‘Mawue Mesi Tso’
TETEKPƆWO kple nyaƒoɖeamenuwo le dzidzim ɖe edzi agbadre le ‘ɣeyiɣi sesẽ siawo siwo me nɔnɔ sesẽ’ me. Le kpɔɖeŋu me, woate ŋu ado míaƒe anukwareɖiɖi akpɔ le dɔwɔƒe. Sukuhatiwo ate ŋu ado míaƒe agbedzadzɛnɔnɔ akpɔ. Eye xexe si gblẽ ku le agbenyuinɔnɔ gome la doa míaƒe nuteƒewɔwɔ kpɔna zi geɖe.—Timoteo II, 3:1-5.
Biblia-ŋlɔla Asaf hã nɔ anyi le ɣeyiɣi si nuvɔ̃ɖiwɔwɔ bɔ la me. Eŋɔlimetɔ aɖewo tsɔa woƒe mawumavɔ̃mavɔ̃ nuwɔnawo ƒoa adegbee gɔ̃ hã. Asaf ŋlɔe bena: “Dàda enye woƒe kɔdzonu, eye wotsyɔ ŋutasesẽ abe avɔ ene. Wole alɔme ɖem le nu ƒom le nu vɔ̃ɖi wɔwɔ ŋuti, wole kɔkɔƒe le nu ƒom le teteɖeanyi ŋuti do ɖa.” (Psalmo 73:6, 8) Ðe nuwɔna sia ɖi esi nènya?
Agbe ma nɔnɔ doa nuxaxa geɖe na amesiwo di be yewoawɔ nu dzɔdzɔe, eɖea dzi le wo ƒo gɔ̃ hã. Asaf fa konyi be: “Mekpea fu gbesiagbe, . . . hiãkame wònye le ŋkunye me.” (Psalmo 73:14, 16) Ðewohĩ àse le ɖokuiwò me nenema, gake dzi megaɖe le ƒowò o! Asaf te ŋu nɔ eŋɔlime nuvɔ̃ɖiwɔwɔwo nu, eye wò hã àte ŋui. Gake alekee?
Asaf va dze sii be le amegbetɔ ƒe dziɖuɖu madeblibo te la, dzɔdzɔenyenye vavãtɔ mate ŋu anɔ anyi tututu o. (Psalmo 146:3, 4; Lododowo 17:23) Eyata, le esi teƒe be wòagblẽ eƒe ɣeyiɣi, ŋusẽ, kple nunɔamesiwo anɔ agbagba dzem be yeaɖe nuvɔ̃ɖiwɔwɔ siwo katã nɔ edzi yim ƒo xlãe ɖa la, elé fɔ ɖe eƒe ƒomedodo kple Mawu ŋu boŋ. Asaf gblɔ be: “Nye la, Mawu ƒe gbɔnyenɔnɔ enye nye dzidzɔ; meɖo ŋu [ɖe] Aƒetɔ Yehowa ŋu.”—Psalmo 73:28.
Egbea la, ŋutilãmenuwo sua amesiwo tsaa asi le mɔ fitifitiwo nu la si. Wo dometɔ geɖe ate ŋu aƒo adegbe le alesi wogbea Mawu ƒe agbenyuinɔnɔ sewo dzi wɔwɔ gɔ̃ hã ŋu. Gake womanɔ anyi tegbee o. Asaf de dzesii be: “Nyateƒee, ètsɔ wo ɖo ɖiɖiƒe, eye nèxlã wo ɖe anyi wozu anyiglãgo.”—Psalmo 73:18.
Ẽ, le Mawu ƒe ɣeyiɣi ɖoɖi dzi la, woaɖe amefuflu, ŋutasesẽ, kple nufitifitiwɔwɔ, kpakple mawumavɔmavɔ̃ nuwɔna siwo wòle be Kristotɔ vavãwo natsri la katã ɖa. Biblia do ŋugbe be: “Woatsrɔ̃ ame vlowo, ke amesiwo kpɔa mɔ na Yehowa la, woanyi anyigba la dome.” (Psalmo 37:9) Vaseɖe ɣemaɣi la, mina míagblɔ nya si hakpala la gblɔ be: “Yehowa, nye agakpe, nye mɔ̃ kple nye xɔnametɔ; Mawu, nye aga, si mesi tso.”—Psalmo 18:3.