Mɔfiame Kple Mɔkpɔkpɔ Tsoƒe Vavãtɔ
YEHOWA MAWU mele abe gbɔgbɔ vɔ̃wo ene o, elabena enye nunyatɔ ɖeka hɔ̃ kple ŋusẽkatãtɔ. Enye lɔlɔ̃ ƒe Mawu hã. (1 Yohanes 4:8) Aɖaŋu nyuiwo koe wòɖona, mexɔa naneke ɖe eta o, eye míaƒe nyui koe wòdina. Aleke gbegbe esia to vovo na ŋɔliyɔlawo kple akunyawɔlawo ƒe aɖaŋuɖoɖowoe nye esi! Mawu gblɔ be: ‘Kuwui! Mi ame tsikɔwuwo katã [gbɔgbɔ me tsikɔ], miva tsi gbɔ! Mi ame siwo si ga mele o, miva ƒle nu, ne miaɖu! Miva, ne miadze wain kple notsi, menye kple ga alo le asixɔxɔ nu o! Nu ka ta miebe, yewoaxlẽ ga ɖe nu si menye abolo o la ta, eye miawɔ dɔ ɖe nu si meɖia ƒo o la ta? Miɖo tom ko, ekema miaɖu nu nyui, eye miaƒe luʋɔ ƒe dzeme akɔ ɖe ami ŋu.’—Yesaya 55:1, 2.
Esi wònye mía Wɔla lɔlɔ̃a gbɔe Biblia tso ta la, enaa mɔkpɔkpɔ kple gbɔgbɔmetakpɔkpɔ mí, enaa tameɖoɖo nɔa míaƒe agbe ŋu, eye gɔmeɖose nyuitɔ kekeake siwo nu míanɔ agbe ɖo la le eme. Ðe manyo ŋutɔ be nàtɔ sẽ ade ŋugble le nyabiase siwo gbɔna la kpakple woƒe ŋuɖoɖo siwo tso Biblia me la ŋu oa?
[Aɖaka si le axa 7]
● Aleke mawɔ akpɔ dzidzeme vavãtɔ? Biblia gblɔ be: ‘Ale Yehowa, wò xɔnametɔ, Israel ƒe kɔkɔetɔ la, gblɔ esi: Nye Yehowa, wò Mawu, enye ame si fia nu si nyo na wò la wò, nyee akplɔ wò to mɔ, si dzi nato la. Ðe wònye ɖe nèɖo to nye seawo la, anye ne wò ŋutifafa anɔ abe tɔsisi ene, eye wò dzɔdzɔenyenye anɔ abe ƒutsotsoewo ene.’—Yesaya 48:17, 18.
● Ðe nu vlo wɔwɔ anɔ anyi ɖaa? “Nuteƒewɔlawo anɔ anyigba la dzi, eye ame maɖifɔwo asusɔ ɖe edzi; ke woatsrɔ̃ ame vɔ̃ɖiwo ɖa le anyigba dzi, eye woaho ame maɖianukwarewo ɖa le edzi.” (Lododowo 2:21, 22) Ɛ̃, woatsrɔ̃ amegbetɔ kple mawudɔla vɔ̃ɖiwo siaa gbidii, ɖeko wòanɔ abe dzoe wotsɔ tsrɔ̃ woe ene.—Nyaɖeɖefia 20:10, 14.
● Dɔléle kple fukpekpe nu ava yi gbe aɖe gbea? “Kpɔ ɖa! Mawu ƒe agbadɔ la le amegbetɔwo gbɔ, eye wòanɔ anyi kpli wo, eye woanye eƒe dukɔwo. Eye Mawu ŋutɔ anɔ anyi kpli wo. Eye wòatutu aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o. Nu siwo nɔ anyi tsã la [egbe ƒe kuxiwo] nu va yi.”—Nyaɖeɖefia 21:3, 4.
To vovo na gbɔgbɔ vɔ̃wo la, Mawu ya mekaa aʋatso gbeɖe o. Vavãe, “mate ŋu aka aʋatso o.” (Tito 1:2) Gawu la, abe ale si míakpɔe le nyati siawo ƒe mlɔetɔ me ene la, nyateƒe si tso egbɔ la naa ablɔɖe kple agbe.—Yohanes 8:32; 17:3.—g11-E 02.