Nukata Wòle Be Míawɔ Nu Dzɔdzɔe?

AGBALẼNYALAGÃ aɖe gblɔ kpɔ be: “Nu nyui lɔlɔ̃ la le asinye, ke nu nyui wɔwɔ la nyemekpɔ wɔe kura o. Elabena menye nu nyui, si melɔ̃na la, mewɔna o, ke nuvɔ̃, si nyemelɔ̃na o la, eya ke mewɔna boŋ.” Nukatae wòsesẽ na nunyala sia be wòawɔ nu nyui si wòdi be yeawɔ la ɖo? Eya ŋutɔ ɖe eme be: “Mekpɔ se sia bena, esime melɔ̃na bena, mawɔ nu nyui la, nuvɔ̃ la lé ɖe ŋutinye. Elabena mekpɔa dzidzɔ le Mawu ƒe se la ŋuti le ememe la gome; ke mekpɔ se bubu, si le aʋa wɔm kple se, si le nye nyasã me la, le nye ŋutinuwo me, eye wòlém aboyo le nuvɔ̃ ƒe se, si le nye ŋutinuwo me la me.”—Romatɔwo 7:18, 19, 21-23.

Apostolo Paulo ƒe nya siawo siwo wòŋlɔ ƒe 2,000 kloe nye esia la ɖe nusita nu dzɔdzɔe wɔwɔ sesẽna na amegbetɔ madeblibowo la me. Ehiã be nu nyui wɔwɔ ƒe didi sẽŋu aɖe ŋutɔ nanɔ mía me hafi míate ŋu alé ɖe gɔmeɖose dzɔdzɔewo ŋu, vevietɔ le nɔnɔme sesẽwo me. Eyata anyo be míabu biabia sia ŋu be: Susu vevitɔ kekeake ka tae wòle be míawɔ nu dzɔdzɔe ɖo?

Se nya si Ŋɔŋlɔawo gblɔ tso ame dzɔdzɔe ƒe etsɔme ŋu la ɖa. Míexlẽ le Psalmo 37:37, 38 (NW) be: “Lé ŋku ɖe ame maɖifɔ la ŋu, eye nàkpɔ ame dzɔdzɔe la ɖa, elabena ŋutifafae le eyama lalam le etsɔme. Gake woatsrɔ̃ dzidalawo katã, eye woatsrɔ̃ ame vɔ̃ɖiwo ƒe dzidzimeviwo.” Lododowo 2:21, 22 gblɔ na mí be: “[Ame dzɔdzɔewo] anɔ anyigba la dzi, eye ame maɖifɔwo asusɔ ɖe edzi; ke woatsrɔ̃ ame vɔ̃ɖiwo ɖa le anyigba dzi, eye woaho ame maɖianukwarewo ɖa le edzi.”

Togbɔ be ŋugbedodo siawo kple bubu siwo le Biblia me na míekpɔ susu nyui aɖewo siwo tae wòle be míawɔ nusi adze Mawu ŋu ɖo hã la, menye woawoe nye susu vevitɔ kekeake si tae wòle be míawɔe nenema ɖo o. Susu vevi si ta wòle be míawɔ nu dzɔdzɔe ɖo la ku ɖe gbetɔame aɖe si ka mí amegbetɔwo kple mawudɔlawo siaa tẽ la ŋu. Nyati si kplɔe ɖo dzro nusi gbetɔame ma nye kple alesi wòka wò hãe la me.