Ta 74

Aɖaŋuɖoɖo na Marta, kple Gbedodoɖa ŋuti Nufiafia

LE YESU ƒe subɔsubɔdɔa wɔwɔ le Yudea me la, eyi ɖe Betania-kɔƒea me. Afisiae Marta, Maria kple wo nɔviŋutsu Lazaro le. Ðewohĩ Yesu do go ame etɔ̃ siawo va yi le eƒe subɔsubɔdɔa me eyata enye wo xɔlɔ̃ vevi xoxo. Eɖanye aleke nya la le hã la, Yesu yi Marta ƒe aƒeme fifia eye Marta xɔe.

Marta tsi dzi be yeana nu nyuitɔ kekeake si le ye si la Yesu. Le nyateƒe me la, enye bubu gã aɖe na ame be Mesia si ŋugbe wodo la nava eƒe aƒeme! Eyata Marta ƒo eɖokui ɖe nuɖuɖu aɖe si lɔ nu geɖe ɖe eme la ɖaɖa kple nu geɖe bubu siwo ana Yesu nase vivi le eƒe sasrãkpɔa me eye eƒe dzi nadze eme wu la wɔwɔ me.

Ke Marta nɔvinyɔnu Maria ya bɔbɔ nɔ Yesu ƒe afɔ nu heɖo toe. Le ɣeyiɣi aɖe megbe la, Marta va eye wògblɔ na Yesu bena: “Aƒetɔ, ɖe metsɔ ɖeke le eme bena, nɔvinye gblẽ nye ɖeka ɖi na subɔsubɔ o mahã? Gblɔe nɛ azɔ, ne wòakpe asi ɖe eŋu nam.”

Gake Yesu melɔ̃ ɖe edzi be yeagblɔ nya aɖe na Maria o. Ke boŋ exlɔ̃ nu Marta le alesi wòtsi dzi ɖe ŋutilãmenuwo ŋu akpa la ta. Egbe nya nɛ dɔmenyotɔe bena: “Marta, Marta, èle agbagba dzem, eye nèle fu ɖem na ɖokuiwò le nu geɖewo ŋuti, ke nu [ʋee aɖewo alo nu] ɖeka koe le vevie.” Yesu le gbɔgblɔm be mehiã be woazã ɣeyiɣi geɖe ɖe nuɖuɖu vovovo geɖe ɖaɖa be woaɖu zi ɖeka ŋu o. Nuɖuɖu ƒomevi ʋee aɖewo alo ɖeka ko sɔ gbɔ.

Susu nyui ye le Marta si; edi be yeanye aƒenɔ amedzrowɔla. Gake le alesi wòtsi dzi ɖe ŋutilãmenuwo ŋu ta, mɔnukpɔkpɔ si wòatsɔ axɔ nufiafia tso Mawu ŋutɔ ƒe Vi la gbɔ la le eŋu tom! Eyata Yesu ƒo nya ta bena: “Maria tia nyuia gome, si womele xɔxɔ ge le esi o.”

Emegbe ɣebubuɣi la, nusrɔ̃la aɖe gblɔ na Yesu be: “Aƒetɔ, fia gbedodoɖa mí, abe alesi Yohanes fia eƒe nusrɔ̃lawo ene.” Anye be nusrɔ̃la sia menɔ anyi anɔ abe ƒe ɖeka kple afã ene do ŋgɔ esime Yesu fia kpɔɖeŋugbedodoɖa la le eƒe Todzimawunya la me o. Eyata Yesu gagblɔ eƒe mɔfiafia la ake, gake azɔ eyi edzi gblɔ kpɔɖeŋu aɖe tsɔ ɖo kpe alesi wòhiã be woaku kutri le gbedodoɖa me la dzi.

Yesu dze egɔme bena: Mia dometɔ ka si xɔlɔ̃ anɔ, eye wòayi egbɔ le zãtitina, eye wòagblɔ nɛ bena: Xɔ̃, do abolo etɔ̃ nam; elabena xɔ̃nye aɖe tso mɔ dzi va gbɔnye, ke naneke mele asinye maɖo ekɔme o; eye ɖe ame ma aɖo eŋu nɛ le xɔa me agblɔ bena: Megaɖe fu nam o; ʋɔ la le tutu xoxo, eye vinyewo le aba dzi kplim, nyemate ŋu afɔ ana wò o mahã? Mele egblɔm na mi bena: Ne mefɔ, eye wònae le xɔlɔ̃, si wònye nɛ ta o la, ekema le fu, si ɖem wòle nɛ ta la afɔ, eye wòanae alesi nu dim wòle.”

Yesu meto nyawo tsɔtsɔ sɔ kple wo nɔewo alea dzi le gbɔgblɔm be Yehowa Mawu melɔ̃na be yeawɔ nu ɖe kokoƒoƒowo nu o, abe alesi xɔlɔ̃ si nɔ ŋutinya la me la wɔe ene o. Ao, ke boŋ kpɔɖeŋu fiam wòle be ne xɔlɔ̃ si medi be yeana kpekpeɖeŋu o la atsɔ nusi wobia kutrikukutɔe ana la, ekema aleke gbegbe mía Fofo lɔlɔ̃tɔ si le dziƒo la awɔe wue nye si! Eyata Yesu yi edzi be: ‘Eyata mele egblɔm na mi bena: Minɔ ebiabia dzi, eye woana mi; minɔ edidi dzi, eye miakpɔ; minɔ ʋɔƒoƒo dzi, eye woaʋui na mi. Elabena amesiame, si le nu biam la, exɔnɛ, eye amesi le nu dim la, ekpɔnɛ, eye amesi le ʋɔ ƒom la, woaʋui nɛ.’

Azɔ Yesu ƒo nu tso vifofo amegbetɔ nuvɔ̃wɔla madeblibowo ŋu be: “Ke fofo ka le mia dome, si via abia aboloe, eye wòana kpee, alo tɔmelã, eye wòana dae ɖe tɔmelã teƒe mahã? Alo ne abia koklozi la, wòana dziɖegbee mahã? Azɔ mi, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana gbɔgbɔ kɔkɔe amesiwo bianɛ la o mahã?” Aleke Yesu ƒe nyawo hetua ame ɖoe nye si be woaku kutri le gbedodoɖa me. Luka 10:38–11:13.

▪ Nukatae Marta nɔ asi trɔm le nu geɖe ŋu nenema na Yesu?

▪ Nukae Maria wɔ, eye nukatae Yesu kafu eya boŋ ke menye Marta o?

▪ Nukae ʋã Yesu be wògagbugbɔ eƒe nufiafia ku ɖe gbedodoɖa ŋu la fia?

▪ Aleke Yesu gblɔ alesi wòhiã be woaku kutri le gbedodoɖa me la ƒe kpɔɖeŋue?