Ðe Wòle Be Ðeviwo Nanya Mawua?

“Subɔsubɔha siwo ana míalé fu mía nɔewo la sɔ gbɔ, ke esiwo ana míalɔ̃ amewo ya mede ha o.”—JONATHAN SWIFT, EŊLISIAWO ƑE AGBALẼŊLƆLA.

ƑE ALAFA 18 lia mee Swift gblɔ nya mawo, gake egbea gɔ̃ hã la, ame geɖe lɔ̃ ɖe eƒe nyaa dzi. Le nyateƒe me la, ame aɖewo xɔe se be mele be gome nanɔ dzilawo si be woafia nu wo viwo tso Mawu ŋu o. Woxɔe se be ne wonyi ɖeviwo le ƒome siwo me wosubɔa Mawu le me la, egblẽa nu le wo ŋu le mɔ aɖewo nu.

Nu kae nèsusu tso nya sia ŋu? Nya siwo gbɔna la dometɔ ka mee susu le wu?

● Mele be woaɖe mɔ na dzilawo be woafia nu wo viwo tso Mawu ŋu o.

● Ele be dzilawo nalala wo viwo natsi hafi woanɔ mawusubɔsubɔ ŋu nyawo me dzrom kpli wo.

● Ele be dzilawo nafia nu siwo woxɔ se ku ɖe Mawu ŋu la wo viwo le woƒe ɖevime. Gake ne wole tsitsim la, ele be dzilawo nade dzi ƒo na wo be woawo ŋutɔwo nakpɔ kakaɖedzi na nu siwo wofia wo.

● Ele be ɖeviwo naxɔ wo dzilawo ƒe dzixɔsewo ade eme ne woawo ŋutɔwo mekpɔ kpeɖodzi le wo ŋu o hã.

Ðe Mawusɔbɔsubɔ Gblẽa Nu Le Ðeviwo Ŋua?

Dzila lɔ̃ame aɖeke madi be yeawɔ nu si agblẽ nu le ye vi ŋu o. Gake ɖe kpeɖodziawo ɖee fia be ame siwo gblɔna be mele be woafia nu ɖeviwo tso Mawu ŋu o la ƒe nyawo le emea? Ƒe geɖewoe nye esia la, numekulawo ku nu me vevie tso ale si dzilawo ƒe subɔsubɔdzixɔsewo kpɔa ŋusẽ ɖe ɖeviwo dzii ŋu. Nu kae wova de dzesi?

Numekulawo va de dzesii be le esi mawusubɔsubɔ nagblẽ nu le ɖeviwo ŋu teƒe la, etea ŋu kpena ɖe wo ŋu wotsina zua ame ɖɔʋuwo boŋ. Le ƒe 2008 me la, nyatakaka aɖe dze le agbalẽ aɖe (Social Science Researcha) me si gblɔ be: “Wode dzesii be mawusubɔsubɔ wɔnɛ be ƒomedodo si le ɖeviwo kple wo dzilawo dome ganɔa kplikplikpli wu.” Wogblɔ kpee le agbalẽa me be: “Edze abe mawusubɔsubɔ kple ame ƒe gbɔgbɔmenuhiahiãwo gbɔ kpɔkpɔ wɔa akpa vevi aɖe le ɖeviwo ƒe agbe me, eye wònana ƒomedodo nyui nɔa ƒomea me tɔwo dome ene.” De dzesi ale si nya ma sɔ kple nya aɖe si Yesu gblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo.”—Mateo 5:3.

Ke susu si nye be ele be ɖeviwo natsi hafi woasrɔ̃ nu tso Mawu kple mawusubɔsubɔ ŋu ya ɖe? Susu ma tsi tre ɖe nyateƒenya sia ŋu: Míate ŋu atsɔ ɖevi ƒe susu asɔ kple tɔkpo ƒuƒlu si me wòhiã be woakɔ tsi ɖo. Le nyateƒe me la, nyametsotso aɖe dze ŋgɔ dzilawo; woawo ŋutɔ naku tsi ɖe “tɔkpoa” me, si fia be woafia ɖevia agbe nyui nɔnɔ ƒe mɔwo kple dzixɔse siwo wokpɔ be esɔ loo alo be woaɖe mɔ xexea ƒe nukpɔsusuwo naxɔ susu kple dzi me nɛ.

Nu Kae Ana Nusɔsrɔ̃ Tso Mawu Ŋu Naɖe Vi?

Ŋutinya me nudzɔdzɔwo ɖo kpe edzi be subɔsubɔhawo ate ŋu aƒã nazãbubu kple fuléle ɖe amewo me. Ekema nu kae dzilawo ate ŋu awɔ be nya si Jonathan Swift gblɔ tso subɔsubɔhawo ŋu la nagava eme ɖe wo viwo dzi o? Aleke woate ŋu afia wo dzixɔse siwo akpe ɖe wo ŋu be woalɔ̃ amewo?

Nu si akpe ɖe wo ŋue nye be woakpɔ ŋuɖoɖo na biabia etɔ̃ siawo: (1) Nu kae wòle be woafia ɖeviwo? (2) Ame kae afia nu wo? (3) Nufiafiamɔnu kawoe ɖea vi wu?

[Etenuŋɔŋlɔ]