Dɛmɛ, denbayaw ye
1. Lɔgɔkun o lɔgɔkun, lafiɲɛlon tun be Israɛldenw ka denbayaw nafa cogo di?
1 Lafiɲɛlon tun ye labɛn ye Jehova ye min kɛ ni kanuya ye. Denbaya minw tun b’o labɛn labato, a tun b’u nafa. Israɛldenw tun be lafiɲɛ u ka loon o loon baaraw la ani u tun be wagati sɔrɔ ka miiri Jehova ka ɲumanya kan ani jɛnɲɔgɔnya min be u ni ale cɛ. O tun ye sababu ɲuman ye bangebagaw fɛ ka Sariya ka kumaw don u deenw dusukunw na (Dut. 6:6, 7). Lɔgɔkun o lɔgɔkun, lafiɲɛlon tun b’a to Jehova ka mɔgɔw ka wagati sɔrɔ k’u janto u ka Alakow la.
2. Lafiɲɛlon koo b’an kalan mun lo la Jehova koo la?
2 Ayiwa, Jehova t’a ɲini tugun denbayaw fɛ u ka lafiɲɛlon labato. Nka, an be kalan dɔ sɔrɔ o sariya la Ala koo la. A b’a janto kosɔbɛ a ka mɔgɔw ka hakilimaya koo la tuma bɛɛ (Es. 48:17, 18). Bi, Jehova b’a yira cogo min na ko a b’a janto a ka mɔgɔw la ni kanuya ye, o ye gwa kɔnɔ batoli ye sufɛ.
3. Batoli min be kɛ gwa kɔnɔ sufɛ, a kuun ye mun lo ye?
3 Batoli min be kɛ gwa kɔnɔ sufɛ, a kuun ye mun ye? Saan 2009 zanwiyekalo la, an y’a daminɛ ka kafo ka kitabukalan kɛ suu kelen na ni Ala ka Mara cidenyabaara lakɔli ani waajuliko lajɛn ye. O yɛlɛmani kuun dɔ tun ye ka denbayaw dɛmɛ u k’u ka jɛnɲɔgɔnya sabati ni Jehova ye u kɛtɔ ka suu tigitigi dɔ latigɛ batoli kama gwa kɔnɔ lɔgɔkun o lɔgɔkun. U ye denbayaw bɛɛ jija ko n’a be se ka kɛ, u k’u ka gwakalan loon yɛlɛma ka bila kitabukalan kɛlon na walisa ka baro kɛ ani ka kalan kɛ Bibulu kɔnɔ ni dususuman ye ka kɛɲɛ ni denbaya ka makoyaw ye.
4. Gwa kɔnɔ batoli ka kan ka dan lɛri kelen ma wa? A’ y’a ɲɛfɔ.
4 Walisa ka taga kafo ka kitabukalan na, an mako tun be wagati la walisa ka faniw don, ka tagama kɛ ani a ɲɔgɔnnaw. Ka taga o lɛri kelen lajɛn na, o tun be an caaman ka wagati fanba ta o loon sufɛ. Yɛlɛmani min donna an ka lajɛnw porogramu na, o y’a to denbayaw ye o loon suu sɔrɔ sisan ka jɛn ka Jehova bato. O kama, waajibi tɛ an ka gwa kɔnɔ batoli dan lɛri kelen dɔrɔn ma. Nka, an ka kan ka miiri an ka denbaya makoyaw n’a seko la ani ka gwa kɔnɔ batoli wagati latigɛ ka kɛɲɛ n’o ye.
5. Denbayamɔgɔw ka kan ka jɛn ka kalan kɛ ɲɔgɔn fɛ o wagati kuru bɛɛ kɔnɔ wa? A’ y’a ɲɛfɔ.
5 Yala denbayamɔgɔw ka kan ka jɛn ka kalan kɛ ɲɔgɔn fɛ o wagati kuru bɛɛ kɔnɔ wa? Furuɲɔgɔnmaw ni denbaya minw be ni deenw ye, ni olu be baro kɛ Bibulu kɔnɔkow kan, u be ɲɔgɔnw jija (Rom. 1:12). Denbayamɔgɔw be magwɛrɛ ɲɔgɔn na. O kama, batoli min be kɛ gwa kɔnɔ sufɛ, o fanba ka kan ka kɛ baro ye Bibulu kan. Nka, denbayamɔgɔ kelen kelen be se fana ka wagati ta ka kelenna kalan kɛ. Ɲɛyirali fɛ, gwakalan banni kɔ, denbayamɔgɔw be se ka to ɲɔgɔn fɛ ani ka kalan kɛ dan na dan na, i n’a fɔ ka tila lajɛnw labɛnni na wala ka zurunaliw kalan. Denbaya dɔw b’a latigɛ ka telewisɔn faga o loon suu kuru bɛɛ la.
6. Baro be se ka kɛ mun lo kan?
6 Baro be se ka kɛ mun lo kan? Waajibi tɛ a ka kɛ ɲiningali ni jaabili baro ye tuma bɛɛ. Walisa bɛɛ k’a daa don gwa kɔnɔ batoli la ani a ka diya, denbaya caaman ye porogramu dɔ latigɛ min be i n’a fɔ an ka lajɛn min be kɛ lɔgɔkun cɛmancɛ la. U be wagati tilan tilan ani ka koo sifa dɔw kɛ o wagatiw kɔnɔ. Ɲɛyirali fɛ, u be se ka Bibulu kalangwɛ kɛ ɲɔgɔn fɛ, ka lajɛnw yɔrɔ dɔ labɛn, ani ka waajuli faan dɔw kɛcogo kɛ ka filɛ. Ladili dɔw filɛ ɲɛɛ 6nan na.
7. Bangebagaw ka kan k’a to baro ka kɛ ni dusukunnata jumanw ye?
7 Bangebagaw ka kan k’a to baro ka kɛ ni dusukunnata jumanw ye? Aw ka denbayamɔgɔw bena nafa bɛrɛ sɔrɔ kalan na ni kanuya ni dusudiya be yen. Aw be se ka kalan kɛ kɛnɛma tuma dɔw la ni wagati ɲɛɛ ka ɲi. Ni aw mako b’a la ka lafiɲɛ dɔɔni, aw kana sigasiga k’o kɛ. Kalan banni kɔ, denbaya dɔw be dumuni kɛ ani ka minni kɛ fana. A bɛnnen tɛ bangebagaw ka gwa kɔnɔ batoli wagati ta ka deenw kɔrɔfɔ wala k’u kolo. U kɔni be se k’o wagati dɔ ta ka kuma delinanko juguw wala gwɛlɛya tigitigi dɔw koo la u ye minw kɔrɔsi. Nka ni koo dɔ ɲɛsinna deen dɔ ma tigitigi, a ka fisa ka baro kɛ n’o deen yɛrɛ ye a dan na walisa maloya kana kɛ a kan a kɔrɔw wala a dɔgɔw ɲɛɛ na. Batoli min be kɛ gwa kɔnɔ sufɛ, o man kan ka mɔgɔ sɛgɛn, nka o ka kan k’a yira ko an be hɛɛrɛtigi Ala lo batora.—1 Tim. 1:11.
8, 9. A ɲininen be gwatigiw fɛ u ka labɛn juman kɛ?
8 Gwatigi be se k’a yɛrɛ labɛn cogo di? Denbayamɔgɔw bena nafa bɛrɛ sɔrɔ kalan na ni gwatigi be kɔn k’a yɛrɛ labɛn gwa kɔnɔ batoli kelen kelen bɛɛ kama. A ka ɲi k’a filɛ baro bena kɛ fɛɛn min kan ani o kɛcogo fisaman ye min ye (Ntal. 21:5). A ka ɲi furucɛ k’a muso ka fɛta ɲininga o koo la (Ntal. 15:22). Gwatigiw, mun na aw tɛ aw deenw ɲininga tuma dɔw la k’a lɔn olu b’a fɛ baro ka kɛ min kan? Ni aw y’o kɛ, aw bena u ɲɛnakow n’u haminankow lɔn ka ɲɛ.
9 Tuma caaman na, gwatigi mako tɛna kɛ a la ka wagati caaman ta k’a yɛrɛ labɛn. N’a sɔrɔ a bena diya denbayamɔgɔw ye ka fɛɛn dɔw lajɛ lɔgɔkun o lɔgɔkun. O la, waajibi tɛ gwatigi ka na ni porogramu kura ye tuma bɛɛ. A be se k’a ye ko nafa b’a la k’a yɛrɛ labɛn kalan banni kɔ sabu gwamɔgɔw mako be min na Alako ta fan fɛ, o bele be a hakili la. Baro nata bena kɛ min kan, gwatigi dɔw b’o sɛbɛ papiye dennin dɔ kan ani u b’o nɔrɔ yɔrɔ min na bɛɛ be se k’a ye, i n’a fɔ firigo kan. O b’a to bɛɛ b’o loon ɲɛnafilɛ ni dusudiya ye ani minw ka kan k’u yɛrɛ labɛn, u be wagati sɔrɔ o kama.
10. Minw be u kelen na, u be se ka mun lo kɛ u ka gwa kɔnɔ batoli wagati la?
10 Nka ni ne kelen dɔrɔn lo do? Minw be u kelen na, u be se ka gwa kɔnɔ batoli wagati ta ka kelenna kalan kɛ. Koo jɔnjɔn minw ka kan ka kɛ u ka porogramu kɔnɔ, o ye ka Bibulu kalangwɛ kɛ, ka lajɛnw labɛn, ani ka La Tour de Garde ni Réveillez-vous ! kalan. Ka fara o kan, dɔw be koo wɛrɛw lajɛ minw ɲɛsinna u yɛrɛ ka makoyaw ma. Tuma kelen kelen, u be se ka weleweledala dɔ wala denbaya dɔ weele ka fara u yɛrɛ kan walisa ka ɲɔgɔn jija ni Bibulu kɔnɔ kumaw ye.
11, 12. Nafa jumanw b’a la ka gwa kɔnɔ batoli kɛ sufɛ tuma o tuma?
11 Nafa jumanw b’a la ka gwa kɔnɔ batoli kɛ sufɛ tuma o tuma? Minw be tiɲɛn batoli kɛ n’u dusukun bɛɛ ye, olu b’u magwɛrɛ Jehova la. Ka fara o kan, denbayamɔgɔ minw be jɛn ka batoli kɛ, u b’u ka jɛnɲɔgɔnya sabati. Piyɔniye dɔ n’a muso y’a sɛbɛ k’a yira olu ye duga minw sɔrɔ. U ko: “Komi an fila bɛɛ ye piyɔniyew ye ani deenw t’an fɛ, an be an ka gwa kɔnɔ batoli wagati makɔnɔ ni kɔrɔtɔ ye. An b’a ye ko o b’a to an be magwɛrɛ ɲɔgɔn na ani an sankolola Faa la. Sisan, an mana kunu an ka kalan kɛlon na, an b’a fɔ ɲɔgɔn ye ko: ‘Bi sufɛ, i b’a lɔn fɛɛn min b’an fɛ wa? An ka gwa kɔnɔ batoli lo!’ ”
12 Labɛn min y’a to an ye suu dɔ sɔrɔ batoli kama gwa kɔnɔ, denbaya minw bolo degunnen lo, a be olu fana dɛmɛ. Denba dɔ min b’a dencɛ fila lamɔna a kelen, ani a ye kudayi piyɔniye ye, ale y’a sɛbɛ ko: “Fɔlɔ la, an ka gwakalan tun nagasira. A tun tɛ kɛ tuma bɛɛ sabu ne sɛgɛnnen tun lo. Porogramu tigitigi tun ma sigi a kama . O la, ne be sɛbɛ nin ci aw ma ka aw fo kosɔbɛ sabu suu dɔ labilara batoli kama gwa kɔnɔ. Sisan an be sera ka gwakalan kɛ tuma bɛɛ ani an be a nafa sɔrɔla.”
13. Mun lo bena a to aw ka denbaya ka nafa sɔrɔ labɛn nin na?
13 Suu min labira batoli kama gwa kɔnɔ, o be i n’a fɔ lafiɲɛlon, nilifɛn lo ka bɔ an sankolola Faa yɔrɔ. A be se ka denbayaw dɛmɛ (Yak. 1:17). Israɛldenw ka denbayaw tun be nafa min sɔrɔ Alako ta fan fɛ lafiɲɛlon na, o tun be bɔ u ka koow kɛcogo la o loon na. O cogo kelen na, suu dɔ dira an ma batoli kama gwa kɔnɔ. An ka denbaya bena nafa min sɔrɔ a la, o be bɔ an ka koow kɛcogo lo la o sufɛ (2 Kɔr. 9:6; Gal. 6:7, 8; Kol. 3:23, 24). Ni aw be baara ɲuman kɛ n’o labɛn ye, aw ka denbaya bena se k’a fɔ i ko Zaburuw sɛbɛbaga y’a fɔ cogo min na ko: “Ne kɔni ka gɛrɛ Ala la, o ye ne ka hɛrɛ ye. Ne na ne jigi da Matigi Ala kan.”—Zab. 73:28.
[Koorilen ɲɛɛ 5 kan]
Batoli min be kɛ gwa kɔnɔ sufɛ, o man kan ka mɔgɔ sɛgɛn, nka o ka kan k’a yira ko an be hɛɛrɛtigi Ala lo batora
[Koorilen ɲɛɛ 6 kan]
A MARA
Hakilinata dɔw filɛ minw ɲɛsinna batoli koo ma gwa kɔnɔ sufɛ
Bibulu:
• A’ ye lɔgɔkun kɔnɔ ka Bibulu kalangwɛ yɔrɔ dɔ kalan ɲɔgɔn fɛ. N’a be se ka kɛ, mɔgɔ kelen be se ka lakalikumaw kalan ani tɔɔw be Bibulu kɔnɔ mɔgɔw ka darakumaw kalan.
• A’ ye Bibulu kalangwɛ yɔrɔ dɔ kɛ i n’a fɔ teyatiri.
• A’ ye kɔn ka cii di denbayamɔgɔ kelen kelen bɛɛ ma a ka sapitiri dɔ kalan Bibulu kɔnɔ ani a ka ɲiningali kelen wala fila sɛbɛ minw ɲɛsinna a ka kalangwɛ ma. O kɔ, a’ ye sɛgɛsɛgɛri kɛ ɲɔgɔn fɛ bɛɛ ka ɲiningaliw koo la.
• Lɔgɔkun o lɔgɔkun, a’ ye vɛrise dɔ sɛbɛ papiye dennin dɔ kan ani a’ y’a ɲini k’a mara aw hakili la ani k’a ɲɛfɔ. A’ ye to k’o papiye denninw mara ani lɔgɔkun bɛɛ, a’ y’u lajɛ ka filɛ aw hakili be bibulusen hakɛ min na.
• A’ ye Bibulu kalangwɛ kaan lamɛn aw kɛtɔ ka tugu o kɔ aw ka Bibuluw kɔnɔ.
Lajɛnw:
• A’ ye lajɛnw yɔrɔ dɔw labɛn ɲɔgɔn fɛ.
• Masaya dɔnkili minw bena la lɔgɔkun nata la, a’ ye olu degi.
• Ni aw dɔ bena kalan di Ala ka Mara cidenyabaara lakɔli la wala n’a bena ɲɛyirali dɔ kɛ waajuliko lajɛn na, a’ ye baro kɛ a kɛcogo kan wala a y’a kɛ ka filɛ denbayamɔgɔ tɔɔw ɲɛɛ na.
Denbaya ka makow:
• A’ ye gafe nunu kɔnɔkow lajɛ: Les jeunes s’interrogent wala Écoute le grand Enseignant.
• Gwɛlɛya min be se ka deenw sɔrɔ lakɔliso la, a’ y’o ɲɔgɔn ɲɛnabɔcogo kɛ ka filɛ.
• A’ ye ɲɛyirali dɔ kɛ min na denmisɛnw b’u yɛrɛ bila bangebagaw nɔɔ na. U be sɛgɛsɛgɛri kɛ koo dɔ kan ani u be hakili jagabɔ kɛ n’u bangebagaw ye.
Waajuli baara:
• Aw bena gafe minw yira wikɛni na, a’ ye ɲɛyiraliw kɛ ka aw yɛrɛ degi u yiracogo la.
• A’ ye baro kɛ ka filɛ aw be se ka laɲinita minw latigɛ ka kɛɲɛ n’aw seko ye walisa ka dɔ fara aw ka waajuli baara kan Hakilijigi wagati la wala vakansi tuma na.
• A’ ye miniti damanin di bɛɛ ma ka sɛgɛsɛgɛri kɛ mɔgɔw ka ɲiningaliw jaabicogo kan. Ani o kɔ, a’ ye o ɲiningaliw jaabicogo kɛ ka filɛ.
Ladili wɛrɛw:
• A’ ye zurunali kuraw ka barokun dɔ kalan ɲɔgɔn fɛ.
• A’ y’a ɲini bɛɛ kelen kelen fɛ a ka kɔn ka zurunali kuraw ka barokun dɔ kalan min diyara a ye kosɔbɛ, ani a k’o lakali.
• Tuma kelen kelen, a’ ye weleweledala dɔ wala balimacɛ dɔ n’a muso weele u ka jɛn n’aw ye gwa kɔnɔ batoli la sufɛ ani aw be se k’u ka fɛtaw ɲininga.
• A’ ye an ka videwo dɔ filɛ ani ka baro kɛ o kan.
• A’ ye baro kɛ barokun nunu kan Réveillez-vous ! kɔnɔ: “Les jeunes s’interrogent” wala “Apprenons en famille.”
• A’ ye baro kɛ barokun nunu kan La Tour de Garde kɔnɔ: “Enseignez vos enfants” wala “Pour nos jeunes lecteurs.”
• A’ ye Annuaire kura yɔrɔ dɔ kalan ani ka baro kɛ o kan, wala an ye gafe min sɔrɔ tile saba lajɛnba tɛmɛnen na.
• Lajɛnba dɔ tɛmɛnen kɔ, a’ ye baro kɛ a hakilinata jɔnjɔnw kan.
• Jehova yɛrɛ ye fɛɛn minw dan, a’ ye olu dɔw lajɛ ani a’ ye baro kɛ ka filɛ aw be kalan min sɔrɔ o la Jehova koo la.
• A’ ye jɛn ka fɛɛn dɔ dilan ɲɔgɔn fɛ i n’a fɔ fɛɛn dɔ modɛli, karti wala tablo.