1 Kronika

11 Emegbe Israel-viwo katã va ƒo ƒu ɖe David gbɔ le Hebron+ gblɔ be: “Kpɔ ɖa! Wò ƒu kple wò ŋutilã* míenye.+ 2 Tsã esime Saul nye fia la, wòe nɔa ŋgɔ na Israel le eƒe aʋahohowo+ me.* Eye Yehowa wò Mawu gblɔ na wò be: ‘Wòe akplɔ nye dukɔ Israel, eye wòe azu kplɔla ɖe nye dukɔ Israel nu.’”+ 3 Ale Israel ƒe ametsitsiwo katã va fia la gbɔ le Hebron, eye David bla nu kpli wo le Hebron le Yehowa ŋkume. Emegbe wosi ami na David wòzu fia ɖe Israel dzi,+ le Yehowa ƒe nya si wògblɔ to Samuel dzi la nu.+

4 Emegbe David kple Israel blibo la katã ho yi Yerusalem, si woyɔna be Yebus,+ si nye anyigba si dzi Yebusitɔwo+ nɔ. 5 Yebusitɔwo gblɔ na David be: “Màva afi sia akpɔ o!”+ Ke hã David xɔ Zion+ mɔ́ si woyɔna fifia be David Ƒe Du la.+ 6 Eye David gblɔ be: “Ame si atre Yebusitɔwo sisi la, azu tatɔ kple amegã.” Eye Yoab,+ Zeruya vi, tre hoho yi, ale be wòzu tatɔ. 7 Eye David va nɔ mɔ́ sesẽ la me. Esia tae woyɔe be David Ƒe Du ɖo. 8 Eye wòtso du la godoo va kpe tso Kpo* la gbɔ va se ɖe teƒe siwo ƒo xlãe, eye Yoab ɖɔ du la ƒe akpa susɔea ɖo. 9 Ale David le ŋusẽ kpɔm ɖe edzi,+ eye aʋakɔwo ƒe Yehowa nɔ kplii.

10 Ke ame siawoe nye David ƒe aʋawɔla kalẽtɔwo ƒe tatɔwo; woawo kple Israel blibo la katã nɔ megbe nɛ sesĩe le eƒe fiaɖuɖu la me, ne woaɖoe fiae le Yehowa ƒe nya si wògblɔ le Israel ŋu la nu.+ 11 David ƒe kalẽtɔwo ŋkɔwoe nye esi: Yasobeam,+ si nye Hakmonitɔ aɖe ƒe vi, eye wònye kalẽtɔ etɔ̃awo ƒe tatɔ.+ Ewu ame alafa etɔ̃ kple eƒe akplɔ le aʋakpekpe ɖeka me.+ 12 Eya yome Eleazar,+ Dodo vi, Ahohitɔ.+ Enye kalẽtɔ etɔ̃awo dometɔ ɖeka. 13 Eyae nɔ David gbɔ le Pas-Damim,+ afi si Filistitɔwo ƒo ƒu le hena aʋawɔwɔ. Ƒo le agble aɖe me fũu le afi ma; eye dukɔ la si le Filistitɔwo nu. 14 Ke Eleazar tɔ ɖe agble la titina, eye wòwɔ avu ɖe eta, eye wòsi Filistitɔwo, ale Yehowa xɔ na wo, eye woɖu dzi gã aɖe.*+

15 Tatɔ blaetɔ̃awo dometɔ etɔ̃ yi David gbɔ le agakpe la gbɔ, le Adulam-gado+ la me, esime Filistitɔwo ƒe aʋakɔ aɖe va ƒo ƒu ɖe Refaim Bali la me.+ 16 Ɣemaɣi David nɔ teƒe si yiyi sesẽ la, eye Filistitɔwo ƒe aʋakɔ aɖe nɔ Betlehem. 17 Eye David ɖe dzodzro vevi aɖe si le eme la gblɔ be: “Oo, ne ɖe makpɔ vudo* si le Betlehem+ ƒe agbo nu la me tsi ano ɖe!” 18 Ale ŋutsu etɔ̃awo ge ɖe Filistitɔwo ƒe asaɖa la me sesẽe heku tsi le vudo* si le Betlehem ƒe agbo nu la me tsɔ vɛ na David; ke David melɔ̃ no tsia o, ke boŋ ekɔe ɖe anyi na Yehowa. 19 Egblɔ be: “Menyo kura be mawɔ nu sia o le nye Mawu ta! Ŋutsu siawo, siwo tsɔ woƒe agbewo*+ de afɔku me la, ƒe ʋue manoa? Elabena woƒe agbewoe* wotsɔ de afɔku me hafi kui vɛ.” Eya ta egbe enono. Nu siawoe ŋutsu kalẽtɔ etɔ̃awo wɔ.

20 Abisai,+ Yoab+ nɔvi nye ame etɔ̃ bubuwo ƒe tatɔ; eda akplɔ wu ame alafa etɔ̃, eye wòxɔ ŋkɔ abe ame etɔ̃awo ke ene.+ 21 Exɔ ŋkɔ le ame etɔ̃awo dome wu eve bubuawo, eye wòva zu woƒe tatɔ; ke hã, mexɔ ŋkɔ de kalẽtɔ etɔ̃ gbãtɔawo nu o.

22 Benaya,+ Yehoyada vi, nye ŋutsu kalẽtɔ,* ame si wɔ kalẽnu geɖewo le Kabzeel.+ Ewu Ariel si tso Moab la viŋutsu eveawo, eyae yi vudo* me ɖawu dzata+ le ŋkeke aɖe si dzi sno dza. 23 Ewu Egipte ŋutsu dzɔtsu aɖe si kɔkɔ abɔklugui atɔ̃*+ la. Togbɔ be akplɔ si le abe avɔlɔ̃lawo+ ƒe agbabɔ ene la nɔ Egiptetɔ la si hã la, etsɔ kpo ɖe asi yi Egiptetɔ la gbɔ ɖaxɔ akplɔ la le esi, eye wòtsɔ eya ŋutɔ ƒe akplɔ la wui.+ 24 Nu siawoe Benaya, Yehoyada vi wɔ, eye wòxɔ ŋkɔ abe ŋutsu kalẽtɔ etɔ̃awo ke ene. 25 Togbɔ be exɔ ŋkɔ le ame blaetɔ̃awo dome hã la, meɖo kalẽtɔ etɔ̃ gbãtɔawo ƒe ɖoƒe o.+ Ke hã, David tsɔe ɖo eya ŋutɔ ŋu dzɔlawo nu.

26 Ŋutsu kalẽtɔ siwo le aʋakɔawo mee nye: Asahel,+ Yoab nɔvi; Elhanan, Dodo si tso Betlehem+ ƒe vi; 27 Haroritɔ Samot; Pelonitɔ Helez; 28 Ira,+ Tekoatɔ Ikes ƒe vi; Anatottɔ Abi-Ezer;+ 29 Husatɔ Sibekai;+ Ahohitɔ Ilai; 30 Netofatɔ Maharai;+ Netofatɔ Baana ƒe vi Heled;+ 31 Itai, Ribai, si tso Benyamin viwo+ ƒe du Gibea me la ƒe vi; Piratontɔ Benaya; 32 Hurai, si tso afi si Gaas-tɔʋuwo*+ le; Arbattɔ Abiel; 33 Bahurimtɔ Azmavet; Saalbonitɔ Eliyaba; 34 Gizonitɔ Hasem ƒe viwo; Hararitɔ Sage ƒe vi Yonatan; 35 Hararitɔ Sakar ƒe vi Ahiam; Ur vi Elifal; 36 Mekaratitɔ Hefer; Pelonitɔ Ahiya; 37 Karmeltɔ Hezro; Naarai, Ezbai vi; 38 Yoel, Natan nɔvi; Mibhar, Hagri vi; 39 Zelek, Amon vi; Beerottɔ Naharai, ame si nye Zeruya vi Yoab ƒe adekplɔvi; 40 Ira, Yitri vi; Gareb, Yitri vi; 41 Uriya,+ Hititɔ la; Zabad, Ahlai vi; 42 Adina, Ruben-tɔ Siza ƒe vi, ame si nye Ruben viwo ƒe tatɔ, si ŋu ame blaetɔ̃ le; 43 Hanan, Maaka vi, kple Mitnitɔ Yosafat; 44 Asterattɔ Uziya; Sama kple Yeiel, ame siwo nye Aroertɔ Hotam ƒe viwo; 45 Yediael, Simri vi, kple nɔvia Tizitɔ Yoha; 46 Mahavitɔ Eliel; Yeribai kple Yosaviya, ame siwo nye Elnaam viwo kple Moabtɔ Yitma; 47 Eliel, Obed kple Mezobaitɔ Yaasiel.