1 Korintotɔwo
3 Eya ta nɔviwo, nyemete ŋu ƒo nu na mi abe ame siwo tsi le gbɔgbɔ me ene o,+ ke boŋ abe ŋutilãmemewo ene, abe vidzĩwo+ le Kristo me ene. 2 Mena notsi mi mieno, ke menye nuɖuɖu sesẽ o, elabena miesẽ ŋu nyuie ɣemaɣi o. Le nyateƒe me la, miesẽ ŋu nyuie fifia hã o,+ 3 elabena ŋutilãmemewo ko mieganye.+ Esi ŋuʋaʋã kple dzre le mia dome la, ɖe menye ŋutilãmemewoe mieganye,+ eye miegale zɔzɔm abe ame bubuwo ke ene oa? 4 Elabena ne ame aɖe be, “Paulo tɔe menye,”+ eye ame bubu be, “Apolo tɔe nye ya menye” la, ekema menye ɖe miele nu wɔm abe ame bubuwo ke ene oa?
5 Evɔ ɖe, ame kae nye Apolo? Eye ame kae nye Paulo? Subɔla+ siwo dzi mieto zu xɔsetɔwoe wonye, abe ale si Aƒetɔ la dee asi na ame sia ame ene. 6 Medo nu,+ Apolo de tsii,+ ke Mawue nana wòtsina, 7 ale be ame si do nu la menye naneke o, eye ame si de tsii hã menye naneke o, ke Mawu, ame si nana wòtsina la boŋ.+ 8 Ame si doa nu kple ame si dea tsii la wosɔ,* ke ame sia ame axɔ eya ŋutɔ ƒe fetu le eƒe agbagbadzedze nu.+ 9 Elabena Mawu ƒe hadɔwɔlawo míenye. Miawoe nye Mawu ƒe agble si dem wòle, Mawu ƒe xɔtutu.+
10 Le Mawu ƒe amenuveve la ta la, meɖo xɔ gɔme anyi+ abe xɔtula bibi* ene, ke ame bubu le etum ɖe edzi. Gake ame sia ame nakpɔ ale si wòle etum ɖe edzii la gbɔ nyuie. 11 Elabena ame aɖeke mate ŋu aɖo gɔmeɖoanyi bubu aɖeke wu esi li xoxo, si nye Yesu Kristo o.+ 12 Ke ne ame aɖe tsɔ sika, klosalo, kpe xɔasiwo, ati, bè, alo gbe tui ɖe gɔmeɖoanyia dzi la, 13 ame sia ame ƒe dɔwɔwɔ ava dze ƒãa woakpɔ, elabena ŋkeke la aɖee afia, elabena dzoe woatsɔ aɖee afia;+ eye dzo la ŋutɔ ado xɔ si ƒomevi ame sia ame tu la kpɔ. 14 Ne ame aɖe ƒe xɔ si wòtu ɖe edzi la tsi anyi la, axɔ fetu; 15 ne ame aɖe ƒe dɔ fiã la, ke nu abu nɛ, ke woaɖe eya ŋutɔ ya; gake anɔ abe dzo mee woɖee tsoe ene.
16 Ðe mienyae be Mawu ƒe gbedoxɔe mienye,+ eye Mawu ƒe gbɔgbɔ la le mia me oa?+ 17 Ne ame aɖe gblẽ Mawu ƒe gbedoxɔ la dome la, Mawu atsrɔ̃ eya hã; elabena Mawu ƒe gbedoxɔ la le kɔkɔe, eye miawoe nye gbedoxɔ ma.+
18 Ame aɖeke nagable eɖokui o: Ne mia dometɔ aɖe susu be yenye nunyala le nuɖoanyi* sia me la, nezu bometsila, ale be wòazu nunyala. 19 Elabena xexe sia me nunya nye bometsitsi le Mawu gbɔ; elabena woŋlɔ ɖi be, “Eléa nunyalawo le woawo ŋutɔwo ƒe ayedzedze me.”+ 20 Eye wogaŋlɔ ɖi be: “Yehowa* nya be nunyalawo ƒe tamebubuwo nye dzodzro.”+ 21 Eya ta ame aɖeke megaƒo adegbe le amewo ŋuti o; elabena nuwo katã nye mia tɔ, 22 eɖanye Paulo, Apolo, alo Kefas*+ o, eɖanye xexea o, eɖanye agbe alo ku o, eɖanye nu siwo li fifia alo nu siwo gbɔna o, nuwo katã nye mia tɔ; 23 ke miawo hã mienye Kristo tɔ;+ ke Kristo hã nye Mawu tɔ.