Amekae Woabu Fɔe?

Ame geɖe bua fɔ Mawu ɖe woƒe fukpekpewo ta. Biblia ƒe lododo aɖe gblɔ be: “Amegbetɔ ƒe bometsitsie nana eƒe mɔ glɔ̃na; ke eƒe dzi nyrãna ɖe Yehowa ŋu.” (Lododowo 19:3) Gake ne wobu fɔ Mawu be egbɔe amegbetɔ ƒe fukpekpewo tso la, ke ɖeko wòle abe alesi woabu fɔ ʋuwɔla be eya gbɔe wòtso be amewo mua aha kua ʋu hekpɔa ʋufɔku ene.

Mawu tsɔ mɔfiafia xɔasi na ameƒomea le eƒe Nya, Biblia me. Ne míesrɔ̃ agbalẽ vovovo ƒe ƒuƒoƒo sia si tso Mawu gbɔ me nyawo eye míewɔ se kple gɔmeɖose siwo le eme dzi la, míate ŋu aƒo asa na agbemefɔku geɖe. Gake afɔkue míakpɔ ne míewɔ nusi to vovo na Mawu ƒe mɔfiafia. Le kpɔɖeŋu me amesiwo ɖua nu tsu, noa atama, noa ahatsu, alo nɔa agbe gbegblẽ la ƒe lãme gblẽna kutɔkutɔe zi geɖe. (Luka 21:34; Korintotɔwo I, 6:18; Korintotɔwo II, 7:1) Kristotɔ apostolo Paulo ŋlɔ bena: “Nusi ke ame ƒãna la, esia ke wòaŋe. Elabena amesi ƒã nu ɖe eƒe ŋutilã me la, aŋe gbegblẽ atso eƒe ŋutilã me; ke amesi ƒã nu ɖe Gbɔgbɔ me la, aŋe agbe mavɔ atso Gbɔgbɔ me.”—Galatiatɔwo 6:7, 8.

Aleke gbegbe wòanyo wue nye si be míanɔ agbe ɖe Mawu ƒe sewo kple gɔmeɖosewo nu! Ne míenɔ agbe ɖe wo nu la, míakpɔ ŋugbe si Mawu do to nyagblɔɖila Yesaya dzi ƒe nyateƒenyenye teƒe be: “Nye Yehowa, wò Mawu, enye amesi fia nusi nyo na wò la wò, nyee akplɔ wò to mɔ, si dzi nato la. Ðe wònye ɖe nèɖo to nye seawo la, anye ne wò ŋutifafa anɔ abe tɔsisi ene, eye wò dzɔdzɔenyenye anɔ abe ƒutsotsoewo ene.”—Yesaya 48:17, 18.