Dzɔdzɔmekue Maria Kua?

VATICAN ƒe nyadzɔdzɔgbalẽ si nye L’Osservatore Romano gblɔ be ele Katolikotɔwo ƒe Maria ƒe Dziƒoyiyi nufiafia la me be: “Dzɔdzɔmenuvɔ̃ ƒe kpɔtsɔtsɔ aɖeke mele Ðetugbi Nɔaƒe Kɔkɔe la ŋu o, eye esi wòwu eƒe anyigbadzigbenɔnɔ nu la, wokɔe yi dziƒoŋutikɔkɔe me le ŋutilã kple luʋɔ me.” Nyadzɔdzɔgbalẽa gblɔ be nufiafia sia na Katoliko mawunyaŋununyala aɖewo gblɔna be Maria “meku o eye wokɔe enumake tso anyigbadzigbenɔnɔ me yi dziƒoŋutikɔkɔe me.”a

Nyitsɔ laa la, Papa John Paul II ɖe nya la me bubui. Le Amehawo ƒe Takpekpe me le Vatican le June 25, 1997 dzi la, egblɔ be: “Nubabla Yeyea megblɔ nya aɖeke le nɔnɔme si me Maria ku le ŋu o. Nya aɖeke magblɔmagblɔ tso eŋu alea ana woasusu be dzɔdzɔmekue wòku, ɖeko womenya dzɔdzɔmeku gobi kae o. . . . Edze abe kpeɖodzi aɖeke mele amesiwo susu be menye dzɔdzɔmekue wòku o si o ene.”

Papa John Paul ƒe nya na wòdze ƒã be woda vo gã aɖe le Fufɔfɔ Kɔkɔe ƒe nufiafia la me. Ne “dzɔdzɔmenuvɔ̃ ƒe kpɔtsɔtsɔ aɖeke mele” Yesu dada ŋu o ɖe, ke aleke wɔ hafi Maria ku “dzɔdzɔmeku” si nye nuvɔ̃ si míexɔ tso Adam si wɔ nuvɔ̃ gbɔ me tsonu? (Romatɔwo 5:12) Nukpɔsusu totro si le Katoliko-ha la si le Yesu dada ŋu gbɔe wòtso be wotsi vedome le mawunyaŋutinufiafia sia ŋu. Eyata mewɔ nuku o be mamã kple tɔtɔ ɖo Katoliko-ha la me le nya sia ŋu.

Togbɔ be Biblia gblɔ le Maria ŋu be enye ɖokuibɔbɔla, nuteƒewɔla, kple mawuvɔ̃la hã la, megblɔ nɔnɔme siawo tsɔ tɔ ɖe “fufɔfɔ kɔkɔe” aɖeke ŋu o. (Luka 1:38; Dɔwɔwɔwo 1:13, 14) Biblia gblɔ kpuie ko be: “Wo katã wɔ nuvɔ̃, eye Mawu ƒe ŋutikɔkɔe hiã wo tim.” (Romatɔwo 3:23) Ẽ, Maria nyi nuvɔ̃ kple blibomademade ƒe dome abe ameƒomea me tɔ bubuwo ke ene, eye naneke meli si ɖo kpe edzi be menye dzɔdzɔmekue wòku o.—Tsɔe sɔ kple Yohanes I, 1:8-10.

[Etenuŋɔŋlɔ]