Nya Ɣaɣla Alea Gbegbe Gɔme Ðe?

“NANEKE mekpea ame abe nya ɣaɣla ene o.” Eɖale eme o, nenemae Franseawo ƒe lododo aɖe gblɔ. Ðe wòanye be esia tae dzi dzɔa mí ne míese nya ɣaɣla aɖe evɔ wòvea mí ɣeaɖewoɣi ne míate ŋu agblɔe oa? Gake ƒe alafa geɖewoe nye sia si ame geɖe lɔ̃ nyawo tsɔtsɔ ɣla, eye woɖoa adzamehabɔbɔwo bene woaminya taɖodzinu aɖe.

Adzamehabɔbɔ siawo ƒe gbãtɔwo ƒe ɖewoe nye vivimeha siwo nɔ Egipte, Hela, kple Roma. Emegbe habɔbɔ siawo dometɔ aɖewo ɖe asi le woƒe mawusubɔsubɔ ŋusẽkpɔɖeamedzi ŋu heva vu ɖe dunyahehe, ganyawo, alo hadomenyawo ŋu le aye me. Le kpɔɖeŋu me, esime woɖo asitsahawo ɖe Europa le titinaɣeyiɣiwo me la, alesi hameviawo ƒe ganyawo natsɔ afɔ nyuie tae wotsɔa nyawo ɣlana ɖo.

Encyclopædia Britannica gblɔ be susu nyui aɖewo tae woɖoa adzamehabɔbɔwo ɖo zi geɖe egbea, anye hena “hadomedɔwɔnawo alo dɔmenyowɔwɔ” kple “be woana kpekpeɖeŋu eye woafia nu amewo.” Nɔvisihabɔbɔwo, sɔhɛhabɔbɔwo, dunenyohabɔbɔwo, kple habɔbɔ bubu aɖewo hã nye adzamehabɔbɔwo alo wowɔa nu le adzame vie. Zi geɖe la, habɔbɔ siawo meɖoa tame vɔ̃ o, adzamenuwɔwɔ koe vivia hameviawo nu. Adzamekɔnu siwo wowɔna tsɔ xɔa ame ɖe ha la me dzroa wo vevie eye wòna havilɔlɔ̃ kple ɖekawɔwɔ me sẽna le wo dome. Habɔbɔa me tɔwo kpɔnɛ be yewole ha me eye tameɖoɖo le yewo si. Zi geɖe la, adzamehabɔbɔ siawo tɔgbe menyea afɔku na amesiwo mele habɔbɔa me o. Nya ɣaɣlaawo manyamanya megblẽa naneke le amesiwo mele eme o ŋu o.

Ne Susu Vɔ̃ Dze le Nya Ɣaɣla Me

Menye adzamehabɔbɔwo katãe tsɔa nuwo ɣlana sɔsɔe o. Gake wo dometɔ siwo “ɣlaa nyawo ɖe wo nɔewo,” abe alesi Encyclopædia Britannica gblɔe ene la, nye afɔku tɔxɛ gã aɖe. Eɖe eme be amegã siwo le habɔbɔa me “tsɔa ŋkɔ tɔxɛwo, atamkanyawo, alo sidzedze dea dzesi wo ɖokuiwo etɔxɛe” ale woʋãa “habɔbɔa me tɔ tsɛwo hã be woadze agbagba alesi dze be woaɖo ɖoƒe kɔkɔ mawo.” Afɔku si le habɔbɔ siawo tɔgbe me la dze kɔte. Ðewohĩ esi sidzedze mawo mesu habɔbɔa me tɔ tsɛwo si haɖe o ta la, habɔbɔa ƒe taɖodzinu ŋutɔŋutɔwo manɔ nyanya na wo kura o. Ele bɔbɔe be nàɖo habɔbɔ si ƒe taɖodzinuwo kple mɔ siwo dzi wotona ɖoa wo gbɔ siwo mènya tututu o eye ɖewohĩ womeɖe wo me na wò tututu o la me. Gake asesẽ na amesi wokplɔ de habɔbɔ sia me be wòaɖe ga eɖokui emegbe; le kpɔɖeŋunyagbɔgblɔ nu la, ewɔ abe ɖe wode nya ɣaɣla kɔsɔkɔsɔe ene.

Gake ne habɔbɔ aɖe nɔa hlɔ̃nuwɔwɔ kple taɖodzinu manɔsenuwo yome ale wodzea agbagba be woaganya nu tso yewo ŋu o la, nya tsɔtsɔ ɣla ganyea afɔku si gasẽ wu. Alo ne wonya be woli eye wonya eƒe taɖodzinuwo la, wodzea agbagba be woaɣla emenɔlawo kple nusi woɖo be woawɔ le ɣeyiɣi kpui aɖe me. Aleae ŋɔdzidoha gã siwo tsɔa woƒe ŋɔdzidonamenuwɔnawo ʋuʋua xexeame ɣeaɖewoɣi la le.

Ẽ, nyawo tsɔtsɔ ɣla ate ŋu anye afɔku na ame ɖekaɖekawo kple amehawo siaa. De ŋugble le sɔhɛ gbevuwo ƒe adzamehabɔbɔ siwo dzea ɖekemanyalawo dzi anyratɔe, nuvlowɔhawo abe adzamehabɔbɔ si woyɔna be Mafia, yevu dzidelawo ƒe habɔbɔ si nye Ku Klux Klana ene, hekpe ɖe ŋɔdzidoha gbogbo siwo le xexeame katã siwo yi edzi le ŋutifafa kple dedienɔnɔ ƒe agbagbadzedzewo me gblẽm la ŋu kpɔ.

Susu Kae Le Wo Si Fifia?

Nusi do tso Dukɔwo Dome Nyaʋiʋlia me le ƒe 1950 ƒeawo me ƒe akpa aɖee nye be woɖo adzamehabɔbɔwo le Ɣetoɖoƒe Europa dukɔ geɖe me bene woanye tsitretsiɖeŋuhawo nenye be Soviettɔwo adi be yewoaɖu Ɣetoɖoƒe Europa dzi. Le kpɔɖeŋu me, Germanytɔwo ƒe nyadzɔdzɔgbalẽ si nye Focus gblɔ be, “wotu aʋawɔnudzraɖoxɔ 79 le adzame” ɖe Austria le ɣeyiɣi sia me. Menye Europa-dukɔwo katã gɔ̃ hãe nya nu tso habɔbɔ siawo ŋu o. Nyadzɔdzɔgbalẽ aɖe gblɔ nyateƒetɔe le ƒe 1990 ƒeawo ƒe gɔmedzedze be: “Habɔbɔ siawo ƒe xexlẽme si li egbea kple nusi woɖo ɖe tame fifia mele nyanya o kokoko.”

Nyateƒe tututue. Amekae ate ŋu anya adzamehabɔbɔ siawo dometɔ neni ƒe nuwɔnae anye afɔku gã si lolo wu alesi míasusui le ɣeyiɣi sia me?

[Etenuŋɔŋlɔ]