A to Krista saya Hakilijigi wagati ka kɛ ninsɔndiya wagati ye!
1. Mun lo bena a to dɔ be fara an ka ninsɔndiya kan Krista saya Hakilijigi wagati la?
1 I b’a fɛ dɔ ka fara i ka ninsɔndiya kan marisi, awirili ani mɛ kalow la wa? N’o lo, i ka dɔ fara i ka waajuli baara kan. N’i be se, i ka kɛ piyɔniye kɔrɔsigi ye. Cogo juman na o bena a to dɔ be fara i ka ninsɔndiya kan?
2. N’an ye dɔ fara an ka waajuli baara kan, mun na dɔ bena fara an ka ninsɔndiya kan?
2 A to dɔ ka fara i ka ninsɔndiya kan: Jehova y’an dan ka Alako nege don an na. A b’a fɛ an ka se k’an ninsɔndiya ani ka wasa ale batoli la an kɛtɔ k’an ka Alako nege wasa (Mat. 5:3). A fana y’an dan cogo dɔ la walisa an ka ninsɔndiya sɔrɔ mɔgɔw sɔnni na (Kɛw. 20:35). Waajuli baara b’an dɛmɛ k’o koo fila dafa: ka Ala bato ani ka mɔgɔw dɛmɛ fana. O lo kama, n’an ye dɔ fara an ka waajuli baara kan, a bɛnnin lo an ka ninsɔndiyaba sɔrɔ. Ka fara o kan, n’an be waajuli kɛ caaman, an ka waajuli kɛcogo bena fisaya. N’a do fisayara, an jigi bena sigi ani dɔ bena bɔ an ka siranya na. An bena sababu caaman sɔrɔ ka seereya kɛ ani ka bibulukalanw daminɛ. O bɛɛ bena a to waajuli be diya an ye kosɔbɛ.
3. Mun na marisi ni awirili kalow bena sababu ɲuman di an ma ka kɛ piyɔniye kɔrɔsigiw ye?
3 Marisi ni awirili kalow bena sababu ɲuman di an ma ka kɛ piyɔniye kɔrɔsigiw ye sabu an bena se k’a sugandi ka lɛri 30 wala lɛri 50 kɛ. Ka fara o kan, an bena kanpaɲi diiman dɔ kɛ ka mɔgɔw weele u ka na Hakilijigi lajɛn na. O kanpaɲi bena daminɛ samedilon, marisi tile 22nan na ani a bena ban ntɛnɛlon awirili tile 14nan na. A bena kɛ ɲagaliba ye kafow kɔnɔ sabu mɔgɔ caaman bena baara kɛ “ni dusu kelen ye” walisa ka se ka welelisɛbɛw jɛnsɛn kiin caaman kɔnɔ wagati latigɛnin na.—Sof. 3:9.
4. N’an b’a fɛ ka kɛ piyɔniye kɔrɔsigi ye, an ka kan ka mun lo kɛ?
4 Labɛn kɛ sisan: N’i m’o kɛ fɔlɔ, wagati ta k’i ka porogramu lajɛ. A filɛ i be se ka labɛn min kɛ walisa ka dɔ fara i ka waajuli baara kan kalo kelen, wala kalo damanin kɔnɔ. I ka delili kɛ o koo la (Zaki 1:5). Baro kɛ o kan n’i somɔgɔw ni kafodenw ye (Talenw 15:22). N’i y’o kɛ, n’a sɔrɔ i bena a ye ko e fana be se ka kɛ piyɔniye kɔrɔsigi ye ani ka ninsɔndiya sɔrɔ o la hali n’i man kɛnɛ wala n’i bolo degunnin lo.
5. N’an ye dɔ fara an ka waajuli baara kan Krista saya Hakilijigi wagati la, mun lo bena kɛ do?
5 Jehova b’a fɛ a sagokɛlaw ka ninsɔndiya (Zab. 32:11). N’an y’an jija ka dɔ fara an ka waajuli baara kan Krista saya Hakilijigi wagati la, dɔ bena fara an ka ninsɔndiya kan. Nka o dɔrɔn tɛ dɛ, an bena an sankolola Faa ninsɔndiya fana.—Talenw 23:24; 27:11.