Epafra—“Kristo ƒe Subɔla Nyateƒetɔ”
AMEKAE ɖo Kristo-hame siwo nɔ Korinto, Efeso, kple Filipi? Ðewohĩ àɖo eŋu enumake be: ‘Paulo, “trɔ̃subɔlawo ƒe apostolo” ’ ye. (Romatɔwo 11:13) Wò ŋuɖoɖoa asɔ.
Gake amekae ɖo hame siwo nɔ Kolose, Hierapoli, kple Laodikea? Togbɔ be míeka ɖe edzi o hã la, ŋutsu si ŋkɔe nye Epafra ye wòanye. Aleke kee nyaa le o, ɖewohĩ àdi be yeanya nu bubu geɖe tso nyanyuigblɔla sia ŋu, elabena woyɔe be “Kristo ƒe subɔla nyateƒetɔ.”—Kolosetɔwo 1:7.
Lycus Bali me Nyanyuigblɔla
Ŋkɔ Epafra nye Epafrodito ƒe yɔyɔ kpuie. Gake mele be míasusu be Epafra ye nye Epafrodito si tso Filipi o. Kolose, si nye teƒe etɔ̃ siwo Kristo-hamewo nɔ le Lycus Bali me, le Asia Sue, ye Epafra tso. Kolose gbɔ didi kilometa 18 tso Laodikea gbɔ eye egbɔ didi kilometa 19 tso Hierapoli, le blema Frigia nutome.
Biblia mekɔ nu me tsitotsito le alesi Mawu Fiaɖuƒea ŋuti nyanyuia wɔ ɖo Frigia o. Gake Frigiatɔwo va Yerusalem le Pentekoste ŋkekea dzi le ƒe 33 M.Ŋ. me, eye ɖewohĩ Kolose ye wo dometɔ aɖewo tso va. (Dɔwɔwɔwo 2:1, 5, 10) Esime Paulo va wɔ subɔsubɔdɔ le Efeso (le ƒe 52-55 M.Ŋ. lɔƒo) la, ɖase si wòɖi le nuto ma me nu sẽ eye etse ku ale gbegbe be menye Efesotɔwo ɖeɖekoe “se Aƒetɔ ƒe nya la” o, ke “amesiwo katã le Asia la, Yudatɔwo kple Helatɔwo siaa” hã see. (Dɔwɔwɔwo 19:10) Adze abe ɖe Paulo megblɔ nyanyuia le Lycus Bali la katã me o ene, elabena ame geɖe siwo va zu Kristotɔwo le nuto ma me la mekpɔe kpɔ o.—Kolosetɔwo 2:1.
Le Paulo ƒe nya nu la, Epafra ye nye amesi fia “Mawu ƒe amenuveve le nyateƒe me la” Kolosetɔwo. Alesi Paulo yɔ hadɔwɔla sia be “Kristo ƒe subɔla nyateƒetɔ na mi” la fia be Epafra nye nyanyuigblɔla veviedonula aɖe le nuto ma me.—Kolosetɔwo 1:6, 7.
Apostolo Paulo kple nyanyuigblɔla Epafra siaa tsi dzi ɖe woƒe haxɔsetɔ siwo nɔ Lycus Bali me ƒe gbɔgbɔ me nyonyo ŋu vevie. Dzi adzɔ Paulo si nye “trɔ̃subɔlawo ƒe apostolo” la ŋutɔ esi wòse nya tso woƒe ŋgɔyiyi ŋu. Menye ame bubu aɖekee gblɔ nɔnɔme si me Kolosetɔwo nɔ le gbɔgbɔ me la na Paulo wu Epafra o.—Kolosetɔwo 1:4, 8.
Epafra ƒe Nyatakaka
Kuxi sesẽwo dze ŋgɔ Kolosetɔwo si ƒoe ɖe Epafra nu be wòzɔ mɔ legbee yi Roma kple taɖodzinu koŋ be yeadzro nya siawo me kple Paulo. Nya siwo Epafra va gblɔ tsitotsito lae ʋã Paulo be wòŋlɔ lɛta eve ɖo ɖe nɔvi siwo anye ne manya naneke tso wo ŋu hafi o la. Lɛtaawo dometɔ ɖeka nye Kolosetɔwo tɔ. Woɖo lɛta evelia, si edze ƒã be womedzrae ɖo o la ɖe Laodikeatɔwo. (Kolosetɔwo 4:16) Esɔ be míabui be ɖe woɖoe be lɛtaawo me nyawo nakpɔ Kristotɔ mawo ƒe kuxi siwo Epafra de dzesii la gbɔ. Nuhiahiã kawoe wòde dzesii? Eye nukae esia ɖe fia mí le eƒe amenyenye ŋu?
Edze abe Kolosetɔwo ƒe lɛta la fia be Epafra tsi dzi be trɔ̃subɔlawo ƒe xexemenunya siwo dome nuteteameɖokui, gbɔgbɔyɔyɔ, kple trɔ̃subɔsubɔ ƒe aʋatsodzixɔse nɔ la nye mɔ̃ na Kristotɔ siwo nɔ Kolose la ene. Gakpe ɖe eŋu la, ɖewohĩ Yudatɔwo ƒe nufiafia le nuɖuɖu tsitsri kple azã aɖewo ɖuɖu ŋu kpɔ ŋusẽ ɖe hamea me tɔ aɖewo dzi.—Kolosetɔwo 2:4, 8, 16, 20-23.
Alesi Paulo ŋlɔ nu tso nyati siawo ŋu fia alesi gbegbe Epafra nɔ ŋudzɔ eye wòtsia dzi ɖe ehati Kristotɔwo ƒe nuhiahiãwo ŋui la mí. Esi wònya nu tso afɔku siwo le nuto si me wole ŋu ta la, eɖe ɖetsɔleme fia lɔlɔ̃tɔe ɖe woƒe gbɔgbɔ me nyonyo ŋu. Epafra di aɖaŋuɖoɖo tso Paulo gbɔ, si fia be ebɔbɔa eɖokui. Ðewohĩ ekpɔe be yehiã aɖaŋuɖoɖo tso amesi kpɔ nuteƒe wu gbɔ. Aleke ke nyaa le o, Epafra wɔ nu le nunya me.—Lododowo 15:22.
Amesi De Asixɔxɔ Gbedodoɖa Ŋu
Le lɛta si Paulo ŋlɔ ɖo ɖe Kolose Kristotɔwo ƒe nuwuwu la, egblɔ be: “Epafra, amesi tso mia dome, si nye Kristo ƒe dɔla la, ɖuɖɔ mi ƒã; eyae nye amesi nɔa mia ta ʋlim le gbedodoɖa me ɖaasi, bene mianɔ tsitre abe amesiwo le blibo, eye wokpɔ kakaɖedzi blibo le Mawu ƒe lɔlɔ̃nu katã ŋuti ene. Elabena mele ɖase ɖim le eŋuti bena, ekpɔ agbagbadzedze geɖe le mia kple amesiwo le Laodikea kpakple amesiwo le Hierapoli la ta.”—Kolosetɔwo 4:12, 13.
Ẽ, esime Epafra nye Paulo ‘hati gamenɔla’ le Roma gɔ̃ hã la, enɔa tame bum le nɔvia lɔlɔ̃tɔ siwo nɔ Kolose, Laodikea, kple Hierapoli ŋu eye edoa gbe ɖa ɖe wo ta. (Filemon 23) Le nyaa ŋutɔ nu la, ‘edagba’ ɖe wo ta le gbedodoɖa me. Agbalẽnyala D. Edmond Hiebert gblɔ be Helagbe me nya si wozã le afisia fia “dɔwɔwɔ kutrikukutɔe si ta woabu nane ɖo,” esi sɔ kple “ʋiʋli” si me Yesu Kristo to le susu me esime wònɔ gbe dom ɖa le Getsemane-bɔa me. (Luka 22:44) Enye Epafra ƒe didi vevie be yeƒe gbɔgbɔ me nɔviŋutsu kple nɔvinyɔnuwo nali ke eye woaɖo Kristotɔwo ƒe tsitsi blibo gbɔ. Yayra ka gbegbee nye si nɔviŋutsu sia si bua gbɔgbɔmenuwo ŋu la anye na hameawo!
Esi woyɔ Epafra be “hadɔwɔla lɔlɔ̃tɔ” ta la, ɖikeke aɖeke mele eme o be eƒe nuwɔna na be ehati Kristotɔwo lɔ̃e. (Kolosetɔwo 1:7) Ne nɔnɔmeawo ɖe mɔ la, ele be hamea me tɔ ɖesiaɖe natsɔ eɖokui ana faa le vividodoɖeameŋu kple lɔlɔ̃ me. Le kpɔɖeŋu me, míate ŋu abu kpekpe ɖe dɔnɔwo, ame tsitsiwo, alo amesiwo ŋu hiahiã tɔxɛwo le la ŋu. Ðewohĩ agbanɔamedzi vovovowo anɔ hamea me si gbɔ wòle be woakpɔ, alo woate ŋu akpe asi ɖe teokrasi xɔtudɔwo ŋu.
Gbedodoɖa ɖe ame bubuwo ta nye subɔsubɔ kɔkɔe ƒomevi si amesiame ate ŋu awɔ abe alesi Epafra wɔe ene. Míate ŋu aƒo nu tso alesi míetsɔ ɖe le eme na Yehowa subɔla siwo dze ŋgɔ afɔku vovovo siwo nye gbɔgbɔ me alo ŋutilã me kuxiwoe ŋu. Ne míeʋli mía ɖokui sesĩe to mɔ sia nu la, míate ŋu anɔ abe Epafra ene. Mɔnukpɔkpɔ kple dzidzɔ ate ŋu asu mía dometɔ ɖesiaɖe si be míanye “hadɔwɔla lɔlɔ̃tɔ” le Yehowa subɔla nyateƒetɔwo ƒe ƒomea me.