Fiaɖuƒe Gbeƒãɖelawo Ka Nya Ta
Agbenɔnɔ Ðokuibɔbɔtɔe ɖe Yehowa ƒe Nudidiwo Nu
“MIDI Yehowa, mi amesiwo katã bɔbɔ mia ɖokui ɖe anyi le anyigba dzi.” Hebritɔ nyagblɔɖila Zefanya ƒe amekpekpe sia si wògblɔ ƒe alafa 26 kple edzivɔe nye sia gale yiyim na amewo le anyigba bliboa katã dzi egbea. (Zefanya 2:3) Yehowa didi gɔme ɖe? Wodzea esia wɔwɔ gɔme to sidzedze nyateƒe Mawu gbagbe ɖeka kolia, Yehowa, dzi.—Yeremya 10:10; Yohanes 17:3.
Gake sidzedze ɖeɖe menaa woakpɔa tenɔnɔ nyui le Mawu ŋkume o. Ele be amea natsɔ sidzedze sia ade dɔwɔwɔ me hã hafi Mawu nakpɔ ŋudzedze ɖe eŋu. Alekee? To alesi wòana eƒe agbenɔnɔ kple nuŋububu nawɔ ɖeka kple Mawu ƒe dzidzenuwo abe alesi nuteƒekpɔkpɔ si gbɔna tso Suriname fiae ene la mee.—Efesotɔwo 4:22-24.
Eddy si nye nufiala si le eƒe ƒe 30-awo me di nyabiabiawo abe: ‘Akpa ka wɔmee subɔsubɔhawo le le egbe xexeame?’ kple ‘Ðe Biblia si nye blemagbalẽ la wɔ ɖeka kple dzɔdzɔmeŋutinunya egbea?’ ene ƒe ŋuɖoɖo dzeameŋuwo vevie. Eddy ɖo to nyuie esi Yehowa Ðasefowo yi egbɔ heɖo nya siawo ŋu tso Biblia me. Ewɔ nuŋlɔɖiwo kura gɔ̃ hã be yeava to Ðasefoawo ƒe numeɖeɖeawo me.
Do ŋgɔ la, Eddy nɔ subɔsubɔha aɖe si fiae be amegbetɔwo dzɔ tso kese siwo ŋu Mawu trɔ asi le la me. Eyata esi Ðasefoawo tsɔ agbalẽ si nye Life—How Did It Get Here? By Evolution or by Creation? nɛ la, exɔe enumake. Alesi agbalẽa ɖe nuwɔwɔ ƒe nuŋlɔɖi si le Biblia me wòkɔe la wɔ dɔ ɖe edzi. To Biblia si wòsrɔ̃ me la, eva kpɔe dze sii kɔtee be yeke ɖe nyateƒea ŋu!
Gake edze ŋgɔ dodokpɔ aɖe fifia. Eddy nɔ aƒe aɖe si me tɔwo nye fiafiwo kple anukwaremaɖilawo me. Eyata tiatiawɔwɔ dze ŋgɔe: be wòadze amesiwo wo kplii wole aƒeme ƒe agbenɔnɔ manyomanyoawo yome loo alo atsri nuwɔna mawo ahanɔ agbe si dea bubu Mawu ŋu. Nunyatɔe la, Eddy tia evelia. Edzudzɔ ha vɔ̃ɖiwo katã dede heʋu le aƒea me.—Korintotɔwo I, 15:33, 34.
Esi Eddy dze kpekpewo dede le Fiaɖuƒe Akpata me gɔme megbe la, ewɔ ŋgɔyiyi kabakaba. Ewɔ asitɔtrɔ le eƒe awudodo kple dzadzraɖo hã me hedze nusi srɔ̃m wòle la gbɔgblɔ gɔme na xɔ̃awo kple eƒe ƒometɔwo. Emegbe esi woɖe mɔ nɛ be wòakpɔ gome le gbeƒãɖeɖe ‘nyanyuia’ me le gaglãgbe la, eƒe dzidzɔkpɔkpɔ dzi ɖe edzi. (Mateo 24:14; Dɔwɔwɔwo 20:20) Ŋkeke si lalam wònɔ vevie va ɖo esi wòtsɔ nyɔnyrɔxɔxɔ ɖe tsi me ɖo kpe eƒe adzɔgbeɖeɖe na Yehowa dzi le December 1996 me.
Ƒe sia ƒe la, dzi anukwaretɔ akpe alafa nanewo xɔa amekpekpea be ‘woadi Yehowa.’ Ne wowɔe nenema la, wokpɔa Lododowo 22:4 si gblɔ be: “Kesinɔnu, bubu kple agbe enye fetu tso ɖokuibɔbɔ kple Yehowa vɔvɔ̃ me” la ƒe nyateƒenyenye. Ẽ, to agbenɔnɔ ɖokuibɔbɔtɔe ɖe Yehowa ƒe nudidiwo nu me la, nyateƒea lɔ̃lawo xɔa yayra mawo fifia, eye wotsɔ kakaɖedzi le mɔ kpɔm na yayra mavɔwo le anyigba dzi afisia.—Psalmo 37:29.
[Anyigbatata siwo le axa 18]
(For fully formatted text, see publication.)
Caribbean Ƒu
GUYANA
SURINAME
FRENCH GUIANA
BRAZIL
[Afi Si Míexɔ Mɔɖeɖe Tso]
Globe: Mountain High Maps® Copyright © 1997 Digital Wisdom, Inc.