A’ ye baara kɛ n’a ye sababuw bɛɛ la
1. Sɛbɛnin Tiɲɛn lɔn be se k’an dɛmɛ ka mun lo kɛ?
1 Sɛbɛnin Yala i b’a fɛ ka tiɲɛn lɔn wa? labɛnna walisa k’an dɛmɛ ka bibulukalanw daminɛ. Minan barikaman lo min be se k’an dɛmɛ fana ka tiɲɛn kisɛw jɛnsɛn (Waaj. 11:6). Ladili dɔw filɛ minw be se k’an dɛmɛ ka baara ɲuman kɛ n’a ye.
2. An be se ka baro daminɛ cogo di ni sɛbɛnin ye?
2 Ka baro daminɛ: I be se k’o sɛbɛnin di i lamɛnbaga ma. Ani, ɲiningali wɔɔrɔ minw b’a ɲɛɛ fɔlɔ kan, i k’u yira a la ani k’a ɲininga ko: “E delila k’i yɛrɛ ɲininga u la juman na?” Mɛnni kɛ a fɛ. Ani o kɔ, a ka ɲiningali kelen jaabi i kɛtɔ ka Bibulu ka jaabili yira a la sɛbɛnin kɔnɔ. Vɛrise minw kofɔra, u la kelen kalan fana. Sɛbɛnin kɔɔ kalan wala a lakali ka surunya, ani gafe Bibulu ka kalan yira a la. Hali n’a ma sɔn o gafe la, a kɔni ye sɛbɛnin sɔrɔ min be se k’a to tiɲɛn kisɛw ka falen a dusukun na.—Mat. 13:23.
3. N’a tigi bolo degunnen lo, an be se ka mun lo kɛ do?
3 N’a tigi bolo degunnen lo: I be se k’a fɔ ko: “Komi i bolo degunnen lo sisan, sɛbɛ nin minɛ. Ɲiningali jɔnjɔn wɔɔrɔ be sɔrɔ a kɔnɔ ani a b’a yira ka gwɛ Bibulu be min fɔ k’u kelen kelen jaabi. N’an nana ɲɔgɔn ye kɔfɛ, i k’i ka miiriya fɔ n ye.”
4. Sɛbɛnin yiratɔ mɔgɔw la siradaw la, an be se ka mun lo fɔ?
4 Waajuli kɛtɔ siradaw la: I be se k’a fɔ ko: “A ni sɔgɔma. Yala i delila ka miiri ɲiningali nunu la kelen na wa? [Mɛnni kɛ a tigi fɛ.] Sɛbɛ nin be Bibulu ka jaabiliw yira. U gwɛnen lo ani u be mɔgɔ wasa.” N’a tigi kɔrɔtɔnen tɛ, i be se ka baro kɛ sɛbɛnin ka jaabili kelen kan ani ka gafe Bibulu ka kalan di a tigi ma yɛrɛ.
5. Ni mɔgɔw tɛ yen u ka soo, an be se ka baara kɛ tuma dɔw la ni sɛbɛnin ye cogo di?
5 Minw tɛ u ka soo: Kiin dɔw kɔnɔ, weleweledalaw ka teli ka gafew to mɔgɔw ye minw tɛ u ka soo, nka u b’u janto a la ko mɔgɔ wɛrɛw ɲɛɛ t’a la. Ni aw fana b’o lo kɛ aw ka kiinw kɔnɔ, mun na aw tɛ sɛbɛnin Tiɲɛn lɔn to mɔgɔw ye tuma dɔw la? Aw mana kɔsegi ka na, aw be se k’a fɔ ko: “O loon na, an nana a sɔrɔ aw tɛ yen aw ka soo. O kama an ye sɛbɛ nin ɲɔgɔn don daa jukɔrɔ. Aw b’a fɛ ka ɲiningali nunu la juman ka jaabili lɔn?”
6. Mun na sɛbɛnin Tiɲɛn lɔn ye fɛɛn barikaman ye min b’an dɛmɛ ka waajuli kɛ?
6 Sɛbɛnin Tiɲɛn lɔn be tiɲɛn ɲɛfɔ ka gwɛ cogo nɔgɔman na. A kalan be se ka diya mɔgɔ sifaw bɛɛ ye. A yira man gwɛlɛ, hali denmisɛnw ni weleweledala kuraw be se k’a to mɔgɔw bolo. Yala i be baara kɛ n’a ye sababuw bɛɛ la wa?