2 Kronika

30 Hizkiya ɖo ame ɖe Israel+ blibo la kple Yuda, eye wòŋlɔ agbalẽwo gɔ̃ hã ɖo ɖe Efrayim kple Manase+ be woava Yehowa ƒe aƒe la me le Yerusalem, ne woaɖu Ŋutitotoŋkekenyui na Yehowa, Israel ƒe Mawu la.+ 2 Eye fia la kple eƒe amegãwo kpakple ha blibo si le Yerusalem la ɖoe be yewoaɖu Ŋutitotoŋkekenyui la le ɣleti evelia me,+ 3 elabena womete ŋu ɖui le eɖuɣi o,+ le esi nunɔla geɖewo mete ŋu kɔ wo ɖokuiwo ŋu o,+ eye dukɔ la hã meƒo ƒu ɖe Yerusalem o ta. 4 Eye nya la dze fia la kple ha blibo la ŋu. 5 Eya ta wotso nya me be yewoaɖe gbeƒã le Israel blibo la katã, tso Beer-Seba va se ɖe Dan,+ ne woava ɖu Ŋutitotoŋkekenyui la na Yehowa, Israel ƒe Mawu la le Yerusalem, elabena ha blibo la katã megaɖui kpɔ abe ale si woŋlɔe ɖi ene o.+

6 Eya ta ame dɔdɔawo* xɔ agbalẽawo tso fia kple eƒe amegãwo si yi ɖatsa le Israel blibo la kple Yuda, le fia la ƒe sedede nu, gblɔ be: “Mi Israel-viwo, mitrɔ ɖe Yehowa, Abraham, Isak kple Israel ƒe Mawu la ŋu, ne wòatrɔ ɖe miaƒe ame susɔe, siwo do le Asiria-fiawo+ si me la ŋu. 7 Eye miganɔ abe mia tɔgbuiwo kple mia nɔvi siwo mewɔ nuteƒe na Yehowa, wo tɔgbuiwo ƒe Mawu la ene o, elabena ewɔ wo wozu ŋɔdzinu, abe ale si tututu miele ekpɔm ene.+ 8 Azɔ migalia kɔ abe mia tɔgbuiwo ene o.+ Mibɔbɔ mia ɖokui na Yehowa, eye miva eƒe kɔkɔeƒe+ si ŋu wòkɔ tegbee la, eye misubɔ Yehowa mia Mawu la, ne dziku helĩhelĩ si wòdo ɖe mia ŋu la nu nafa.+ 9 Elabena ne mietrɔ ɖe Yehowa ŋu la, ekema ame siwo ɖe aboyo+ mia nɔviwo kple mia viwo la akpɔ nublanui na wo, eye woaɖe mɔ na wo woatrɔ agbɔ va anyigba sia dzi,+ elabena Yehowa mia Mawu la sea veve ɖe ame nu, ekpɔa nublanui na ame,+ eye maɖe kɔ ɖa le mia ŋu ne mietrɔ va egbɔ o.”+

10 Eya ta ame dɔdɔawo* yi ɖatsa le du sia du me le Efrayim-nyigba kple Manase-nyigba+ dzi, va ɖo keke Zebulon ke, gake wonɔ alɔme ɖem le wo ŋu henɔ wo kom.+ 11 Ke ame aɖewo bɔbɔ wo ɖokuiwo le Aser, Manase kple Zebulon, eye wova Yerusalem.+ 12 Mawu vavã la kpɔ ŋudzedze ɖe Yuda ŋu, eye wòna wowɔ ɖeka,* ne woawɔ fia kple amegãwo ƒe sedede la dzi le Yehowa ƒe nya la nu.

13 Ale ame gbogbo aɖewo ƒo ƒu ɖe Yerusalem be woaɖu Amɔwɔ Maʋamaʋã Bolo Ŋkekenyui+ la le ɣleti evelia+ me; eye wonye ha gã aɖe ŋutɔ. 14 Wotso heɖe vɔsamlekpui siwo le Yerusalem la ɖa,+ woɖe dzudzɔdomlekpuiwo katã ɖa,+ eye wotsɔ wo ƒu gbe ɖe Kidron-tɔʋu la me. 15 Eye wowu Ŋutitotolã la le ɣleti evelia ƒe ŋkeke wuienelia dzi. Ŋukpe lé nunɔlawo kple Lewi viwo ale be wokɔ wo ɖokuiwo ŋu eye wotsɔ numevɔsawo va Yehowa ƒe aƒe la me. 16 Eye wotsi tsitre ɖe wo nɔƒe le woƒe ɖoɖo la nu, le Mawu vavã ƒe ame Mose ƒe Se la nu; eye nunɔlawo hlẽa ʋu+ si woxɔ le Lewi viwo si la. 17 Ame geɖewo nɔ ha la me siwo mekɔ wo ɖokuiwo ŋu o, eye Lewi viwoe wode dɔ asi na be woawu Ŋutitotolãwo ɖe ame siwo katã ŋu mekɔ o la nu,+ ne woakɔ wo ŋu na Yehowa. 18 Elabena dukɔ la me tɔ gbogbo aɖewo, vevietɔ ame siwo tso Efrayim, Manase,+ Isakar kple Zebulon la mekɔ wo ɖokuiwo ŋu o, gake woɖu Ŋutitotolã la wòtsi tre ɖe ale si woŋlɔe ɖi la ŋu. Gake Hizkiya do gbe ɖa ɖe wo ta gblɔ be: “Yehowa dɔmenyotɔ+ la nakpɔ eme na 19 ame sia ame si dzra eƒe dzi ɖo ɖe Mawu vavã+ Yehowa, si nye tɔgbuiawo ƒe Mawu, la didi ŋu, togbɔ be mekɔ eɖokui ŋu abe ale si wòle le kɔkɔenyenye ƒe ɖoɖoa nu ene o hã.”+ 20 Ale Yehowa ɖo to Hizkiya, eye wòtsɔe ke dukɔ la.*

21 Ale Israel-vi siwo le Yerusalem la ɖu Amɔwɔ Maʋamaʋã Bolo Ŋkekenyui+ la ŋkeke adre kple dzidzɔ gã aɖe,+ eye Lewi viwo kple nunɔlawo nɔ Yehowa kafum, tso ŋkeke yi ŋkeke, eye wonɔ woƒe haƒonuwo ƒom sesĩe na Yehowa.+ 22 Gawu la, Hizkiya ƒo nu de dzi ƒo* na Lewi vi siwo tsɔ beléle nɔ Yehowa ƒe dɔwo wɔm. Eye woɖu nu le azãɖuɣia katã ŋkeke adre,+ wosa ŋutifafavɔwo,+ eye woda akpe na Yehowa, wo tɔgbuiwo ƒe Mawu la.

23 Eye ha blibo la katã ɖoe be yewoagaɖui ŋkeke adre bubu kpee, ale wogaɖui kple dzidzɔ ŋkeke adre sɔŋ.+ 24 Eye Yuda-fia Hizkiya na nyitsu akpe ɖeka kple alẽ akpe adre ha la, eye amegãwo hã na nyi akpe ɖeka kple alẽ akpe ewo ha la;+ eye nunɔla geɖewo kɔ wo ɖokuiwo ŋu.+ 25 Eye Yuda ƒe ha blibo la katã, nunɔlawo, Lewi viwo kple ha blibo si tso Israel+ kple amedzro+ siwo tso Israel-nyigba dzi va kpakple ame siwo le Yuda la kpɔ dzidzɔ. 26 Dzidzɔ gã aɖe nɔ Yerusalem, elabena tso Israel-fia Salomo, David vi, ƒe ŋkekeawo me la, esia tɔgbi megadzɔ kpɔ le Yerusalem o.+ 27 Mlɔeba nunɔla Lewi viwo tso heyra dukɔ la;+ eye Mawu se woƒe gbe, ale be woƒe gbedodoɖa de eƒe nɔƒe kɔkɔe la, le dziƒo.