminɛ ka teriya kɛ furu kama. A be minw kɔnɔ ka furu, an bena a ye fana kafoden tɔɔw be se ka olu dɛmɛ cogo min na.

FURUƝƆGƆN ƝUMAN SƆRƆCOGO

3. Kerecɛn ka ɲi k’a janto koo jumanw lo la, n’a be furuɲɔgɔn ɲinina?

³ N’i b’a fɛ ka furu, sanni i k’a daminɛ ka teriya kɛ furu kama, a ka ɲi i k’a lɔn fɔlɔ i b’a fɛ i furuɲɔgɔn ka kɛ ni jogo minw ye.c N’o tɛ, i be se ka fɔn furuɲɔgɔn ɲuman dɔ la ani k’a daminɛ ka teriya kɛ ni mɔgɔ dɔ ye min bɛnnin tɛ i ma. I ɲɛbɔra mɔgɔ min fɛ, o tigi ka ɲi ka kɛ kerecɛn batizenin ye (1 Kor. 7:39). Nka, kerecɛn batizenin bɛɛ lo tɛna kɛ furuɲɔgɔn ɲuman ye i fɛ. O la, i be se k’i yɛrɛ ɲininga ko: “Ne ka laɲinitaw ye mun lo ye? Ne fɛ, a kɔrɔtanin lo n’ furuɲɔgɔn ka kɛ ni jogo jumanw lo ye? N’ b’a fɛ mɔgɔ sifa min ka kɛ n’ furuɲɔgɔn ye, yala o bɛnnin lo wa?”

4. Minw be furuɲɔgɔn ɲinina, u dɔw be delili kɛ mun lo koo la?

⁴ N’i be furuɲɔgɔn ɲinina, siga t’a la i ye delili kɛ o koo la (Filip. 4:6). Tiɲɛn lo ko Jehova ma furuɲɔgɔn dɔ latigɛ an kelen kelen bɛɛ ye. Nka, a b’a janto i dusukunnakow n’i ka miiriyaw la ani a be se k’i dɛmɛ ka furuɲɔgɔn ɲuman sɔrɔ. O la, to k’i ka fɛtaw ani i dusukunnakow fɔ a ye (Zab. 62:9). A deli a k’i sɔn hakilitigiya la ani a k’i dɛmɛ ka muɲu (Zaki 1:5). Johnd ye cɛgwana ye ani a be bɔ Etazini. A y’a fɔ ale be to ka min ɲini Jehova fɛ delili la. A ko: “N’ b’a fɔ Jehova ye n’ b’a fɛ n’ furuɲɔgɔn ka kɛ ni jogo minw ye. N’ b’a deli a ka sababuw di n’ ma n’ ka mɔgɔ dɔ kunbɛn min be se ka kɛ n’ furuɲɔgɔn ye. N’ b’a ɲini a fɛ fana a ka n’ dɛmɛ ka kɛ ni jogo dɔw ye minw bena a to n’ ka kɛ furucɛ ɲuman ye.” Balimamuso Tanya be Siri Lanka jamana na ani a ko: “Ka n’ to furuɲɔgɔn ɲini na, n’ be Jehova deli a ka n’ dɛmɛ n’ ka to kantigiya la, n’ ka to ka koow filɛ ni ɲɛɛ ɲuman ye ani n’ ninsɔndiyanin ka to.” Hali n’i ma furuɲɔgɔn sɔrɔ joona, Jehova y’a daa di ko a bena to k’i mako wasa ani k’a janto i la dusukunnakow ta fan fɛ.—Zab. 55:23.

5. Kerecɛn be se ka furuɲɔgɔn sɔrɔ cogo di min be Jehova kanu? (1 Korɛntikaw 15:58; jaa lajɛ fana).

⁵ Bibulu b’a fɔ an ye ko ‘an k’an jija kosɔbɛ . . . Matigi ka baara la.’ (1 Korɛntikaw 15:58 kalan). N’i bolo degunnin tora Jehova ka baara la ani n’i be wagati kɛ ni balima caaman ye, o bena i barika bonya. Nka o dɔrɔn tɛ. I bena sababuw sɔrɔ fana ka cɛgwanaw ni musogwanaw kunbɛn minw be Jehova ka baara kɛ u ɲɛnako fɔlɔ ye i ko ele. Ani n’i b’i seko fisaman kɛra k’i koo diya Jehova ye, o bena i ninsɔndiya kosɔbɛ.

6. N’i be furuɲɔgɔn ɲinina, i ka ɲi ka mun lo to i hakili la?

⁶ Nka n’i be furuɲɔgɔn ɲinina, i janto o kana kɛ i ɲɛnako fɔlɔ ye (Filip. 1:10). I furula wo i ma furu wo, ninsɔndiya sɔbɛ tɛ bɔ o lo la. I be jɛnɲɔgɔnya min kɛra ni Jehova ye, ninsɔndiya sɔbɛ be bɔ o lo la (Mat. 5:3). Ani tuma min na i ma furu fɔlɔ, n’a sɔrɔ i labilanin lo kosɔbɛ o wagati la ka dɔ fara i ka cidenya baara kan (1 Kor. 7:32, 33). Baara ɲuman kɛ n’i ka wagati ye o tuma na. Balimamuso Jessica be Etazini ani bɛrɛ tun m’a jɛn saan 40 na a furu tuma na. A ko: “N’ bolo degunnin tora cidenya baara la ani o y’a to n’ tun wasanin lo hali ni n’ tun b’a fɛ ka furu.”

WAGATI TA K’A TIGI KƆRƆSI

7. N’i ɲɛbɔra mɔgɔ dɔ fɛ, mun na hakilitigiyako lo i ka wagati ta k’a tigi kɔrɔsi fɔlɔ ka sɔrɔ ka kuma a fɛ? (Talenw 13:16).

⁷ N’i b’a miiri ko mɔgɔ dɔ bena kɛ furuɲɔgɔn ɲuman ye i fɛ, i ka ɲi ka mun lo kɛ do? Yala i ka ɲi ka sin ka kuma a tigi fɛ wa? Bibulu b’a fɔ ko mɔgɔ hakilitigi be wagati ta ka jatiminɛ kɛ fɔlɔ ka sɔrɔ ka koow kɛ (Talenw 13:16 kalan). O la hakilitigiyako lo i fɛ k’a tigi kɔrɔsi a ɲina ma wagati dɔ kɔnɔ ka sɔrɔ k’i kɔnɔkow fɔ a ye. Balimacɛ Akim be Peyiba jamana na ani a ko: “I be se ka jarabi mɔgɔ dɔ la joona joona ani o jarabi tɛ mɛɛn. Nka, n’i ye wagati ta k’a tigi kɔrɔsi, i tɛna a daminɛ ka teriya kɛ n’a ye furu kama sabu a koo barila ka diya i ye.” Ka fara o kan, n’i ye wagati ta k’a kɔrɔsi, n’a sɔrɔ i bena a faamu ko a tigi tɛna kɛ furuɲɔgɔn ɲuman ye i fɛ.

8. Kerecɛn be se ka mɔgɔ dɔ kɔrɔsi cogo di furu kama? (jaa lajɛ fana).

⁸ I be se ka mɔgɔ dɔ kɔrɔsi a ɲina ma cogo di? Kafo ka lajɛnw wala ɲɛnagwɛ dɔw la, n’a sɔrɔ i bena koo dɔw kɔrɔsi a tigi ka Alakow, a sɔɔn ani a ka kokɛcogow koo la. Jɔnw lo y’a teriw ye? A ka teli ka baro kɛ mun lo koo la? (Luka 6:45). Yala aw ka laɲinitaw ye kelen ye wa? Kerecɛn kolɔnbaga minw b’a lɔn ka ɲɛ, i be se k’olu wala a ka kafo ka diinan mɔgɔkɔrɔw ɲininga a koo la (Talenw 20:18). I be se k’u ɲininga a jogow koo la ani mɔgɔw b’a jati cogo min na (Ruti 2:11). N’i b’a ɲinina k’a tigi lɔn, kana maloya bila a la. I janto a dusukunnakow la, kana kɛ a kɔ tuma bɛɛ ani kana a ɲini ka koo bɛɛ lɔn a koo la.

9. I ɲɛbɔra mɔgɔ min fɛ sanni i ka kuma n’a ye, i ka ɲi ka la mun lo la?

⁹ I ɲɛbɔra mɔgɔ min fɛ i ka ɲi k’a tigi kɔrɔsi fɔɔ tuma juman ka sɔrɔ ka kuma a fɛ? N’i kumana a fɛ joona kojugu, a bena kɛ komi i ma miiri koɲuman ka sɔrɔ k’o kɛ (Talenw 29:20). N’i fana ye wagati caaman ta, a bena kɛ komi i be sigasigara kojugu, sanko n’a tigi bɔra a kala ma ko i ɲɛbɔnin b’a fɛ (Waaj. 11:4). A to i hakili la ko sanni i k’a fɔ dɔ ye ko i b’a fɛ ka teriya kɛ n’a ye furu kama, waajibi tɛ i ka la a la ko i bena a tigi furu. Nka, i ka ɲi ka la a la ko i labɛnnin lo furu kama ani ko o tigi be se ka kɛ furuɲɔgɔn ɲuman ye i fɛ.

10. N’i y’a ye ko mɔgɔ dɔ ɲɛbɔnin b’i fɛ ani e t’a tigi fɛ, i ka ɲi ka mun lo kɛ do?

¹⁰ Nka, n’i y’a ye ko mɔgɔ dɔ ɲɛbɔnin b’i fɛ ani e t’a tigi fɛ do? O yira ka gwɛ i ka kɛwalew fɛ. A man ɲi i k’a to a tigi k’a miiri ko i bena sɔn ka teriya kɛ n’a ye furu kama k’a sɔrɔ o tɛ.—1 Kor. 10:24; Efɛz. 4:25.

11. N’i ka ɲi ka furuɲɔgɔn ɲini mɔgɔ dɔ ye, i ka ɲi k’i janto kosɔbɛ mun lo la?

¹¹ Jamana dɔw la, bangebagaw wala mɔgɔkɔrɔba wɛrɛw lo be furuɲɔgɔn sugandi u somɔgɔw ye minw furunin tɛ. Jamana wɛrɛw la, mɔgɔ dɔ somɔgɔw wala a teriw lo be furuɲɔgɔn ɲini a ye. O kɔ, u be labɛn kɛ walisa u fila ka ɲɔgɔn kunbɛn ani k’a filɛ n’u bɛnnin be ɲɔgɔn ma. N’i ka ɲi ka labɛnw kɛ walisa mɔgɔ dɔw ka teriya kɛ furu kama, wala n’i ka ɲi ka furuɲɔgɔn sugandi mɔgɔ dɔ ye, i janto cɛman ni musoman ka fɛtaw n’u makoyaw la. N’i b’a miiri ko mɔgɔ dɔ be se ka kɛ furuɲɔgɔn ɲuman ye i teri wala i somɔgɔ dɔ fɛ, a ɲini k’o tigi lɔn koɲuman. A ɲini k’a lɔn a be ni jogo minw ye, ani min yɛrɛ kɔrɔtanin lo kosɔbɛ, o y’a ka Alakow lo ye. N’a tigi be jɛnɲɔgɔnya ɲuman kɛra ni Jehova ye, o kɔrɔtanin lo kosɔbɛ ka tɛmɛ wari, kalanbabaw wala lɔyɔrɔba kan. Nka, a to i hakili la ko o balimacɛ n’o balimamuso lo ka ɲi k’a latigɛ n’u bena furu ɲɔgɔn ma.—Gal. 6:5.

I BE SE K’A DAMINƐ COGO DI KA TERIYA KƐ FURU KAMA?

12. N’i b’a fɛ ka teriya kɛ ni mɔgɔ dɔ ye furu kama, i be se k’o fɔ a tigi ye cogo di?

¹² N’i b’a fɛ ka teriya kɛ ni dɔ ye furu kama, i be se k’o fɔ a tigi ye cogo di?e Labɛnw kɛ walisa ka baro kɛ n’a tigi ye jamayɔrɔ la wala telefɔni na. A fɔ a ye ka gwɛ ko a koo ka di i ye ani ko i b’a fɛ ka teriya kɛ n’a ye furu kama (1 Kor. 14:9). N’a mako be wagati la, wagati to a ye walisa a ka miiri ka sɔrɔ k’i jaabi (Talenw 15:28). Nka n’a tigi t’a fɛ ka teriya kɛ n’i ye furu kama, kana ja kelen kan.

13. I be se ka mun lo kɛ ni mɔgɔ dɔ y’a fɔ i ye ko i koo ka di a ye? (Kɔlɔsikaw 4:6).

¹³ Ni mɔgɔ dɔ y’a fɔ i ye ko i koo ka di a ye do? Siga t’a la, o tigi y’a jaa gwɛlɛya le walisa k’o fɔ i ye. O la, koow kɛ ni ɲumanya ye ani bonya la a kan (Kɔlɔsikaw 4:6 kalan). N’i mako be wagati la walisa ka miiri, o fɔ a ye. Nka kana mɛɛn kojugu (Talenw 13:12). N’i t’a fɛ ka teriya kɛ n’a ye furu kama, o fɔ a ye ka gwɛ ni ɲumanya ye. Balimacɛ Henri be bɔ Otirisi. An k’a filɛ a ye min kɛ tuma min na balimamuso dɔ y’a fɔ a ye ko a b’a fɛ ka teriya kɛ n’a ye furu kama: “N’ ye n’ ka miiriya fɔ a ye ka gwɛ ani n’ y’o kɛ ni ɲumanya ye. N’ sinna k’o fɔ a ye sabu n’ tun t’a fɛ a k’a miiri ko n’ fana b’a fɛ ka teriya kɛ n’a ye furu kama. O kama n’ tun be n’ janto n’ ka kokɛcogow la n’a ye.” Faan wɛrɛ fɛ, n’i b’a fɛ ka teriya kɛ n’o tigi ye furu kama, i dusukunnakow n’i ka fɛtaw fɔ a ye o koo la. Ka kɛɲɛ n’aw bɔyɔrɔw ani koo wɛrɛw ye, aw ka fɛtaw be se ka kɛ dan na dan na.

KAFODENW BE SE KA CƐGWANAW NI MUSOGWANAW DƐMƐ COGO DI?

14. Kafodenw be se ka cɛgwanaw ni musogwanaw dɛmɛ cogo di u kumacogo fɛ?

¹⁴ Kerecɛn minw b’a fɛ ka furu, an bɛɛ be se k’olu jija ani k’u dɛmɛ cogo di? O kɛcogo dɔ ye k’an janto an kumacogo la (Efɛz. 4:29). An be se k’an yɛrɛ ɲininga ko: “Minw be furuɲɔgɔn ɲinina, yala n’ ka teli ka tulon sifa dɔw kɛ n’u ye min be digi u la wa? Ni n’ ye cɛgwana ni musogwana dɔ ye u be baro kɛra ɲɔgɔn fɛ, yala n’ be sin k’a miiri ko u jarabinin be ɲɔgɔn na wa?” (1 Tim. 5:13). An man ɲi k’a to fana abada cɛgwanaw ni musogwanaw k’a miiri ko fɛɛn dɔ b’u jɛn sabu u furunin tɛ. An kumana Henri min koo la ka tɛmɛ, ale ko: “Balima dɔw b’a fɔ n’ ye ko: ‘Mun na i bele ma muso furu? I m’a lɔn ko wagati be tɛmɛna i kan wa?’ O kumaw ɲɔgɔn b’a to cɛgwanaw ni musogwanaw b’a miiri ko mɔgɔw tɛ u kanu ani ko u b’u lasunna kojugu u ka furu.” A ka fisa an ka to ka sababuw ɲini k’o balimaw tando!—1 Tes. 5:11.

15. a) An ka ɲi k’an janto mun lo la kosɔbɛ ka sɔrɔ ka mɔgɔ dɔ dɛmɛ a ka furuɲɔgɔn sɔrɔ? (Ɔrɔmukaw 15:2; jaa lajɛ fana). b) Videwo min kofɔra, o ye i dɛmɛ ka koo nafaman jumanw lo faamu?

¹⁵ N’i b’a miiri ko balimacɛ dɔ ni balimamuso dɔ bɛnnin be ɲɔgɔn ma do? Bibulu b’a fɔ ko an k’an janto tɔɔw dusukunnakow la (Ɔrɔmukaw 15:2 kalan). Cɛgwanaw ni musogwana caaman t’a fɛ mɔgɔ wɛrɛ k’u kofɔ mɔgɔ dɔ ye min be se ka kɛ u furuɲɔgɔn ye ani an ka ɲi k’an janto o la (2 Tes. 3:11). A be se ka diya dɔw ye an k’u kofɔ mɔgɔ dɔ ye, nka an man ɲi k’o kɛ n’u m’o ɲini an fɛf (Talenw 3:27). Hali ni dɔw b’a fɛ an k’u dɛmɛ, u t’a fɛ an ka sin k’u kofɔ mɔgɔ dɔ ye min be se ka kɛ u furuɲɔgɔn ye. Balima sunguru dɔ tɔgɔ ko Lydia ani a be bɔ Alemaɲi. A ko: “I b’a fɛ balima minw ka ɲɔgɔn kunbɛn, i be se ka olu ni balima caaman weele ɲɛnagwɛ dɔ la. Sababu di u ma dɔrɔn u ka ɲɔgɔn kunbɛn ani i be koo tɔɔ to u bolo.”

16. Kerecɛn minw furunin tɛ, u ka ɲi ka mun lo to u hakili la?

¹⁶ An furunin lo wo, an furunin tɛ wo, an bɛɛ be se ka ninsɔndiya sɔrɔ an ka ɲɛnamaya la ani ka wasa! (Zab. 128:1). O la, n’i b’a fɛ ka furu nka i ma mɔgɔ dɔ sɔrɔ fɔlɔ, to ka Jehova sago kɛ i ɲɛnako fɔlɔ ye. Balimamuso Sindiya be bɔ Makawo dugu la ani a ko: “I be wagati min kɛra cɛgwanaya wala musogwanaya la, o ye wagati kunkurunin lo ye, n’i y’o suma ni wagati ye, i bena min kɛ n’i furuɲɔgɔn ye alijɛnɛ kɔnɔ. I be wagati min kɛra cɛgwanaya wala musogwanaya la, o diyabɔ ani baara ɲuman kɛ n’o ye.” Nka, n’i ye mɔgɔ dɔ sɔrɔ min be se ka kɛ i furuɲɔgɔn ye ani i y’a daminɛ ka teriya kɛ n’a ye furu kama do? Barokun nata la, an bena a ye cogo min na an be se ka desizɔn ɲumanw ta o wagati la.