Exlẽlawo Bia Be . . .

Ðe Wòle Be Woanyrɔ Vidzĩwo Alo Ade Mawutsi Ta Na Woa?

▪ Victoria gblɔ be: “Menɔ vɔvɔ̃m be nye tse John atsi Limbo ɖikaa.” Nu ka tae wònɔ vɔvɔ̃m ɖo? Egblɔ be: “Womenyrɔ John hafi wòku o, eye Katoliko nunɔla aɖe gblɔ be le esia ta, John atsi Limbo tegbee.” Nya sia dzi ŋɔ ya, gake ɖe Ŋɔŋlɔawo da asi ɖe nufiafia ma dzia? Ðe Biblia gblɔ be ɖevi siwo mexɔ nyɔnyrɔ hafi ku o la anɔ ŋutiklɔdzo me tegbeea?

Biblia gblɔe be ele be woanyrɔ Kristotɔwo. Yesu de se na eyomedzelawo be: “Miheyi ɖawɔ dukɔwo katã me tɔwo woanye nusrɔ̃lawo, mianyrɔ wo ɖe Fofo la kple Vi la kpakple gbɔgbɔ kɔkɔe la ƒe ŋkɔ me, miafia nu wo be, woawɔ nu siwo katã ƒe se mede na mi la.” (Mateo 28:19, 20) De dzesii be ame siwo va zu Yesu ƒe nusrɔ̃lawoe wòle be woanyrɔ. Esia fia be ele be woanye ame siwo srɔ̃ nu tso Yesu ŋu hetiae be yewoadze eyome, ke hã ɖikeke mele eme o be vidzĩ aɖeke mate ŋu awɔ tiatia sia o.

Togbɔ be ele alea hã la, ame aɖewo tea tɔ ɖe edzi be Yesu ƒe sedede sia bia be woanyrɔ ɖevi suewo hã. Luthertɔwo ƒe nunɔla Richard P. Bucher gblɔ be: “Ele be woanyrɔ ame sia ame, ɖeviwo hã le eme.” Eye wògagblɔ kpee be: “Ne womenyrɔ wo o la, ke womatsɔ woƒe nu vɔ̃ ake wo o, eye esia ana woakpe fu le dzo mavɔ me.” Gake le nyateƒe me la, nya mawo tɔgbi tsi tre ɖe Yesu ƒe nufiafiawo ŋu le mɔ etɔ̃ aɖewo ya teti nu.

Gbã, Yesu megblɔ be ele be woanyrɔ vidzĩwo o. Nu ka tae esia le vevie na mí ɖo? Bu nya sia ŋu kpɔ: Yesu do vevie nufiafia eƒe nusrɔ̃lawo tso Mawu ƒe nudidiwo ŋu. Ɣeaɖewoɣi la, egatea gbe ɖe nufiafia vevi aɖewo dzi. Nu ka tae? Edi be yeakpɔ egbɔ be yeƒe nusrɔ̃lawo se nyaa gɔme. (Mateo 24:42; 25:13; Marko 9:34-37; 10:35-45) Ke hã, megblɔ kpɔ be ele be woanyrɔ vidzĩwo o. Ðe wòanye be Yesu ŋlɔ be be yeaƒo nu tso nudidi ma ŋua? Gbeɖe! Ðikeke mele eme o be ne ɖe Mawu di be woanyrɔ vidzĩwo la, anye ne Yesu gblɔe.

Evelia, Yesu megblɔ ɣeaɖekeɣi kpɔ be amewo kpea fu le ku megbe o. Exɔ Ŋɔŋlɔawo dzi se, eye Ŋɔŋlɔawo gblɔ kɔtɛ be: “Agbagbeawo nyae be, yewogbɔna kuku ge, ke kukuawo menya naneke o.” (Nyagblɔla 9:5) Yesu nyae be amewo meyia ŋutiklɔdzo, Limbo, dzo mavɔ, alo teƒe bubu aɖeke le ku megbe o. Ke boŋ le eƒe nufiafia nu la, kukuawo meganya naneke o. Ðeko wòle abe alɔ̃ mee wole ene.—Yohanes 11:1-14.

Etɔ̃lia, Yesu gblɔ be “ame siwo katã le ŋkuɖodziyɔdowo me la” agbɔ agbe. (Yohanes 5:28, 29) Ðikekemanɔmee la, ame miliɔn geɖe siwo mexɔ nyɔnyrɔ hafi ku o la hã anɔ wo dome. Ne wova fɔ wo ɖe tsitre la, mɔnukpɔkpɔ asu wo si be woafia nu wo tso Mawu ƒe nudidiwo ŋu, eye woanɔ agbe tegbee le Paradiso me le anyigba dzi.a—Psalmo 37:29.

Eya ta eme kɔ ƒãa be Biblia megblɔ be ele be woanyrɔ vidzĩwo alo ade mawutsi ta na wo o.

[Etenuŋɔŋlɔ]