‘Nusi Wòle Be Míawɔ Koe Míewɔ’
ABE ALESI GEORGE COUCH GBLƆE ENE
Esi míewɔ aƒeme yi aƒeme gbeƒãɖeɖedɔa ŋdi ma vɔ la, nye kpeɖeŋutɔ ɖe abolo eve si me wode lãe ɖe go be míaɖu. Esi míeɖui vɔ la, meɖe sigaret be mano. Ebia be: “Ƒe nenie nye sia nèle nyateƒea me?” Megblɔ nɛ be: “Etsɔ fiẽ ye nye zi gbãtɔ mede kpekpe kpɔ.”
WODZIM le March 3 lia, 1917, dzi le agble aɖe si didi kilometa 50 tso Pittsburgh, Pennsylvania, U.S.A., ƒe ɣedzeƒe gbɔ, le duvi si ŋkɔe nye Avonmore gbɔ. Afimae dzinyelawo nyi mía kple nɔvinyeŋutsu ene kple daanye le.
Womena mawusubɔsubɔhehe boo aɖeke mí o. Dzinyelawo dea sɔleme tsã, gake wova dzudzɔ dede esi míenye ɖevi suewo ko. Gake míexɔ Wɔla la dzi se, eye míezã Biblia ƒe gɔmeɖose nyanyɛwo le míaƒe ƒomegbenɔnɔ me.
Hehe nyuitɔ kekeake si mexɔ tso dzinyelawo gbɔe nye agbanɔamedzi—alesi woaxɔe ahatsɔe. Nenema koŋ ye agbledzigbenɔnɔ nɔ. Gake míaƒe agbenɔnɔ menye dɔ sɔŋ ko wɔwɔ o. Míese vivi le modzakaɖeɖe tuameɖowo, abe basketball kple baseball ƒoƒo, sɔdodo, kple tsiƒuƒu ene me. Ga mebɔ le ɣemaɣiwo me o, gake agbenɔnɔ le agblea dzi vivi. Xɔ ɖekɛ suku mee míede gɔmedzesuku le, eye míeyi kɔledzi le dua me.
Mía kple xɔ̃nye aɖe míenɔ ablɔ dzi zɔm fiẽsi aɖe. Nyɔnuvi dzetugbe aɖe do go tso eƒeme va do gbe na xɔ̃nyea. Xɔ̃nyea ɖem fia Fern Prugh. Ede mía dzi be aƒe si me wònɔ la nɔ mɔdodo si dzi kɔledzia le gbɔ. Zi geɖe ne meto eƒe aƒe ŋu va yina la, Fern nɔa xexe nɔa aƒemedɔwo wɔm. Edze ƒã be dɔ sesẽ wɔlae wònye, eyae nye nusi wɔ dɔ ɖe dzinye. Ƒomedodo kplikplikpli kple lɔlɔ̃ na mía nɔewo va ɖo mía dome, eye míeɖe mía nɔewo le April, 1936, me.
Biblia me Nyateƒea Kpɔkpɔ
Hafi woava dzim la, nyɔnu tsitsi aɖe nɔ anyi si ƒe nya duametɔwo melɔ̃na o le subɔsubɔha si me wònɔ la ta. Ne danye yina nuƒleƒe le dua me le Memleɖagbewo la, etoa egbɔ ɖasranɛ kpɔ. Dada dzraa aƒeme ɖo nɛ, eye wòkpena ɖe eŋu le dɔ vevi bubuwo wɔwɔ nɛ me vaseɖe esime nyɔnua ku. Meka ɖe edzi be Yehowa yra Danye elabena enyo dɔme na nyɔnu sia si nye Biblia Nusrɔ̃vi, si nye ŋkɔ si woyɔna na Yehowa Ðasefowo ɣemaɣi.
Ɣeaɖeɣi le ema megbe la, tasinye ƒe vinyɔnu ɖevitɔ va ku kpata. Sɔlemeha la mete ŋu fa akɔ boo aɖeke na tasinye o, gake aƒelika aɖe si nye Biblia Nusrɔ̃vi fa akɔ nɛ. Biblia Nusrɔ̃via ɖe nusi dzɔna ne ame ku la me nɛ. (Hiob 14:13-15; Nyagblɔla 9:5, 10) Esia nye akɔfafatsoƒe gã aɖe ŋutɔ. Tasinye hã va ƒo nu tso tsitretsitsi mɔkpɔkpɔa ŋu na Danye. Esi Danye dzilawo ku le eƒe ɖevime eye wòdi vevie be yeanya nusi dzɔna ɖe ame dzi le ku me ta la, esia ʋãe ŋutɔ. Nuteƒekpɔkpɔ ma na mekpɔ mɔnukpɔkpɔwo ŋudɔwɔwɔ ɣesiaɣi aɖi vomeɖase ƒe vevienyenye.
Le ƒe 1930 ƒeawo me la, Danye dze toɖoɖo Joseph F. Rutherford, si nye Gbetakpɔxɔ Habɔbɔa ƒe zimenɔla ɣemaɣi, ƒe nuƒo si wòƒona le radio dzi le Kwasiɖagbe ŋdiwo me. Le ƒe mawo me la, Ðasefoawo dze aƒeme yi aƒeme dɔa hã gɔme le afisi míenɔ. Wotsɔa agbaƒomɔ̃ kpokploe aɖe dana ɖe ati kusu aɖe te le aƒea me eye woƒoa Nɔviŋutsu Rutherford ƒe nuƒo si wolé ɖe agba dzi. Nuƒo mawo si wolé ɖe agba dzi kple Gbetakpɔxɔ kpakple Golden Age (si nye Nyɔ! fifia) doa dzidzɔ na Danye.
Ƒe ʋee aɖewo megbe le ƒe 1938 me la, woɖo amekpegbalẽvi ɖe Gbetakpɔxɔ dɔlawo kpe wo va kpekpe tɔxɛ si wowɔ le ame aɖe ƒe aƒeme si didi kilometa 25 kloe tso mía gbɔ. Danye di be yeayi, eyata mía kple Fern kpakple nɔvinyeŋutsu eve míeyi kpakplii. John Booth kple Charles Hessler siwo nye Yehowa Ðasefowo ƒe dzikpɔla mɔzɔlawo ƒo nu na mí amesiwo ade wuieve. Emegbe wodze amewo nu ƒoƒo ƒu gɔme be woayi gbeadzi le ŋufɔke. Ame aɖeke metsɔ eɖokui na be yeayi kpli wo o, ale Nɔviŋutsu Hessler tɔ asi dzinye biam be, “Nukatae mayi kpli mí o?” Nyemenya nusi tututu wɔ ge woyina o, gake susu aɖeke menɔ asinye si ta nyemakpe ɖe wo ŋu o.
Míeyi tso aƒeme yi aƒeme vaseɖe ŋdɔ me lɔƒo, eye emegbe Nɔviŋutsu Hessler ɖe abolo eve si me wode lãe do goe be míaɖu. Míenɔ anyi ɖe sɔlemexɔ aɖe ƒe atrakpuiwo dzi hedze nua ɖuɖu gɔme. Esi meɖe sigaret ma do goe megbe hafi Nɔviŋutsu Hessler va nyae be zi ɖeka koe mede kpekpe kpɔ. Egblɔ be yeava ɖu fiẽnu kpli mí gbemagbe fiẽ, eye wògblɔ na mí be míkpe míaƒe aƒelikawo hena Biblia me dzodzro. Le fiẽnua ɖuɖu vɔ megbe la, ewɔ Biblia nusɔsrɔ̃ kpli mí eye wòƒo nuƒo na vavala siwo ade ewo. Egblɔ na mí be ele be woawɔ Biblia nusɔsrɔ̃ kpli mí kwasiɖa sia kwasiɖa. Togbɔ be míaƒe aƒelikawo melɔ̃ ɖe edzi o hã la, mía kple Fern míewɔ ɖoɖo be woawɔ kwasiɖa sia kwasiɖa ƒe aƒeme Biblia nusɔsrɔ̃ kpli mí.
Ŋgɔyiyi le Nyateƒea Me
Ema megbe teti ko la, mía kple Fern míeyi gbeadzi. Míenɔ anyi ɖe megbezikpui dzi le ʋu me, eye ɖeko míekpe sigaret be míano koe nye ma fonye trɔ ɖe mía ŋu gblɔ be: “Fifia koe wogblɔ nam be Ðasefoawo menoa sigaret o.” Fern tsɔ eƒe sigaretia ƒu gbe to fesre nu enumake—Nye ya meno tɔnyea wu enu. Togbɔ be sigaretnono vivia mía nu hã la, míegaka asi sigaret ŋu kpɔ o.
Esi míexɔ nyɔnyrɔ le ƒe 1940 vɔ megbe la, mía kple Fern míesrɔ̃ nyati aɖe le kpekpe aɖe me si de mɔɖeɖedɔa, abe alesi woyɔa ɣeyiɣiawo katã ƒe gbeƒãɖeɖedɔa ene, wɔwɔ ƒe dzi ƒo. Esi míetrɔ yina aƒeme la, nɔviŋutsu aɖe bia be: “Nukatae mia kple Fern miawɔ mɔɖeɖedɔa o? Naneke mexe mɔ na mi o ɖe.” Míete ŋu gbe nya si wògblɔ la o, ale míetsɔ mía ɖokui na. Mena ŋkeke 30 ƒe nyanya nye dɔtɔwo, eye míewɔ ɖoɖo be míawɔ mɔɖeɖedɔa.
Míebia aɖaŋuɖoɖo tso Gbetakpɔxɔ Habɔbɔa gbɔ tso afisi míasubɔ le la ŋu, eye emegbe míeʋu yi Baltimore, Maryland. Wowɔ xɔ ƒe ɖoɖo da ɖi na mɔɖelawo le afima, eye ho si woxɔna ɖe xɔdɔme kple nuɖuɖu ta dzinu ɖekae nye $10. Míedzra ga aɖe ɖo eye míesusu be akplɔ mí va ɖo Harmagedon me bɔbɔe. (Nyaɖeɖefia 16:14, 16) Míebui be Harmagedon ɖo vɔ. Eyata esi míedze mɔɖeɖedɔa wɔwɔ gɔme la, míeɖe asi le míaƒe aƒe kple nusianu ŋu.
Míewɔ mɔɖeɖedɔa le Baltimore tso ƒe 1942 va ɖo ƒe 1947. Wotsi tre ɖe Yehowa Ðasefowo ƒe dɔa ŋu sesĩe le ƒe mawo me. Le esi be míaku míaƒe ʋu ayi míaƒe Biblia nusrɔ̃viwo ƒemee teƒe la, míenaa ame aɖe kua mí yinae ɣeaɖewoɣi. Ne míewɔe nenema la, ke womaŋɔ míaƒe lɔrifɔtiwo o. Tsitretsiɖeŋu ma medo dzidzɔ na ame aɖeke o, gake mate ŋu agblɔ be míese vivi na gbeadzisubɔsubɔdɔa ɣesiaɣi. Le nyateƒe me, míekpɔ mɔ be míado go nu dovoɖiname ʋee aɖewo le Aƒetɔ ƒe dɔa me.
Medidi o míezã ga si míedzra ɖo la katã vɔ. Míaƒe lɔrifɔtiawo nyi, eye míaƒe awuwo kple afɔkpawo hã vɔ. Míelé dɔ zi eve alo zi etɔ̃ tsi aba dzi didi. Agbenɔnɔa menɔ bɔbɔe na mí o, gake medzro mí kpɔ be míaɖe asi le dɔa ŋu o. Míeƒoa nu le eŋu gɔ̃ hã o. Míeɖe agbemenu bubu aɖewo dzi kpɔtɔ ale míate ŋu ayi mɔɖeɖedɔa dzi.
Dɔdasi Bubuwo Xɔxɔ
Le ƒe 1947 me la, míede takpekpe le Los Angeles, California. Esi míenɔ afima la, wona lɛta mía kple fonye William siaa be míawɔ dzikpɔla mɔzɔladɔ, asrã hamewo akpɔ ana kpekpeɖeŋu wo. Míexɔ hehe tɔxɛ aɖeke ɣemaɣi na dɔ ma wɔwɔ o. Ðeko míeyi. Le ƒe adre siwo kplɔe ɖo la, mía kple Fern míesubɔ le Ohio, Michigan, Indiana, Illinois, kple New York. Le ƒe 1954 me la, wokpe mí be míava de Gilead, dutanyanyuigblɔlawo ƒe hehenana suku ƒe klass 24 lia. Esi míele afima la, Fern dze atatutudɔ. Dzidzɔtɔe la, eƒe lãme va sẽ nyuie, eye woɖo mí ɖe mɔzɔzɔdɔa me le New York kple Connecticut.
Esi míenɔ subɔsubɔm le Stamford, Connecticut la, Nathan H. Knorr, si nye Gbetakpɔxɔ Habɔbɔa ƒe zimenɔla ɣemaɣi, kpe mí be míaɖu kwasiɖanuwuwu kple ye kpakple ye srɔ̃ Audrey. Wotsɔ fiẽnuɖuɖu vivi aɖe si woɖo atsyɔ̃ na kple nu vovovowo ɖo kplɔ̃ na mí. Míenya wo do ŋgɔ, eye menya Nɔviŋutsu Knorr nyuie ale gbegbe be menya be nu bubu aɖe le susu me nɛ kpe ɖe hadede kple fiẽnuɖuɖua ŋu. Le nuɖuɖua vɔ megbe le fiẽ ma la, ebiam be: “Ne wobe nàva Betel ɖe, adzɔ dzi na wòa?”
Meɖo ŋu be: “Nyemenya tututu o; Nyemenya nu geɖe tso Betel gbenɔnɔ ŋu o.”
Esi míetsɔ kwasiɖa geɖe bu nya sia ŋu vɔ la, míegblɔ na Nɔviŋutsu Knorr be ne edi be míva la, míava. Kwasiɖa si kplɔe ɖo la, míexɔ lɛta be míava Betel le April 27, 1957, si nye míaƒe srɔ̃kpegbeƒezã 21 lia dzi.
Ŋkeke gbãtɔ ma si míeɖo Betel la, Nɔviŋutsu Knorr ɖe nusi wodi tso asinye la me nam nyuie. Egblɔ nam be: “Mèganye nutome sue subɔla azɔ o; èva dɔ wɔ ge le Betel. Dɔ vevitɔ kekeake si wòle be nàwɔ lae nye esia, eye míedi be nàde wò ɣeyiɣi kple ŋusẽ dɔ si woana hehe wò le Betel afisia be nàwɔ la me. Míedi be nànɔ Betel.”
Betel Nɔnɔ Nye Viɖenu
Magazine kple Nudɔdɔwo Dzikpɔƒee nye teƒe gbãtɔ si wona dɔm le. Emegbe anye ƒe etɔ̃ megbe la, Nɔviŋutsu Knorr dɔ ame ɖem be mava yeƒe ɔfis. Ena menya ɣemaɣi be nusi tututu ta woyɔm va Betel ye nye dɔwɔwɔ le Betel-ƒea me. Eƒe mɔfiamewo nɔ tẽ ŋutɔ, “Betel-ƒea dzikpɔkpɔ tae nèva afisia ɖo.”
Betel-ƒea dzikpɔkpɔ na meɖo ŋku nusiwo dzinyelawo fiam esime menɔ tsitsim le agblea dzi la dzi. Betel Ƒeme le ko abe ƒomegbe ŋutɔ nɔnɔ ene. Nunyanyã, nuɖaɖa, nuɖugbawo me kɔklɔ, abaɖoɖo, kple dɔ bubuwo li woawɔ. Wodzea agbagba le ɖoɖo si wowɔ ɖe edzikpɔkpɔ me ŋu be woana Betel nanye teƒe si woanɔ ame ƒe dzi nadze eme, afisi ame ayɔ be yeƒe aƒeme.
Meka ɖe edzi be nu geɖe li ƒomewo nasrɔ̃ le alesi wowɔa dɔe le Betel la me. Míefɔna ŋdikanya dzroa gbesiagbe mawunyakpukpuia me tsɔ dzea míaƒe ŋkekea ƒe dɔwɔnawo gɔmee. Wodi tso mía si be míanye dɔ sesẽ wɔlawo, míanye veviedonulawo, gake ahada asɔ. Betel mele abe saɖagaƒeme ene abe alesi ame aɖewo abui ene o. Míete ŋu wɔa dɔ geɖe le alesi míewɔ ɖoɖo ɖe nusianu ŋui ta. Ame geɖewo gblɔ be hehe si yewoxɔ le afisia kpe ɖe yewo ŋu emegbe be yewote ŋu xɔ agbanɔamedziwo le yewoƒe ƒomewo kple le Kristo-hamea me.
Woate ŋu ade dɔ ɖekakpui kple ɖetugbi siwo va Betel si be woakpɔ nuwo ƒe dzadzɛnyenye gbɔ, woawɔ dɔ le nunyaƒe, alo woawɔ dɔ le agbalẽtaƒe. Xexeametɔwo adi be míasusui be bubu mele asinudɔ mawo wɔwɔ ŋu o eye be wodaa ame ɖe anyi. Gake sɔhɛ siwo le Betel la va kpɔnɛ dzea sii be dɔdasi mawo hiã be nuwo nayi edzi nyuie le míaƒe ƒomea me eye míakpɔ dzidzɔ.
Xexeametɔwo agadi be nàsusui be hafi dzi nadzɔ wò vavã la, ele be nànɔ ameŋkutanɔƒe kɔkɔ aɖe. Menye nyateƒee o. Ne míewɔ nusi wode asi na mí be míawɔ la, ke ‘nusi wòle be míawɔ la ko wɔm míele,’ eye Yehowa ayra mí. (Luka 17:10) Dzidzeme vavãtɔ ate ŋu asu mía si ne míeɖo ŋku taɖodzinu si le míaƒe dɔa ŋu—be míawɔ Yehowa ƒe lɔlɔ̃nu eye míado Fiaɖuƒea ƒe nuwo ɖe ŋgɔ la dzi. Ne míelé ema ɖe susu me la, míase vivi na dɔdasi ɖesiaɖe ƒomevi eye míaƒe dzi adze eme.
Gomekpɔkpɔ le Takekedɔ ƒe Mɔnukpɔkpɔ Me
Le Cleveland, Ohio, takpekpe si wowɔ le ƒe 1942 me, ƒe ewo kple edzivɔ megbe hafi míeva Betel la, Nɔviŋutsu Knorr ƒo nuƒo si ƒe tanyae nye “Ŋutifafa—Ate Ŋu Anɔ Anyi Adidia?” Ena eme kɔ be Xexemeʋa II lia si nɔ edzi yim ɣemaɣi awu enu eye ŋutifafaɣeyiɣi aɖe anɔ anyi si ana mɔnukpɔkpɔ be míakeke gbeƒãɖeɖedɔa ɖe enu. Woɖo Gilead Suku hena hehenana dutanyanyuigblɔlawo kple Teokrasi Subɔsubɔ Sukua hena kpekpeɖeŋu nana nɔviawo be woatrɔ asi le woƒe nuƒoŋutete ŋu le ƒe 1943 me. Wowɔ ɖoɖo ɖe takpekpe gãwo hã ŋu. Esiwo ɖe dzesi ŋutɔ le ƒe 1950 ƒeawo mee nye esiwo wowɔ le Yankee Stadium, New York. Le takpekpe siwo wowɔ le afima le ƒe 1950 kple 1953 me la, mɔnukpɔkpɔ su asinye be makpe asi ɖe ɖoɖowɔwɔ ɖe dzeƒe ŋu na ame akpe teƒe akpe geɖe be woava dze Trailer City gã la le ŋkeke enyi ƒe takpekpe mawo dometɔ ɖesiaɖe me.
Le takpekpe mawo kpakple gãtɔ kekeake si wowɔ le ƒe 1958 me wɔwɔ vɔ megbe la, Fiaɖuƒe gbeƒãɖelawo dzi ɖe edzi ale gbegbe. Esia kpɔ ŋusẽ ɖe dɔ si wɔm míele le Betel dzi tẽ. Le ƒe 1960 ƒeawo ƒe nuwuwu kple ƒe 1970 ƒeawo ƒe gɔmedzedze me la, míaƒe dɔwɔƒea megava lolo na mí o eye xɔ siwo me dɔwɔlawo anɔ va zu agba blibo na mí. Be míate ŋu akpɔ míaƒe ƒomea si nɔ dzidzim ɖe edzi ƒe nuhiahiãwo gbɔ la, míehiã xɔdɔmewo, dzodoƒewo, kple nuɖuxɔwo.
Nɔviŋutsu Knorr bia tso mía kple Nɔviŋutsu Max Larson si nye agbalẽtaƒea dzikpɔla si be míadi teƒe nyui aɖe be míatu xɔwo akpee. Esi meva Betel le ƒe 1957 me la, wona nɔƒe míaƒe ƒomea me nɔla siwo anɔ ame 500 la ɖe aƒe gã aɖe me. Gake esi ƒeawo va nɔ yiyim la, Habɔbɔa ƒle amedzrodzeƒe gã etɔ̃ siwo mele didiƒe o eye wòdzra wo ɖo—Towers, Standish, kple Bossert—hekpe ɖe dziƒoxɔ sue geɖewo ŋu. Le ƒe 1986 me la, Habɔbɔa ƒle anyigba ɖe afisi amedzrodzeƒe si ŋkɔe nye Hotel Margaret nɔ tsã eye wòtrɔ xɔ nyui siwo wotu ɖe afima zu amesiwo ade 250 ƒe aƒeme. Emegbe le ƒe 1990 ƒeawo ƒe gɔmedzedzewo me la, Habɔbɔa tu dziƒoxɔ dzisasrã 30 si me ame 1,000 bubu anɔ. Brooklyn Betel ate ŋu akpɔ xɔ kple nuɖuɖu na míaƒe ƒomea me tɔ siwo wu ame 3,300 la fifia.
Woƒle anyigba ɖe Wallkill, New York hã, si didi tso Brooklyn Betel gbɔ kilometa 160 kloe. Le ƒe siwo va yi me tso ƒe 1960 ƒeawo ƒe nuwuwu ƒe gɔmedzedze la, wotu xɔdɔmewo kple agbalẽtaƒe gã aɖe ɖe afima. Fifia míaƒe Betel-ƒomea me tɔ ame 1,200 le afima wɔa dɔ. Le ƒe 1980 me la, wodze numekuku wɔwɔ tso alesi woawɔ akpɔ anyigba si ƒe lolome ade agbleka (acre) 600 si te ɖe New York City ŋu, si ŋu mɔdodo nyuiwo le. Anyigbadila la ko nu gblɔ be: “Afikae miele anyigba ma ƒomevi kpɔ ge le? Manya wɔ o.” Gake ŋufɔke ko wòƒo ka na mí be: “Mekpɔ miaƒe anyigba la.” Woyɔnɛ egbea be Gbetakpɔxɔ Habɔbɔa ƒe Hehenaƒe si le Patterson, New York. Afimae wodea sukuwo le, eye subɔla siwo wu 1,300 ƒe ƒomee le afima.
Nusiwo Mesrɔ̃ tso Eme
Mesrɔ̃e be dzikpɔla nyui enye amesi te ŋu xɔa nyatakaka xɔasiwo tso ame bubuwo gbɔ. Nyametsotso akpa gãtɔ si mɔnukpɔkpɔ su asinye mewɔ le nye Betel dzikpɔkpɔdɔa wɔwɔ me la tso ame bubuwo ƒe kpekpeɖeŋu me.
Ame geɖe nye tsitsi nam esime meva Betel abe alesi nye hã menyee na amewo egbea ene. Fifia wo dome ame akpa gãtɔ ku. Amekawoe axɔ ɖe amesiwo tsi ku amegã heku la teƒe? Menye amesiwo si ŋutete geɖe wu le ye wònyena ɣesiaɣi o. Amesiwo le afisia, wɔa dɔa le nuteƒewɔwɔ me, siwo tsɔa wo ɖokui nana lae.
Nya vevi bubu si dzi míaɖo ŋkui ye nye alesi srɔ̃nyɔnu nyui hiãe. Srɔ̃nye lɔlɔ̃a Fern ƒe kpekpeɖeŋu si wònam la kpe ɖe ŋunye ŋutɔ le nye teokrasi dɔdasiwo wɔwɔ me. Enye srɔ̃ŋutsuwo ƒe agbanɔamedzi be woakpɔ egbɔ be yewo srɔ̃wo se vivi na woƒe dɔdasiwo. Medzea agbagba wɔa nane si vivia mía kple Fern nu la ƒe ɖoɖo. Manye nu xɔasi o, ke nu yeye aɖe. Srɔ̃ŋutsua ƒe agbanɔamedzie wònye be wòawɔ nusiwo ana dzi nadzɔ srɔ̃a. Ɣeyiɣi si wòakpɔ na srɔ̃a le vevie, eye esi ɣeyiɣi yina kabakaba ta la, ele be wòazãe nyuie.
Enye dzidzɔ nam be mele agbe le ŋkeke mamlɛa siwo ŋu Yesu ƒo nu tsoe la me. Ɣeyiɣi wɔnukutɔ kekeakee nye sia le amegbetɔwo ƒe ŋutinya me. Míete ŋu kpɔ alesi Aƒetɔ la trɔ asi le eƒe habɔbɔa ŋu le edzadzraɖo na xexeme yeye si ƒe ŋugbe wodo la kple míaƒe xɔse ƒe ŋkuwo. Ne metrɔ kpɔ megbe le nye agbenɔɣi me le Yehowa ƒe dɔa me la, mekpɔe be Yehowae nye amesi le eƒe habɔbɔa dzi kpɔm—menye amegbetɔwoe o. Eƒe subɔlawo koe míenye. Esia ta ele be míabia mɔfiame tso egbɔ ɣesiaɣi. Ne efia nusi míawɔ ko la, ele be míatso ɖe eŋu awɔe ɖekae enumake.
Tsɔ ɖokuiwò na habɔbɔa, eye àkpɔ dzidzɔ le wò agbe me godoo. Nuka ke wɔmee nèle—eɖanye mɔɖeɖedɔae o, dzikpɔla mɔzɔladɔae o, gbeƒãɖelae nènye le hamea me o, Betel dɔwɔwɔe alo dutanyanyuigbɔgblɔdɔae o—zɔ mɔfiame si woɖo ɖi la dzi, eye wò dɔdasia nadze ŋuwò. Dze agbagba be nàse vivi na dɔdasi kple ŋkeke ɖesiaɖe ƒe dɔwɔna le Yehowa ƒe subɔsubɔdɔa me. Ðeɖi ate ŋuwò eye dɔ atsi dziwò alo àgbɔdzɔ ɣeaɖewoɣi ya. Ɣemaɣie wòle be nàɖo ŋku nusita nètsɔ wò agbe ɖe adzɔgbee na Yehowa ɖo dzi. Be nàwɔ eƒe lɔlɔ̃nu, ke menye tɔwò o.
Ŋkeke aɖeke menɔ anyi si meva dɔme eye nyemese vivi na dɔ si mewɔ la kpɔ o. Nukatae? Elabena ne míetsɔ míaƒe luʋɔ blibo na Yehowa la, nyanya be ‘nusi wòle be míawɔ la koe míewɔ’ ana míaƒe dzi nadze eme.
[Nɔnɔmetata si le axa 19]
Magazine Dɔwɔƒea
[Nɔnɔmetata si le axa 19]
Trailer City, ƒe 1950
[Nɔnɔmetata si le axa 19]
Mɔɖeɖedɔa wɔwɔ le Baltimore, le ƒe 1946 me
[Nɔnɔmetata si le axa 19]
Mía kple Fern le Trailer City le ƒe 1950 me
[Nɔnɔmetata si le axa 22]
Mía kple Audrey kple Nathan Knorr
[Nɔnɔmetata si le axa 23]
Gbetakpɔxɔ Habɔbɔa ƒe Hehenaƒe si le Patterson, New York
[Nɔnɔmetata si le axa 24]
Mía kple Fern egbea