Nu Ka Tae Wònyo Be Nàdzro Biblia Me?

Menye ɖeko Biblia nye agbalẽ si bɔ wu bubu ɖe sia ɖe ko o, ke egade ŋgɔ wu le mɔ geɖe nu hã. Nu ka tae? Susu ɖekae nye be, Biblia me nyawo ka mí. Ame siwo nɔ anyi le blema ƒe agbemeŋutinyawo le eme, eye eƒo nu tso woƒe nuwɔwɔ kple wo nɔewo kpakple kadodo si nɔ woa kple Mawu dome ŋu. Nufiame veviwo le ŋutinya siawo me na mí; woŋlɔ wo kple nya siwo gɔme sese le bɔbɔe ale be woate ŋu aɖe egɔme ɖe gbegbɔgblɔ alafa geɖe me, eye amewo katã tea ŋu sea emenyawo gɔme le afi sia afi tso blema ke va de asi na egbea. Eye aɖaŋuɖoɖo siwo le Biblia me la dzi wɔwɔ ɖea vi ɣeawokatãɣi.

Gawu la, le Biblia ƒe nya nu la, menye ɖeko wònye agbalẽ si ƒo nu tso Mawu ŋu o, ke enye agbalẽ si tso Mawu gbɔ hã. Ena míenya Mawu ƒe ŋkɔ, ame si tututu wònye, kple eƒe tameɖoɖo matrɔmatrɔ si tae wòwɔ anyigba kple amegbetɔwo ɖo. Biblia ƒo nu tso nyui kple vɔ̃ ŋuti hoʋiʋli, si ka nuwɔwɔ nyanuwo katã, si dze egɔme tso blema ke la ŋu: enye ŋutinya wɔdɔɖeamedzi aɖe si ƒe nuwuwu anye dzidzɔ sɔŋ. Ne míetsɔ susu nyui xlẽ Biblia la, ana xɔse kple mɔkpɔkpɔ nasu mía si.

Míake ɖe nya siwo míagate ŋu akpɔ le afi bubu aɖeke o la ŋu le Biblia me. Le kpɔɖeŋu me, Biblia kpe ɖe mía ŋu míenya nyateƒea ku ɖe nyawo abe esiwo gbɔna ene la ŋu:

• Ale si míewɔ va dzɔ kple nu si tae míekpea fu

• Nu si Mawu wɔ be yeatsɔ aɖe ameƒomea

• Nu si Yesu wɔ na mí

• Ale si etsɔme ava nɔ na anyigba kple amegbetɔwo

Ðe manyo be nàtsɔ ɣeyiɣi vi aɖe adzro nya siwo le axa siwo kplɔe ɖo la me be nànya nu si koŋ ŋu Biblia ƒo nu tsoe oa?