‘Ehiã be Míado Dzi’
“DZIDODO hiã” nenye be ‘míaxɔ ŋugbedodo la.’ (Hebritɔwo 10:36) Biblia-nyalagã aɖe ɖe eme be Helagbe me nya si gɔme woɖe be “dzidodo” si apostolo Paulo zã le ŋɔŋlɔ sia me ɣeaɖewoɣi te ŋu fiaa “ŋutete si le numiemie ŋu be wòanɔ agbe le nɔnɔme sesẽ madeamedziwo me.”
Le to siwo le Europa dzi la, numiemie sia ƒomevi tututu miena le afima. Nusi ɖe dzesi enye be wotsɔ ŋkɔ nɛ be agbe tegbee. Numiemie sia si le Alps-towo dzi menɔa agbe tegbee ya o, gake ete ŋu doa dzi ƒe geɖe, eye wòƒoa se dzeaniwo le dzomeŋɔli ɖesiaɖe. The New Encyclopaedia Britannica ɖe eme be wotsɔ ŋkɔ agbe tegbee na numiemie la elabena “enɔa te ɖe nɔnɔme sesẽwo nu eye wònɔa anyi didina.” (Ŋkɔ si dzɔdzɔmeŋutinunyalawo na ati siawo ƒomevi si nye Sempervivum hã gɔmee nye “agbe tegbee.”)
Nusi na numiemie sia si nɔa anyi didina la ɖe dzesi enye be teƒe siwo nɔnɔmeawo menyo kura le o lae wòtsina le. Àte ŋu akpɔe le towo ŋu, afisi ya ƒona le sesĩe eye dzoxɔxɔa te ŋu yia dzi abe 35°C ene le gaƒoƒo 24 ko me. Ete ŋu toa ke le kpeto siwo me ke sue aɖe ko le la me. Nukawoe na wòte ŋu doa dzi le nɔnɔme sesẽ siawo me?
Agbe tegbee la ƒe aŋgbawo te ŋu lɔ̃a tsi, eye wòdzranɛ ɖo nyuie. Esia na wòte ŋu wɔa tsidzadza alo sno siwo le nyinyim ŋudɔ bliboe. Hekpe ɖe eŋu la, womiena ɖe ƒuƒoƒowo me si na woƒe ŋusẽ wɔ ɖeka be woali ke ɖe kpeawo dzi sesĩe. Esi woto ke ɖe kpetowo me ta la, enyea takpɔkpɔ nɛ tso yame ƒe nɔnɔmewo ŋu, togbɔ be ke sue aɖe koe anɔ anyi hã. Ne míagblɔe bubui la, etsina nyuie to nɔnɔme sesẽwo ŋudɔwɔwɔ nyuie alesi wòate ŋui me.
Le gbɔgbɔ me gome la, míate ŋu akpɔ mía ɖokui le nɔnɔme siwo ado míaƒe dzidodo ƒe vavãnyenye kpɔ me. Nukae akpe ɖe mía ŋu míado dzi le dodokpɔ me? Abe agbe tegbee numiemie ene la, míate ŋu adzra Mawu ƒe Nya ƒe tsi si naa agbe la ɖo eye míade ha kplikplikpli kple Kristotɔ vavãwo hena kpekpeɖeŋu kple takpɔkpɔ. Ƒo ye katã ta la, abe Alps-towo dzi seƒoƒoa ene la, míate ŋu alé ɖe Yehowa, míaƒe “agakpe,” kple eƒe Nya kpakple eƒe habɔbɔa ŋu goŋgoŋ.— Samuel II, 22:3.
Nyateƒee, agbe tegbee numiemie la nye ŋkuɖodzinu nyui aɖe na mí be le nɔnɔme sesẽwo me gɔ̃ hã la, míate ŋu ado dzi ne míewɔ nunana siwo li la ŋudɔ bliboe. Yehowa ka ɖe edzi na mí be dzidodo ma ƒomevi ana ‘míanyi ŋugbedodoawo ƒe dome,’ si fia be míanɔ agbe tegbee ŋutɔŋutɔ.—Hebritɔwo 6:12; Mateo 25:46.